۱ د اخاب اویا زامن په سامره کې اوسېدل. نو ییهو د هغه ښار مهمو مامورینو، مشرانو او د اخاب د زامنو ساتونکو ته لیک ورولېږه. په لیک کې هغه داسې لیکلي وو: ۲ «ستاسو ښار قوي دی او د جنګي ګاډیو، اسونو او وسلو سره ستاسو څخه دفاع کیږي. او زه پوهېږم چې د اخاب پاچا زامن ستاسو سره اوسیږي. نو څنګه چې تاسو دغه لیک ولوست، ۳ تاسو د اخاب د زامنو څخه چې تر ټولو ښه وي د پاچا په توګه وټاکئ او بیا د هغه د دفاع دپاره وجنګېږئ.» ۴ هغوی دا لیک ولوست او ډېر ووېرېدل. هغوی یو بل ته وویل: «نه یورام پاچا او نه اخزیا پاچا د هغه په وړاندې مقاومت کړی دی، نو مونږ به یې څنګه وکړو؟» ۵ د ماڼۍ آمر، د ښار ښاروال، نورو مشرانو او د اخاب د زامنو ساتونکو دغه ځواب ییهو ته ورولېږه: «ای اعلیحضرته! مونږ ستاسو خدمتګاران یو او څه چې مونږ ته وایئ مونږ به هماغسې کوو. خو دا زمونږ کار نه دی چې څوک د پاچا په توګه وټاکو. هرڅه چې ستاسو په نظر کې ښه ښکاري، هماغسې وکړئ.» ۶ بیا ییهو یو بل لیک واستاوه چې په هغه کې ویل شوي وو: «که تاسو زما طرفداري او اطاعت کوئ، نو هغه ثابت کړئ. د اخاب د زامنو سرونه ماته راوړئ! او سبا په همدې وخت باید دلته په یزرعیل کې حاضر شئ.» د اخاب پاچا زامن اویا تنه وو چې د ښار د ځینو مهمو خلکو سره اوسېدل او د هغوی روزنه یې کوله. ۷ کله چې د ییهو دوهم لیک راورسېد، هغو مهمو خلکو د اخاب ټول زامن ووژل. بیا یې د هغوی سرونه په ټوکریو کې کېښودل او هغه یې ییهو ته چې په یزرعیل کې ؤ، ولېږل. ۸ کله چې یو استازي ییهو ته خبر ورکړ چې د اخاب د زامنو سرونه یې راوړي دي، هغه وویل: «دا سرونه د ښار په دروازه کې دوه ځایه ډېرۍ کړئ او تر سهاره پورې یې هلته پرېږدئ.» ۹ په سهار کې ییهو دباندې ووت. هغه د ټولو خلکو په مخکې ودرېده او ویې ویل: «ای خلکو، تاسو هېڅ جرم نه دی کړی. هغه زه وم چې د خپل بادار یورام په ضد مې دسیسه جوړه کړه او هغه مې وواژه. خو دا ټول کسان چا ووژل؟ ۱۰ تاسو باید پوه شئ هرڅه چې څښتن د اخاب د اولادې په اړه ویلي وو، هغه سرته رسیږي. څښتن هغه کار وکړ چې وعده یې د خپل نبي الیاس په وسیله کړې وه.» ۱۱ بیا ییهو د اخاب نور خپلوان چې په یزرعیل کې اوسېدل، د هغه لوړ رتبه درباریان، د هغه کاهنان او د هغه ډېر نژدې دوستان ووژل. په یزرعیل کې د اخاب د کورنۍ څخه هېڅوک ژوندی پاتې نه شو.
۱۲ ییهو سامریې ته روان شو او په لاره کې په هغه ځای کې چې شپانه به په کې راټولېدل ۱۳ د یهودا د پاچا اخزیا د خپلوانو سره مخامخ شو. هغه پوښتنه وکړه: «تاسو څوک یئ؟» هغوی ځواب ورکړ: «مونږ د اخزیا خپلوان یو. مونږ د شهزادګانو او د ملکه ایزابل د کورنۍ د لیدلو دپاره روان یو.» ۱۴ ییهو خپلو سړیو ته وویل: «هغوی ژوندي ونیسئ!» نو هغوی یې ونیول او د شپنو د راټولېدلو ځای ته نژدې د کندې غاړې ته یې بوتلل او هغه ټول دوه څلوېښت کسان یې ووژل.
۱۵ څنګه چې ییهو روان شو، د رکاب زوی یهوناداب یې ولیده چې د ده د لیدلو دپاره راروان ؤ. ییهو هغه ته ښه راغلاست ووایه، بیا یې زیاته کړه: «ای یهونادابه، زه ستا طرفداري کوم. ایا ته هم زما طرفداري کوې؟» هغه ځواب ورکړ: «هو، زه یې کوم.» ییهو ځواب ورکړ: «نو خپل لاس دې ماته راکړه» او ییهو ورسره مرسته وکړه او په ګاډۍ کې یې سپور کړ. ۱۶ ییهو وویل: «زما سره راشه او وګوره چې زه څښتن ته څومره وفادار یم.» هغوی دواړه د ییهو په ګاډۍ کې سپاره شول. ۱۷ لکه څنګه چې څښتن د الیاس سره وعده کړې وه، کله چې هغوی سامریې ته ورسېدل، ییهو د اخاب ټول خپلوان ووژل، حتی یو یې هم ژوندی پرېنښود.
