۱ دَمزُو غَیت خُداوند قد مُوسیٰ گپ زَده گُفت: ۲”دَ بَنی اِسرائیل اَمر کُو و دَزوا بُگی، ’فِکر شُمو بَشه که هدیِه خوراکی مَره دَ عِنوانِ هدیه ھای خاص که خوشبُوی مَورِدِ پِسَند مه اَسته دَ وختِ مُعیَّن شی دَز مه تقدِیم کُنِید.‘ ۳و ام دَزوا بُگی، ’هدیِه خاص ره که شُمو باید دَ خُداوند تقدِیم کُنِید، اینی اَسته: هر روز دُو نَربَرِه یگ ساله و بےعَیب دَ عِنوانِ قُربانی سوختَنی دایمی باید تقدِیم شُنه؛ ۴بارِه اوّل ره دَ وختِ صُبح تقدِیم کُو و بارِه دوّم ره دَ وختِ شام تقدِیم کُو ۵ و قد هر باره دَهُم حِصِّه یگ ایفه روغونِ زَیتُون گٹ شُده بَشه دَ عِنوانِ هدیِه غَلّه-و-دانه بَیر. ۶اینَمی قُربانی سوختَنی دایمی اَسته که دَ کوهِ سِینا دَ عِنوانِ خوشبُوی مَورِدِ پِسَند و هدیِه خاص بَلدِه خُداوند تعیِین شُد. ۷هدیِه وُچی کدَنی ازُو باید چارُم حِصِّه یگ هِین شرابِ انگُور بَلدِه هر باره بَشه؛ اِی هدیِه وُچی کدَنی شرابِ قَوی ره بَلدِه خُداوند دَ جایگاهِ مُقَدَّس شیو کُو. ۸بارِه دوّم ره دَ وختِ شام تقدِیم کُو؛ اُو ره رقمِ قُربانی صُبح قد هدیِه غَلّه-و-دانه و هدیِه وُچی کدَنی شی تقدِیم کُو. اِی یگ هدیِه خاص و خوشبُوی مَورِدِ پِسَندِ خُداوند اَسته.
۹دَ روزِ آرام دُو نَربَرِه یگ ساله و بےعَیب ره قد هدیِه غَلّه-و-دانِه شی که دُو حِصّه از دَه حِصِّه یگ ایفه بِهترِین آردِ روغو گٹ شُده بَشه و قد هدیِه وُچی کدَنی شی تقدِیم کُو. ۱۰اِی قُربانی سوختَنی بَلدِه هر روزِ آرام اَسته، علاوه از قُربانی سوختَنی دایمی و هدیِه وُچی کدَنی شی.
۱۱دَ روزای اوّلِ ماه های خُو یگ قُربانی سوختَنی ره دَ خُداوند تقدِیم کُنِید؛ اِی قُربانی باید دُو جونه‌گاو، یگ قُوچ و هفت نَربَرِه یگ ساله بَشه و پگ شی بےعَیب بَشه. ۱۲امچُنان سِه حِصّه از دَه حِصِّه یگ ایفه بِهترِین آردِ روغو گٹ شُده بَلدِه هدیِه غَلّه-و-دانِه قُوچ ۱۳و دَهُم حِصِّه یگ ایفه بِهترِین آردِ روغو گٹ شُده بَلدِه هدیِه غَلّه-و-دانِه هر باره. اِی قُربانی سوختَنی خوشبُوی مَورِدِ پِسَند و یگ هدیِه خاص بَلدِه خُداوند اَسته. ۱۴و هدیه های وُچی کدَنی ازوا نِیمِ یگ هِین بَلدِه هر نَربَره بَشه. اِی قُربانی سوختَنی ماهوار اَسته دَ ھر ماهِ سال. ۱۵علاوِه از قُربانی سوختَنی دایمی و هدیِه وُچی کدَنی شی، باید یگ ٹَکه دَ عِنوانِ قُربانی گُناه دَ خُداوند تقدِیم شُنه.
