۱اَی قَوم مه، تعلِیم مَره بِشنَوِید؛
و دَ توره های دان مه گوش بِدِید.
۲ما دان خُو ره بَلدِه مَثَل گُفتو واز مُونُم
و توره های پوشِیدِه زمانای قدِیم ره یگ یگ بیان مُونُم؛
۳ چِیزای ره که مو شِنِیدے و فامِیدے
و آته‌گون مو دَز مو نقل کده.
۴مو اُونا ره از اَولادِه ازوا تاشه نَمُونی،
بَلکِه کارای قابِلِ سِتایشِ خُداوند ره
دَ نسل های آینده نَقل مُونی،
قُدرت و کارای عجِیبِ ازُو ره که اُو انجام دَده.
۵اُو یگ شاهِدی دَ یعقُوب قرار دَد،
یعنی یگ شریعت بَلدِه اِسرائیل تعیِین کد
و دَ بابه‌کَلونای مو اَمر کد
که امُو چِیزا ره دَ بچکِیچای خُو تعلِیم بِدیه؛
۶تاکه نسل های آینده امُو چِیزا ره بِدَنه،
بچکِیچای که دَ آینده تَوَلُد مُوشه،
و اُونا ام باله شُده امُو چِیزا ره دَ بچکِیچای خُو نَقل کُنه؛
۷تا اُونا دَ خُدا تَوَکُل کُنه
و کارای خُدا ره از یاد نَبره،
بَلکِه احکامِ ازُو ره نِگاه کُنه
۸و رقمِ بابه‌کَلونای خُو نَبَشه،
رقمِ نسلی که سرکَش و یاغی بُود،
نسلی که دِلِ مُستَحکم نَدَشت
و روحِ شی دَ خُدا وفادار نَبُود.
۹بَنی اِفرایم، هرچند قد کَمون مُسَلَح بُود،
دَ روزِ جنگ پس دَور خورده دُوتا کد.
۱۰اُونا عهدِ خُدا ره نِگاه نَکد
و رفتار کدو دَ مُطابِقِ شریعتِ ازُو ره رَد کد.
۱۱اُونا کارای ازُو ره پُرمُشت کد،
کارای عجِیبی ره که اُو دَزوا نِشو دَدُد.
۱۲اُو دَ پیشِ چِیمِ بابه‌کَلونای ازوا کارای عجِیب انجام دَدُد،
دَ سرزمِینِ مِصر، دَ منطقِه صوعَن.
۱۳اُو دریا ره دُو شَق کده اُونا ره از مینکل شی تیر کد
و آوها ره رقمِ تِپه اَلّی دَ دُو طرف ایستَلجی کد.
۱۴دَ غَیتِ روز اُونا ره قد آوُر راهنُمایی کد
و تمامِ شاو قد روشَنی آتِش.
۱۵اُو دَ بیابو قاده ها ره شِکاف کد
و بَلدِه ازوا آوِ پِرَیمو دَد، رقمی که از غَوُجی کٹِه زمی آو بِدیه.
۱۶اُو از دِلِ سنگ چشمه ها ره دَ وجُود اَوُرد
و آو ره رقمِ دریاچه ها جاری کد.
۱۷لیکِن اُونا دَ ضِدِ ازُو دِیگه ام گُناه کد
و دَ خِلافِ قادِرِ مُتعال دَ بیابو شورِش کد.
۱۸اُونا خُدا ره دَ دِل های خُو آزمایش کد،
چراکه اُونا دَ مُطابِقِ خاهِشِ نَفس خُو خوراک طلب کد.
۱۹اوخته اُونا دَ ضِدِ خُدا گپ زَده گُفت:
”آیا خُدا مِیتَنه دَ بیابو دِستَرخو اَوار کُنه؟
۲۰اونه، اُو قاده ره زَد و آو فَواره کده
دَ شِدَّت جاری شُد،
لیکِن آیا اُو مِیتَنه نان ام بِدیه
یا گوشت ره بَلدِه قَوم خُو تَهیه کنه؟“
۲۱پس وختِیکه خُداوند اِی ره شِنِید، غَدر قار شُد؛
یگ آتِش دَ ضِدِ یعقُوب دَر گِرِفت
و خَشمِ ازُو دَ ضِد بَنیاِسرائیل اَلَنگه کد.
۲۲چُون اُونا دَ خُدا ایمان نَدَشت
و دَ قُدرتِ نِجاتِ ازُو تَوَکُل نَکد.
