۱ څښتن ماته وویل چې تاسو ته دغه ټول قوانین درکوم، ترڅو وکولای شئ په هغې خاورې کې د هغو اطاعت وکړئ چې هغه یې درکوي. تاسو به زر د اردن د سیند څخه تېر شئ او هغه خاوره به ونیسئ. ۲ ترڅو پورې چې تاسو ژوندي یئ، تاسو او ستاسو اولاده باید د خپل څښتن خدای عزت وکړئ او د هغه د ټولو قوانینو اطاعت وکړئ چې زه یې درکوم، ترڅو تاسو په هغه خاوره کې زیات عمر ولرئ. ۳ ای د اسراییلو خلکو، غوږ ونیسئ او په غور سره هغو قوانینو ته غاړه کېږدئ! بیا به ستاسو هر کار سم شي او ستاسو څخه به یو لوی قوم جوړ شي او زمونږ د نیکونو د څښتن خدای د وعدې سره سم به په هغې خاوره کې واوسېږئ چې غني او حاصلخېزه ده.
۴ ای د اسراییلو خلکو، واورئ! یوازېنی خدای چې شتون لري هغه زمونږ څښتن خدای دی. ۵ د زړه له کومي په خپل ټول ځان او قوت سره د خپل څښتن خدای سره مینه کوئ. ۶ دا قوانین چې زه یې نن تاسو ته درکوم، هغه هېڅکله مه هېروئ. ۷ هغه خپلو اولادونو ته ورزده کړئ. که په کور کې یئ یا په لاره روان یئ یا ارام کوئ یا کار کوئ، نو په دې هکله د هغوی سره خبرې کوئ. ۸ هغه ولیکئ او په خپلو مټو او تندیو باندې یې وتړئ چې د هغو په اطاعت کولو کې درسره مرسته وکړي. ۹ دا قوانین د خپلو کورونو د دروازو په چوکاټونو او د خپلو ښارونو په دروازو باندې ولیکئ.
۱۰ څښتن خدای ستاسو د نیکونو یعنې ابراهیم، اسحاق او یعقوب سره وعده کړې وه چې هغه به تاسو ته دا ځمکه درکړي. اوس به هغه تاسو هلته ورولي او تاسو ته به لوی لوی ښارونه چې داسې ښې ودانۍ په کې وي چې تاسو خپله نه دي جوړې کړې، درکړي. ۱۱ کورونه به د ښو ښو شیانو څخه ډک وي چې تاسو په کې نه وي ایښي او څاه ګانې به وي چې تاسو به نه وي کیندلي او د انګورو او د زیتونو باغونه به وي چې تاسو به نه وي کرلي. کله چې څښتن تاسو دې ځمکې ته ورولي او تاسو ته د خوراک دپاره هرڅه درورسیږي، ۱۲ نو پام کوئ چې څښتن هېر نه کړئ چې تاسو یې د مصر څخه چې په کې غلامان وئ، راوویستلئ. ۱۳ د خپل څښتن خدای څخه ووېرېږئ. یوازې د هغه عبادت کوئ او یوازې د هغه په نوم قسم خورئ. ۱۴ نورو خدایانو یعنې د هغو قومونو خدایانو ته عبادت مه کوئ چې ستاسو په شاوخوا کې دي. ۱۵ که چېرې تاسو د نورو خدایانو عبادت وکړئ، د څښتن قهر به د اور په شان درباندې نازل شي او تاسو به د ځمکې د مخ څخه ورک کړي، ځکه ستاسو څښتن خدای چې ستاسو په منځ کې حاضر دی، هغه غیرتي خدای دی.
۱۶ خپل څښتن خدای مه ازمایئ، لکه څنګه چې تاسو په مسا کې وازمایلو. ۱۷ تل په غور سره د هغو ټولو قوانینو اطاعت کوئ چې تاسو ته یې درکړي دي. ۱۸-۱۹ هغه کارونه کوئ چې د څښتن په نظر کې سم او ښه دي، نو ستاسو هر کار به سم شي. بیا به وکولای شئ چې د هغې حاصلخېزې ځمکې ملکیت تر لاسه کړئ، ځکه چې څښتن به ستاسو دښمنان وشړي، لکه څنګه چې هغه ستاسو د نیکونو سره وعده کړې ده.
۲۰ په راتلونکې کې به ستاسو اولادونه پوښتنه وکړي چې زمونږ څښتن خدای ولې په مونږ باندې امر کړی دی چې دغو ټولو قوانینو ته غاړه کېږدو؟ ۲۱ بیا هغوی ته ووایئ: ‹مونږ په مصر کې د فرعون غلامان وو او څښتن په خپل قوي مټ سره ازاد کړو. ۲۲ مونږ په خپلو سترګو ولیدل چې معجزې یې وکړې او په مصریانو او فرعون او د هغه په ټولو درباریانو باندې یې وېروونکي کارونه وکړل. ۲۳ هغه مونږ د مصر څخه ازاد کړو چې دلته مو راولي او دا ځمکه راکړي لکه څنګه چې هغه زمونږ د نیکونو سره وعده کړې وه. ۲۴ بیا زمونږ څښتن خدای په مونږ باندې امر وکړ چې دغو ټولو قوانینو ته غاړه کېږدو او د هغه څخه ووېرېږو. که چېرې مونږ داسې وکړو، نو هغه به تل زمونږ په قوم باندې پام کوي او هغه به نېکمرغه وساتي. ۲۵ که چېرې مونږ په وفادارۍ سره د خدای هر امر ته غاړه کېږدو، هغه به زمونږ څخه خوشحاله شي.›