۱ بيا مالِک خُدائ موسىٰ ته وفرمائيل، ۲ ”د اولنۍ مياشتې په اوله ورځ مالِک خُدائ د حضور خېمه ودروه. ۳ په دې کښې د لوظ صندوق کېږده په کوم کښې چې لس حُکمونه دى او د دې په مخکښې پړده ولګوه. ۴ هغه مېز دننه راوړه او سامان ورباندې کېږده. ډيوټ هم دننه راوړه او ډيوې ورباندې کېږده. ۵ د لوظ صندوق په مخکښې د سرو زرو قربانګاه کېږده کومه چې د سوزېدونکې خوشبويۍ دپاره ده او د خېمې په دروازه باندې پړده ځوړنده کړه. ۶ د خېمې په مخکښې د سوزېدونکې نذرانې قربانګاه کېږده. ۷ د خېمې او قربانګاه په مينځ کښې د وينځلو ښانک کېږده او اوبۀ په کښې واچوه. ۸ ګېرچاپېره پړدې ودروه او د دې په دروازه باندې پړده ځوړنده کړه. ۹ بيا د زيتُونو په تېلو باندې غوړولو سره خېمه او د دې ټول سامان وقف کړه او داسې به دا مقدس شى. ۱۰ ورپسې، د غوړولو د تېلو په ذريعه د سوزېدونکې نذرانې قربانګاه او د دې ټول سامان وقف کړه او قربانګاه به پوره مقدسه شى. ۱۱ د وينځلو ښانک او د دې بېخ هم په داسې طريقه وقف کړه. ۱۲ هارون او د هغۀ زامن د خېمې دروازې ته راوله او هغوئ ته ووايه چې غسل وکړى. ۱۳ هارون ته مقدسې جامې ورواغونده، سر يې په تېلو غوړ کړه او وقف يې کړه، نو هغه به د اِمام په توګه زما خِدمت کوى. ۱۴ د هغۀ زامن راوله او هغوئ ته چُوغې ورواغونده. ۱۵ بيا د هغوئ سر په تېلو غوړ کړه، هم هغه شان چې څنګه دې د هغوئ د پلار سر غوړ کړے وو، نو چې د اِمامانو په توګه زما خِدمت وکړى. دا غوړول به هغوئ د راتلونکى ټولو وختونو دپاره اِمامان جوړ کړى.“ ۱۶ موسىٰ هر څۀ هم هغه شان وکړل چې څنګه مالِک خُدائ حُکم ورکړے وو. ۱۷ چې کله هغوئ د مِصر نه راووتل نو د دوېم کال د اولنۍ مياشتې اوله ورځ وه چې د مالِک خُدائ د حضور خېمه ودرولے شوه. ۱۸ موسىٰ د دې پښې لاندې ولګولې، چوکاټونه يې ودرول، لاړى يې ورسره ولګول او د دې ستنې يې ودرولې. ۱۹ هغۀ په خېمه باندې د پټولو دپاره پړده خوره کړه او دپاسه يې پرې بله پړده هم واچوله، لکه څنګه چې مالِک خُدائ حُکم ورکړے وو. ۲۰ بيا هغۀ د کاڼو دوه تختې واخستلې او د لوظ صندوق کښې يې کېښودلې. هغۀ د صندوق په کَړو کښې بازوګان واچول او د دې د کفارې تخت يې پرې کېښودو. ۲۱ بيا هغۀ صندوق خېمې ته دننه راوړو او پړده يې ځوړنده کړه. نو داسې هغۀ صندوق پټ کړو، هم هغه شان چې څنګه مالِک خُدائ حُکم ورکړے وو. ۲۲ د پړدې نه بهر شمالى طرف ته يې په خېمه کښې مېز کېښودو، ۲۳ او په دې باندې يې مالِک خُدائ ته پېش کړے شوې روټۍ کېښوده، هم هغه شان چې څنګه مالِک خُدائ حُکم ورکړے وو. ۲۴ مېز ته مخامخ، جنوب طرف ته، هغۀ په خېمه کښې ډيوټ کېښودو، ۲۵ او هغۀ هلته د مالِک خُدائ په حضور کښې ډيوې بلې کړې، هم هغه شان چې څنګه مالِک خُدائ حُکم ورکړے وو. ۲۶ پړدې ته مخامخ، هغۀ په خېمه کښې د سرو زرو قربانګاه کېښوده، ۲۷ او هغۀ ورباندې د خوشبويۍ مصالحې وسوزولې، هم هغه شان چې څنګه مالِک خُدائ حُکم ورکړے وو. ۲۸ هغۀ پړده د خېمې په دروازه کښې ځوړنده کړه، ۲۹ او هلته پړدې ته مخامخ هغۀ د سوزېدونکې نذرانې قربانګاه کېښوده. او په هغې باندې يې سوزېدونکې نذرانې او د غلې نذرانې پېش کړې، هم هغه شان چې څنګه مالِک خُدائ حُکم ورکړے وو. ۳۰ هغۀ د وينځلو ښانک د خېمې او قربانګاه په مينځ کښې کېښودو او اوبۀ يې په کښې واچولې. ۳۱ موسىٰ، هارون او د هغۀ زامنو هلته خپل لاسونه او پښې ووينځلې ۳۲ چې کله هغوئ دننه خېمې ته يا قربانګاه ته ورتلل، لکه څنګه چې مالِک خُدائ حُکم ورکړے وو. ۳۳ موسىٰ د خېمې او قربانګاه نه ګېرچاپېره پړدې ودرولې او دربار ته د ننوتلو په دروازه باندې يې پړده ځوړنده کړه. نو موسىٰ ټول کار سر ته ورسولو.
۳۴ بيا وريځې خېمه پټه کړه او خېمه د مالِک خُدائ د حضور جلال نه ډکه شوه. ۳۵ نو په دې وجه موسىٰ خېمې ته دننه نۀ شو تلے. ۳۶ بنى اِسرائيلو صِرف په هغه وخت کښې په بل ځائ کښې کېمپ لګولو چې کله به وريځ د خېمې نه پورته شوه. ۳۷ تر کومې پورې چې به وريځ هلته وه، نو هغوئ به د سفر دپاره خېمې نۀ اوچتولې. ۳۸ چې هغوئ کوم ځائ ته هم سفر کولو نو د ورځې به يې د مالِک خُدائ د حضور وريځ د خېمې دپاسه ليدله او د شپې به يې په وريځو کښې بل شوے اور ليدلو.