۱۸ ییهو د سامرې ټول خلک سره راټول کړل او ورته ویې ویل: «اخاب پاچا د بعل لږ خدمت کاوه، خو زه به د هغه زیات خدمت وکړم. ۱۹ زه غواړم چې هغه ته یوه لویه قرباني وړاندې کړم. نو د هغه ټول نبیان، کاهنان او عبادت کوونکي دلته راټول کړئ. هرڅوک چې رانغی هغه به ووژل شي.» خو دا یو چل ؤ، ییهو په رښتیا سره دا پلان درلود چې د بعل عبادت کوونکي ووژني. ۲۰ هغه وویل: «د بعل دپاره د عبادت ورځ اعلان کړئ!» وروسته له دې چې هغه ورځ اعلان شوه، ۲۱ ییهو د اسراییلو ټول هېواد ته دا خبر ولېږه. د بعل ټول عبادت کوونکي راغلل، یو هم پاتې نه شو او د عبادت ځای له یو سر څخه تر بله سره پورې ډک شو. ۲۲ ییهو د سپېڅلو چپنو مسوول ته امر وکړ: «چپنې راوړه او هغه عبادت کوونکو ته ورکړه.» ۲۳ وروسته ییهو او یهوناداب د عبادت ځای ته ننوتل او ییهو خلکو ته وویل: «شاوخوا ته وګورئ او پام کوئ چې دلته باید یوازې د بعل عبادت کوونکي وي. هغه چاته چې د څښتن عبادت کوي د ننوتلو اجازه مه ورکوئ.» ۲۴ بیا هغوی بعل ته د قربانۍ په وړاندې کولو باندې پیل وکړ.
له مخکې څخه ییهو اتیا سړي له دې خبرداري سره دباندې ودرول: «دا ټول عبادت کوونکي ووژنئ! که چېرې ستاسو څخه چا حتی یو کس هم پرېښود چې وتښتي، نو هغه به د هغه په ځای وژل کیږي!» ۲۵ څنګه چې ییهو د قربانۍ وړاندې کول پای ته ورسول، هغه ساتونکو او منصبدارانو ته وویل: «راننوځي او هغوی ووژنئ! یو هم مه پرېږدئ چې وتښتي.» هغوی د خپلو تورو سره ورننوتل، ټول یې ووژل او د هغوی مړي یې دباندې وغورځول. بیا هغوی د عبادت د ځای دنننۍ کوټې ته ننوتل، ۲۶ د بعل بت یې وویست او هغه یې وسوځاوه. ۲۷ بیا یې هغه ټوټې ټوټې کړ او هغوی د بعل د عبادت ځای بیخي له منځه یووړ. د عبادت ځای یې په تشناب باندې بدل کړ، چې تر نن ورځې پورې پاتې دی.
۲۸ په دې ډول ییهو په اسراییلو کې د بعل عبادت له منځه یووړ. ۲۹ خو هغه ګناه یې بنده نه کړه چې یروبعام پاچا کړې وه، څوک چې د اسراییلیانو د ګناه سبب ګرځېدلی ؤ. هغوی د سرو زرو سخوندرانو د هغو مجسمو عبادت کاوه چې یروبعام په بیت ییل او دان کې ایښې وې. ۳۰ وروسته څښتن وویل: «ای ییهو، تا زما پلان چې د اخاب د کورنۍ په هکله مې درلود، عملي کړ او دا ښه کار دې سرته ورساوه. نو زه ستا سره وعده کوم چې د اسراییلو راتلونکي څلور پاچاهان به ستا د خپلې کورنۍ څخه وي.» ۳۱ خو ییهو د اسراییلو د څښتن خدای د حکمونو څخه د زړه له کومي اطاعت ونه کړ. د هغه په ځای هغه داسې د ګناه څخه ډک کارونه وکړل چې یروبعام کړي وو او د اسراییلیانو د ګناه سبب ګرځېدلی ؤ.
۳۲ په هغو ورځو کې څښتن د اسراییلو د هېواد د ساحې په کوچني کولو پیل وکړ. حزاییل د سوریې پاچا اسراییلو ته ماتې ورکړه. ۳۳ حزاییل د اردن د سیند ختیځې سیمې یعنې د جلعاد او باشان سیمې او د ارنون سیند ته نژدې د عروعیر د ښارګوټي په شمال کې سیمې تر واک لاندې راوستلې. دا هغه سیمې وې چې د جاد، روبین او منسي قبیلې په کې اوسېدلې.
۳۴ نور هغه ټول کارونه چې ییهو کړي دي چې په هغو کې د هغه د زړورتوب کارونه هم شامل دي، د اسراییلو د پاچاهانو د تاریخ په کتاب کې لیکل شوي دي. ۳۵ ییهو مړ او په سامره کې ښخ شو او د هغه زوی یهواخاز د هغه په ځای پاچا شو. ۳۶ ییهو په سامره کې په اسراییلو باندې اته ویشت کاله پاچاهي کړې وه.