کِتابِ زِکریا نَبی

فصلِ چاردَهُم

پادشاهی خُداوند دَ اورُشَلیم

۱اینه، روزی مییه که خُداوند تعیِین کده و مال-و-دَولتِ غارَت شُدِه شُمو دَ پیشِ رُوی شُمو تقسِیم مُوشه.

۲چُون خُداوند مُوگیه: ”ما تمامِ مِلَّت‌ها ره دَ خِلافِ اورُشَلیم بَلدِه جنگ جَم مُونُم؛ شار گِرِفته مُوشه، خانه‌ها غارَت مُوشه و خاتُونو بےعِزَت مُوشه؛ نِیمِ شار دَ اسِیری بُرده مُوشه، لیکِن باقی مردُم از شار هَی نَمُوشه.“

۳اوخته خُداوند بُرو مییه و قد امزُو مِلَّت‌ها جنگ مُونه رقمی که دَ روزِ جنگ جنگ مُوکُنه. ۴دَ امزُو روز پایای ازُو دَ بَلِه کوهِ زَیتُونِ که رُوی دَ رُوی اورُشَلیم دَ طرفِ شَرق اَسته ایسته مُوشه و کوهِ زَیتُون از شَرق تا غَرب دُو شَق مُوشه و یگ دَرِّه غَدر کٹه دَ وجُود مییه؛ نِیمِ کوه طرفِ شمال موره و نِیمِ دِیگه شی طرفِ جنُوب. ۵و شُمو سُون دَرِّه که دَ مینکلِ کوه‌ها دَ وجُود اَمَده دُوتا مُونِید، چُون دَرِّه بَینِ کوه‌ها تا آصَل مِیرَسه و شُمو رقمی دُوتا مُونِید که دَ روزای پادشاهی عُزیا پادشاهِ یهُودا از زِلزِله دُوتا کدِید. اوخته خُداوند، خُدای مه مییه و تمامِ مُقَدَّسِین ام قد شی قَتی.

۶دَ امزُو روز نُور از آفتَو گِرِفته مُوشه و ماهتَو و سِتاره‌ها روشَنی نَمِیدیه؛ ۷باوجُودِ ازی دَ اُونجی دَوامدار روز اَسته --اُو ره خُداوند مِیدَنه-- و روز و شاو وجُود نَدره، چُون دَ اُونجی دَ غَیتِ شام ام روشَنی اَسته.

۸دَ امزُو روز آو‌های زِنده از اورُشَلیم جاری مُوشه، نِیم شی طرفِ دریای مُرده و نِیم شی طرفِ دریای مدِیترانه موره؛ اُو تایستو و زِمِستو جاری اَسته.

۹خُداوند دَ بَلِه تمامِ زمی پادشاه مُوشه؛ دَ امزُو روز یگ خُداوند و یگ نام پرَستِش مُوشه.

۱۰تمامِ سرزمی از جِبَع تا رِمّون که طرفِ جنُوبِ اورُشَلیم اَسته دَ اَواری تَبدِیل مُوشه، لیکِن اورُشَلیم دَ بِلندی دَ جای خُو باقی مُومَنه از درگِه بِنیامِین تا منطقِه درگِه اوّل تا درگِه نَوش و از بُرجِ حَنَنئیل تا چرخُشت‌های انگُورِ پادشاه. ۱۱و اورُشَلیم جای بُود-و-باش مُوشه، چُون اُو دِیگه هرگِز محکُوم دَ نابُودی نَمُوشه؛ اَرے، اورُشَلیم اَمنیَتِ کامِل مِیدَشته بَشه.

۱۲تمامِ قَوم‌های که جنگ ره دَ خِلافِ اورُشَلیم دَر مِیدیه، خُداوند اینی بَلا ره دَ بَلِه ازوا میره: گوشتِ ازوا دَ حالِیکه اُونا قد پایای خُو ایسته یَه مِیتَکه، چِیمای ازوا دَ کاسِه خُو پُوچَک مُوشه و زِبونِ ازوا دَ دانِ ازوا رِیشه رِیشه مُوشه. ۱۳دَ امزُو روز وَحشَتِ کٹه از طرفِ خُداوند دَ بَلِه ازوا مییه؛ هر کُدَمِ ازوا دِستِ یگدِیگِه خُو ره مِیگِیره و دِستِ یگ دَ خِلافِ دِیگه باله مُوشه. ۱۴یهُودا ام دَ اورُشَلیم جنگ مُونه و مال-و-دَولتِ تمامِ مِلَّت‌های چارطرف که طِلّا، نُقره و کالاهای غَدر پِرَیمو اَسته، دَ عِنوانِ وُلجه جَم مُوشه. ۱۵و امی رقم یگ بَلا دَ بَلِه اَسپو، قاطِرا، اُشتُرا، اُلاغ‌ها و تمامِ حَیوانای که دَ امزُو خَیمه‌گاه‌ها اَسته مییه.

۱۶اوخته از تمامِ مِلَّت‌های که دَ خِلافِ اورُشَلیم اَمَده پگِ کسای که زِنده مُومَنه هر سال سربَله موره تا پادشاه، یعنی خُداوندِ لَشکرها ره پرَستِش کُنه و عِیدِ خَیمه‌ها ره برگُزار کُنه. ۱۷اگه کُدَم قَومِ زمی سربَله دَ اورُشَلیم بَلدِه پرَستِشِ پادشاه، یعنی خُداوندِ لَشکرها نَرَوه، دَ بَلِه ازوا بارِش نَمُوباره. ۱۸اگه مردُمِ مِصر سربَله نَرَوه و حاضِر نَشُنه، دَ بَلِه ازوا امُو بَلا نازِل مُوشه که خُداوند دَ بَلِه مِلَّت‌های که سربَله نَرَوه و عِیدِ خَیمه‌ها ره برگُزار نَکُنه، نازِل مُونه. ۱۹اینَمی جَزای مِصر و جَزای پگِ مِلَّت‌های اَسته که سربَله نَرَوه و عِیدِ خَیمه‌ها ره برگُزار نَکُنه.

۲۰دَ امزُو روز دَ زَنگوله‌های اَسپ‌ها «مُقَدَّس بَلدِه خُداوند» نوِشته مُوشه و دیگ‌های خانِه خُداوند رقمِ کاسه‌های پیشِ رُوی قُربانگاه مُقَدَّس مُوشه. ۲۱ دَ حقِیقت تمامِ دیگ‌های اورُشَلیم و یهُودا بَلدِه خُداوندِ لَشکرها مُقَدَّس مُوشه تا پگِ کسای که قُربانی مُونه بییه و ازوا بَلدِه پُخته کدونِ گوشتِ قُربانی اِستِفاده کُنه. دَ امزُو زمان دِیگه هیچ سَوداگری دَ خانِه خُداوندِ لَشکرها وجُود نَمِیدَشته بَشه.