کِتابِ زِکریا نَبی
فصلِ دَهُم
خُداوند یهُودا و اِفرایم ره بَرکت مِیدیه
۱دَ مَوسُمِ بارِشِ بهاری
از خُداوند بارِش طلب کنِید،
از خُداوندی که آوُرهای طوفانی ره جور مُونه
و دَز شُمو بارِشِ پِرَیمو مِیدیه
و گیاهها ره دَ زمِینِ هر کس سَوزدِلجی مُونه.
۲چُون بُتهای که دَ خانه پرستِش مُوشه تورِه باطِل مُوگیه
و پالگِیرا پالِ دروغ مِینگره؛
خاوهای ره که اُونا بیان مُونه دروغ اَسته
و اُونا تَسَلی بےفایده مِیدیه.
امزی خاطر مردُم رقمِ گوسپندو سرگردو یَه
و از بےچوپونی رَنج مِینگره.
خُداوند مُوگیه:
۳”آتِشِ قار مه دَ ضِدِ چوپونو دَر گِرِفته
و ما امُو بُزهای نَر ره جَزا مِیدیُم؛
چُون ما، خُداوندِ لَشکرها فِکر خُو ره سُون گَلِه خُو، سُون خانَوارِ یهُودا مِیگِیرُم
و اُونا ره رقمِ اَسپِ جنگی باشِکوه بَلدِه خُو جور مُونُم.
۴ازوا سنگِ تادَو،
ازوا میخِ خَیمه،
ازوا کمونِ جنگی،
ازوا جُملِه قومَندانا مییه، اَرے، پگ شی ازوا مییه.
۵اُونا رقمِ مَردای جنگی دَ غَیتِ جنگ
دُشمَنای خُو ره دَ مَنِه گِلِ کوچهها پایمال مُونه؛
اُونا جنگ مُونه، چُون خُداوند قد ازوا اَسته
و اُونا اَسپسوارا ره شرمِنده مُوکُنه.
۶ما خانَوارِ یهُودا ره قَوی مُونُم
و خانَوارِ یوسُف ره نِجات مِیدیُم.
ما اُونا ره پس میرُم، چراکه دَزوا دِلسوز اَستُم
و اُونا رقمی مُوشه که بُگی ما اُونا ره هَی نَکده بُودُم؛
چُون ما خُداوند، خُدای ازوا اَستُم و ما جوابِ دُعای ازوا ره مِیدیُم.
۷اوخته مردُمِ اِفرایم رقمِ مَردای جنگی مُوشه
و دِلهای ازوا خوش مُوشه رقمی که از شراب خوش شُده بَشه.
بچکِیچای ازوا اِی ره دِیده خوشی مُونه
و دِلهای ازوا دَ حُضُورِ خُداوند خوشحالی مُوکُنه.
۸ما اُونا ره کُوی کده جَم مُونُم،
چراکه ما اُونا ره آزاد کدیم؛
تِعدادِ ازوا کَلو مُوشه رقمی که سابِق کَلو بُود.
۹اگرچِه ما اُونا ره دَ مینکلِ مِلَّتها تِیتپَرَک کدیم،
ولے اُونا دَ مَملَکَتهای دُور مَره یاد مُوکُنه
و اُونا قد بچکِیچای خُو زِنده مَنده پس مییه.
۱۰ما اُونا ره از سرزمِینِ مِصر پس میرُم
و از آشُور جم مُونُم؛
ما اُونا ره دَ سرزمِینِ جِلعاد و لِبنان میرُم
و اُونا از بس که کَلو یَه دَ اُونجی جای نَمُوشه.
۱۱اُونا از دریای مُصِیبت تیر مُوشه
و جلپههای امزُو دریا ره مِیزَنه
و تمامِ غَوُجیهای دریای نِیل خُشک مُوشه.
غرُورِ آشُور دَ زمی زَده مُوشه
و تَیاقِ پادشاهی مِصر از بَین موره.
۱۲ما، خُداوند اُونا ره قَوی جور مُونُم
و اُونا دَ نامِ ازمه تَوَکُل کده حَرکت مُونه.“
اِی ره خُداوند مُوگیه.