د یوشع کتاب
نولسم فصل
هغه ځمکه چې د شمعون قبیلې ته ورکړل شوه
۱ دوهمه پچه د شمعون د قبیلې د طایفو په نوم ووتله. د هغوی سیمه د یهودا په ځمکه کې پرته وه. ۲ په هغې کې دا ځایونه شامل وو: بیرشبع، شبع، مولاده، ۳ حزرشوعال، بالح، عاصم، ۴ التولد، بتول، حرمه، ۵ صقلغ، بیتمرکبوت، حزرسوسه، ۶ بیتلباعوت او شاروحن - د شاوخوا کلیو سره دیارلس ښارونه. ۷ عین، رمون، عاتر او عاشان - د شاوخوا کلیو سره څلور ښارونه. ۸ په دې سیمه کې په جنوب کې تر بعلتبییر یعنې جنوبي رامه پورې ټول ښارونه او کلي شامل وو. دا هغه ځمکه وه چې د شمعون د قبیلې طایفو د خپل ملکیت په توګه ترلاسه کړه. ۹ څرنګه چې د یهودا برخه د هغوی د اړتیا له اندازې څخه زیاته وه، نو د هغه د سیمې یوه برخه د شمعون قبیلې ته ورکړل شوه.
هغه ځمکه چې د زبولون قبیلې ته ورکړل شوه
۱۰ درېمه پچه د زبولون د قبیلې د طایفو په نوم ووتله. هغه ځمکه چې هغوی ترلاسه کړه د سارید پورې رسېدله. ۱۱ دا سرحد د هغه ځای څخه په لوېدیځه خوا کې مرعله ته تللی او د دباشه پورې رسېدلی او یقنعام ته نژدې ویالې ته تللی دی. ۱۲ دا سرحد د سارید ختیځې خواته د کسلوتتابور د سیمې پولې ته ګرځېدلی او دابره ته راوتلی او پورته تر یافیع پورې رسېدلی دی. ۱۳ بیا دا سرحد د ختیځ خواته د جتحافر او عتقاصین ته تللی، رمون ته راوتلی او د نیعه خواته ګرځېدلی دی. ۱۴ په شمال کې دا سرحد د حناتون خواته ګرځېدلی او د یفتحییل په دره کې ختم شوی دی. ۱۵ زبولون د شاوخوا کلیو سره دولس ښارونه درلودل. د هغو څخه ځینې یې دا وو: قطه، نهلال، شمرون، یداله او بیتلحم. ۱۶ دا ښارونه او د هغو کلي په هغې ځمکه کې وو چې د زبولون د قبیلې طایفو د خپل ملکیت په توګه ترلاسه کړه.
هغه ځمکه چې د یساکار قبیلې ته ورکړل شوه
۱۷ څلورمه پچه د یساکار د قبیلې د طایفو په نوم ووتله. ۱۸ د هغوی په سیمه کې دا ځایونه شامل وو: یزرعیل، کسلوت، شونم، ۱۹ حفارایم، شییون، اناحره، ۲۰ ربیت، قشیون، آبص، ۲۱ رمه، عینجنیم، عینحده او بیتفسیس. ۲۲ او دا سرحد د تابور غره، شحصیمه او بیتشمس ته رسېدلی او د اردن د سیند سره ختم شوی دی. په هغه کې شپاړس ښارونه د هغو د شاوخوا کلیو سره شامل وو. ۲۳ دا ښارونه او د هغو کلي په هغې ځمکه کې وو چې د یساکار د قبیلې طایفو د خپل ملکیت په توګه ترلاسه کړه.