۱۶دَ روزِ چاردَهُمِ ماهِ اوّل، قُربانی پِصَح دَ خُداوند تقدِیم شُنه. ۱۷دَ روز پوزدَھُمِ امزی ماه عِید اَسته و بَلدِه هفت روز باید نانِ فطِیر خورده شُنه. ۱۸دَ روزِ اوّل باید یگ جلسِه مُقَدَّس برگُزار شُنه. دَ امزُو روز شُمو هیچ کارِ روزمرِه خُو ره انجام نَدِید؛ ۱۹بَلکِه شُمو یگ قُربانی سوختَنی دَ عِنوانِ هدیِه خاص دَ خُداوند تقدِیم کُنِید؛ اِی قُربانی باید دُو جونه‌گاو، یگ قُوچ و هفت نَربَرِه یگ ساله بَشه؛ مُتَوَجِه بَشِید که اُونا بےعَیب بَشه. ۲۰هدیِه غَلّه-و-دانِه ازوا باید سِه حِصّه از دَه حِصِّه یگ ایفه بِهترِین آردِ روغو گٹ شُده بَلدِه ھر گاو و دُو حِصّه از دَه حِصِّه یگ ایفه بَلدِه قُوچ ۲۱و دَهُم حِصِّه یگ ایفه بَلدِه ھر کُدَمِ امزُو هفت نَربَره بَشه. ۲۲امچُنان یگ ٹَکه ره دَ عِنوانِ قُربانی گُناه تقدِیم کُنِید تا بَلدِه شُمو کِفاره شُنه. ۲۳اَمیا ره علاوِه از قُربانی سوختَنی صُبح که قُربانی سوختَنی دایمی اَسته، تقدِیم کُنِید. ۲۴دَ امزی طرِیقه دَ هر روزِ امزُو هفت روز خوراکِ هدیِه خاص ره دَ عِنوانِ خوشبُوی مَورِدِ پِسَندِ خُداوند تقدِیم کُنِید؛ اِی باید علاوِه از قُربانی سوختَنی دایمی و هدیِه وُچی کدَنی شی تقدِیم شُنه. ۲۵دَ روزِ ھفتُم، بسم جلسِه مُقَدَّس بَرگُزار کُنِید و هیچ کارِ روزمرِه خُو ره انجام نَدِید.
۲۶دَ روزِ نَوبَرِ حاصِلات، وختِیکه دَ دَورونِ عِیدِ هفته های خُو یگ هدیِه غَلّه-و-دانه از حاصِلِ نَو دَ خُداوند تقدِیم مُونِید، شُمو یگ جلسِه مُقَدَّس بَرگُزار کُنِید و هیچ کارِ روزمرِه خُو ره انجام نَدِید. ۲۷شُمو یگ قُربانی سوختَنی دَ عِنوانِ خوشبُوی مَورِدِ پِسَندِ خُداوند تقدِیم کُنِید؛ اُو قُربانی باید دُو جونه‌گاو، یگ قُوچ و هفت نَربَرِه یگ ساله بَشه. ۲۸هدیِه غَلّه-و-دانِه ازوا باید سِه حِصّه از دَه حِصِّه یگ ایفه بِهترِین آردِ روغو گٹ شُده بَلدِه ھر گاو و دُو حِصّه از دَه حِصِّه یگ ایفه بَلدِه قُوچ بَشه ۲۹و دَهُم حِصِّه یگ ایفه بَلدِه هر کُدَمِ امزُو هفت نَربَره. ۳۰یگ ٹَکه ام تقدِیم کُنِید تا بَلدِه شُمو کِفارِه شُنه. ۳۱اَمیا ره علاوه از قُربانی سوختَنی دایمی قد هدیِه غَلّه-و-دانِه شی و هدیه های وُچی کدَنی شی تقدِیم کُنِید؛ مُتَوَجِه بَشِید که اُونا بےعَیب بَشه.