۲۳ولے خُداوند دَ آوُر های باله اَمر کد
و درگه ھای آسمو ره واز کد؛
۲۴اُو بَلدِه ازوا «مَن» بارَند تا بُخوره،
اَرے، اُو بَلدِه ازوا غَلّه-و-دانِه آسمانی دَد.
۲۵آدما از نانِ ملایکه ها خورد؛
اُو بَلدِه ازوا خوراکِ پِرَیمو رَیی کد.
۲۶اُو بادِ شَرقی دَ آسمونا رَیی کد
و قد قُوَت خُو بادِ جنُوبی ره باله کد.
۲۷اُو رقمِ گَرد-و-خاک دَ بَلِه ازوا گوشت بارَند،
اَرے، رقمِ ریگِ دریا مُرغَکوی بالدار ره.
۲۸ امُو چِیزا ره دَ مَنِه خَیمه‌گاهِ ازوا بارَند
و دَ چاردَورِ جای های بُود-و-باشِ ازوا.
۲۹اُونا خورد و خُوب سیر شُد،
چُون چِیزی ره که نَفسِ ازوا خاهِش کدُد، خُداوند بَلدِه ازوا دَد.
۳۰لیکِن پیش ازی که اُونا خاهِشِ نَفس خُو ره پُوره کنه
و دَ حالِیکه خوراک هنوز دَ دانِ ازوا بُود،
۳۱قار خُدا دَ ضِدِ ازوا باله اَمَد
و اُو قَوِیتَرِین آدمای ازوا ره کُشت
و جوانای اِسرائیل ره دَ زمی زَد.
۳۲باوجُودِ پگِ امزی کارا، اُونا دَ گُناه های خُو اِدامه دَد
و دَ کارای عجِیبِ ازُو ایمان نَوُرد.
۳۳امزی خاطر، اُو روزای عُمرِ ازوا ره عَبَث تیر کد
و سال های ازوا ره دَ ترس-و-وَحشَت.
۳۴هر وختِیکه خُداوند اُونا ره مُوکُشت، اُونا دَ طلبِ ازُو بُر مُوشُد
و توبه کده قد شَوق-و-علاقه خُدا ره طلب مُوکد.
۳۵اُونا دَ یاد خُو میوُرد که خُدا قاده-و-پناهگاهِ ازوا یَه
و خُدای مُتعال نِجات دِهِندِه ازوا.
۳۶لیکِن دَ حقِیقت اُونا قد دان خُو چاپلُوسی ازُو ره مُوکد
و قد زِبون خُو دَزُو دروغ مُوگُفت.
۳۷دِل های ازوا دَ خُدا راست نَبُود
و اُونا دَ عهدِ ازُو وَفا نَکد.
۳۸ولے خُدا که رحِیم اَسته،
گُناه های ازوا ره پوشَند و اُونا ره نابُود نَکد.
اُو بارها قار خُو ره تاه شَند
و تمامِ غَضَب خُو ره باله نَوُرد.
۳۹دَ یادِ ازُو بُود که اُونا اِنسانِ فانی اَسته،
مِثلِ باد که موره و دِیگه پس نَمییه.
۴۰اُونا چِیقَس کَلو دَ بیابو دَ ضِدِ ازُو شورِش کد
و اُو ره دَ امزُو دَشت غَمگی کد!
۴۱اُونا بار بار خُدا ره آزمایش کد،
و امُو مُقَدَّسِ اسرائیل ره سرِ شور اَوُرد.
۴۲اُونا قُوَتِ ازُو ره دَ یاد خُو نَدَشت
و نَه ام روزی ره که اُونا ره از چنگِ دُشمو خلاصی دَد؛
۴۳که چی رقم مُعجزه های خُو ره دَ مِصر نِشو دَد،
کارای عجِیب خُو ره دَ منطقِه صوعَن.
۴۴اُو دریا های ازوا ره دَ خُون تبدِیل کد،
دَ اندازِه که اُونا نَتنِست از دریاچه های خُو آو وُچی کُنه.
۴۵اُو لشکرِ اوخلَی ره دَ مینکلِ ازوا رَیی کد که اُونا ره برباد کد
و قوقریا ره رَیی کد که اُونا ره تَباه کد.
۴۶اُو کِشتِ ازوا ره دَ مور تسلِیم کد
و حاصِلِ زَحمتِ ازوا ره دَ مَلَخ دَد.
۴۷تاک های انگُورِ ازوا ره دَ وسِیلِه زاله خراب کد
و دِرختای انجِیرِ ازوا ره تَوَسُطِ سَرماه.