هغه ځمکه چې د اشیر قبیلې ته ورکړل شوه
۲۴ پنځمه پچه د اشیر د قبیلې د طایفو په نوم ووتله. ۲۵ د هغوی په سیمه کې دا ځایونه شامل وو: حلقات، حلي، باطن، اکشاف، ۲۶ الملک، عمعاد او مشال. په لوېدیځ کې دا سرحد کرمل او شیحورلبنه ته رسېده. ۲۷ بیا د هغه ځای څخه ختیځې خواته بیتداجون ته ګرځېدلی، د زبولون او د یفتحییل تر درې پورې رسېدلی دی او په شمال کې بیتعامق او نعيییل ته راوتلی دی. دا سرحد د شمال خواته د کابول، ۲۸ عبرون، رحوب، حمون، قانه او تر لوی صیدون پورې غزېدلی دی. ۲۹ دا سرحد بیا رامه ته ګرځېدلی او د صور قوي دېوال لرونکي ښار ته رسېدلی دی. بیا هغه حوسه ته ګرځېدلی او د مدیترانې په بحیره کې ختم شوی دی. په دې سیمه کې محالاب، اکزیب، ۳۰ عمه، عفیق او رحوب شامل وو. د شاوخوا کلیو سره دوه ویشت ښارونه وو. ۳۱ دا ښارونه او د هغو کلي په هغې ځمکه کې وو چې د اشیر د قبیلې طایفو د خپل ملکیت په توګه ترلاسه کړه.
هغه ځمکه چې د نفتالي قبیلې ته ورکړل شوه
۳۲ شپږمه پچه د نفتالي د قبیلې د طایفو په نوم ووتله: ۳۳ د هغوی سرحد د حالف او په صعنیم کې د څېړۍ د ونې څخه تېر شوی او د اداميناقب او یبنییل څخه تر لقوم پورې رسېده او د اردن د سیند سره ختم شوی ؤ. ۳۴ په هغه ځای کې دا سرحد لوېدیځې خواته د ازنوتتابور په لور ګرځېدلی او په حقوق کې راوتلی دی. هغه په جنوب کې د زبولون سیمې ته، په لوېدیځ کې د اشیر سیمې ته او په ختیځ کې د اردن سیند ته رسېدلی دی. ۳۵ هغه قوي دېوال لرونکي ښارونه دا وو: صدیم، صیر، حمت، رقت، کنارت، ۳۶ ادامه، رامه، حاصور، ۳۷ قادش، ادرعي، عینحاصور، ۳۸ یرون، مجدلییل، حوریم، بیتعناه او بیتشمس. د شاوخوا کلیو سره نولس ښارونه وو. ۳۹ دا ښارونه او د هغو کلي په هغې ځمکه کې وو چې د نفتالي د قبیلې طایفو د خپل ملکیت په توګه ترلاسه کړه.
هغه ځمکه چې د دان قبیلې ته ورکړل شوه
۴۰ اوومه پچه د دان د قبیلې د طایفو په نوم ووتله. ۴۱ د هغوی په سیمه کې دا ځایونه شامل وو: زرعه، اشتاول، عیرشمس، ۴۲ شعلبین، ایالون، یتله، ۴۳ ایلون، تمنه، عقرون، ۴۴ التقي، جبتون، بعله، ۴۵ یهود، بنيبرق، جترمون، ۴۶ میاهیرقون او رقون د هغې سیمې سره چې یافا ته مخامخ وه.
۴۷-۴۸ د دان طایفو دا خاوره او دا ښارونه د هغو د شاوخوا کلیو سره د خپل ملکیت په توګه ترلاسه کړل. څه موده وروسته کله چې دښمنانو هغوی مجبور کړل چې خپله قبیلوي خاوره پرېږدي، نو هغوی د لشم ښار ته لاړل. په ښار باندې یې حمله وکړه، هغه یې ونیوه او د هغه ځای اوسېدونکي یې ووژل. بیا هغوی خپله هلته ځای په ځای شول، د هغه ښار نوم یې بدل کړ او د خپل نیکه دان په نوم یې یاد کړ.
د یوشع ځمکه
۴۹ کله چې د اسراییلو قوم د ځمکې د وېشلو څخه وزګار شو، هغوی د نون زوی یوشع ته د ځمکې یوه برخه ورکړه چې د هغه شي. ۵۰ څنګه چې څښتن حکم کړی ؤ، هغوی یوشع ته هغه ښار ورکړ چې هغه غوښتی ؤ، یعنې تمنهسارح چې د افرایم په غرنۍ سیمه کې ؤ. هغه دا ښار بیا ودان کړ او هلته ځای په ځای شو.
۵۱ دا هغه سیمې وې چې العازار کاهن، یوشع او د اسراییلو د قبیلو د طایفو مشرانو په شیلوه کې د پچې له مخې ووېشلې. هغوی دا کار د څښتن په حضور کې د سپېڅلې خېمې په دروازه کې وکړ. په دې ډول هغوی د ځمکې وېش سرته ورساوه.