۴۸اُو گلّه ھای ازوا ره دَ زاله تسلِیم کد،
چارپایای ازوا ره دَ آتِشَک.
۴۹اُو آتِشِ قار خُو ره دَ بَلِه ازوا رَیی کد،
غَضَب و خَشم و مُصِیبت ره،
دَ وسِیلِه ملایکه های تباه کُنِنده.
۵۰اُو بَلدِه قار خُو یگ راه ره جور کد
و جانِ ازوا ره از مَرگ نِگاه نَکد،
بَلکِه زِندگی ازوا ره دَ مَرَضِ وُبا تسلِیم کد.
۵۱اُو پگِ اوّلباری های مِصر ره زَد،
اوّلِین ثَمرِ قُوَتِ مِصریا ره دَ خَیمه های حام.
۵۲لیکِن قَوم خُو ره رقمِ گوسپندو اَلّی کوچ‌دِلجی کد
و رقمِ یگ رمه دَ بیابو هِدایت کد.
۵۳اُونا ره دَ اَمنیَت رهبری کد تاکه ترس نَخوره؛
لیکِن دریا دُشمنای ازوا ره پوشَند.
۵۴اوخته خُداوند اُونا ره دَ محوطِه مُقَدَّس خُو اَوُرد،
دَ کوهی که قد دِستِ راست خُو تَصَرُف کدُد.
۵۵اُو مِلَّت ها ره از پیشِ رُوی ازوا هَی کد
و میراث ره بَلدِه ازوا قد ریسپو تقسِیم کد
و طایفه های اِسرائیل ره دَ خَیمه ھای ازوا جای-دَ-جای کد.
۵۶لیکِن اُونا خُدای مُتعال ره آزمایش کده دَ ضِدِ ازُو شورِش کد
و فرمان های شی ره نِگاه نَکد؛
۵۷بَلکِه از راه بُر شُد و رقمِ بابه‌کَلونای خُو خیانَت کد
و رقمِ کَمونِ کَج بےاِعتُبار شُد.
۵۸اُونا قد جای های عِبادت خُو قارِ ازُو ره باله اَوُرد؛
و قد بُت ھای خُو غَیرَتِ ازُو ره شور دَد.
۵۹وختِیکه خُدا اِی ره شِنِید، اُو غَضَبناک شُد
و اِسرائیل ره کامِلاً رَد کد.
۶۰اُو جایگاهِ خُو ره که دَ شِیلو بُود، ایله کد،
امُو خَیمِه ره که دَ مینکلِ اِنسان ها ایستَلجی کدُد.
۶۱اُو صندُوقِ عھد خُو ره دَ اسِیری دَد
و نشانی بُزُرگی-و-جلال خُو ره دَ دِستِ دُشمو تسلِیم کد.
۶۲اُو قَوم خُو ره دَ دَمِ شمشیر دَد
و دَ بَلِه میراث خُو غَضَبناک شُد.
۶۳جوانای ازوا ره آتِش قُورت کد
و بَلدِه دُخترونِ ازوا سرُودِ توی خانده نَشُد.
۶۴پیشوایونِ ازوا دَ دَمِ شمشیر اُفتَد
و خاتُونوی بیوِه ازوا سوگواری نَکد.
۶۵اوخته خُداوند باله شُد
رقمِ کسی که از خاو بیدار مُوشه
و رقمِ مُبارِزی که از تاثِیرِ شراب چِیغ مِیزَنه.
۶۶اُو دُشمنای خُو ره وادار دَ عَقَب نِشِینی کد
و اُونا ره دَ رَسوایی اَبَدی گِرِفتار کد.
۶۷اُو اَولادِه یوسُف ره رَد کد
و طایفِه اِفرایم ره اِنتِخاب نَکد،
۶۸لیکِن طایفِه یهُودا ره اِنتِخاب کد،
کوهِ صَھیون ره که دوست دَشت.
۶۹اُو جایگاهِ مُقَدَّس خُو ره رقمِ آسمونای بِلند آباد کد
و رقمِ زمی که بُنیاد شی ره اَبَدی ایشته.
۷۰اُو خِدمتگار خُو داوُود ره اِنتِخاب کد
و اُو ره از قوتونِ گوسپندو گِرِفت؛
۷۱از پسِ میش ھای شِیرتُو، اُو ره اَوُرد
تا قَوم شی یعقُوب ره چوپونی کُنه،
میراثِ ازُو اسرائیل ره.
۷۲و داوُود اُونا ره قد دِل راست چوپونی کد
و قد دِستای لایق رهبری کد.