۱ آکوب هما سرڈگارا جَهمنند بوت که آییئے پتا اۆدا دَرامدێئے پئیما زِند گوازێنتگ‌اَت، بزان کَنهانئے مُلکا. ۲ آکوبئے نَسل و پَدرێچئے کِسّه چُش اِنت:
ایسُّپ هَبده سالی وَرناے اَت و وتی براتانی همراهیا رَمَگیَ چارێنت، وتی ماتۆ بِلَّه و زِلپَهئے مردێن‌چُکّانی همراهیا. ایسُّپا وتی براتانی رَدێن کارانی بارئوا پت هالَ دات. ۳ اِسراییلا ایسُّپ چه وتی آ دگه سجّهێن چُکّان دۆست‌تر اَت، چێا که ایسُّپ آییئے پیرانسَریئے چُکّ اَت. په ایسُّپا سکّێن ڈئولدارێن کَباهے اَڈّی کناێنت. ۴ وهدے براتان دیست که پتا ایسُّپ چه ما دۆست‌تر اِنت، چه ایسُّپا نَپرتِش کرت و گۆن آییا مُدام زهرا زهر هبرِشَ کرت.
۵ ایسُّپا وابے دیست و وهدے وتی براتی هال داتنت، آییئے براتان چه ایسُّپا گێشتر نپرت کرت. ۶ ایسُّپا گۆن آیان گوَشت: ”گۆش دارێت! من وتی دیستگێن وابا شمارا گوَشان. ۷ ما ڈگارئے سرا گَندم لۆٹُک کنگا اَتێن که یکبرا منی لۆٹُک پاد آتک و اۆشتات. همے دمانا شمئے لۆٹُک، منی لۆٹُکئے چَپّ و چاگردا مُچّ بوتنت و آاِش سُجده کرت.“ ۸ ایسُّپئے براتان گوَشت: ”تئو مئے سرا بادشاهی کنگَ لۆٹئے؟ هَکّ و دل مئے سرا هاکمیَ کنئے؟“ایسُّپئے براتان، آییئے واب و هبرانی سئوَبا چه آییا گێشتر نپرت کرت.
۹ ایسُّپا دگه وابے دیست و وتی براتی هال داتنت. گوَشتی: ”گۆش دارێت. من دگه وابے دیستگ. اے رندی، رۆچ و ماه و یازده اِستار منا سُجده کنگا اَت.“ ۱۰ وهدے وتی پت و براتی هال داتنت، پتا ایسُّپ هکّل کرت و گوَشت: ”اے چۆنێن وابے تئو دیستگ؟ من و تئیی مات و تئیی برات بیاێن و ترا سجده بکنێن؟“
۱۱ برات گۆن ایسُّپا هَسَدّیگ اَتنت، بله پتئے هئیال مُدام گۆن ایسُّپئے واب و هبران اَت.
۱۲ ایسُّپئے براتان پتئے رمگ په چارێنگا شِکێمئے نزّیکّا برتگ‌اَت. ۱۳ اِسراییلا گۆن ایسُّپا گوَشت: ”تئو زانئے که تئیی برات رمگئے چارێنگا شِکێما شتگ‌اَنت. وتا گیشّێن و آیانی کِرّا برئو.“ایسُّپا گوَشت: ”شَرّ اِنت.“ ۱۴ اِسراییلا گوَشت: ”برئو و بچار تئیی برات و رمگ دْراه و سلامت اَنت؟ آیانی هالا گِر و بیا.“گڑا ایسُّپی چه هِبرونئے دَرَگا راه دات. لۆگِش همۆدا اَت.
وهدے ایسُّپ شِکێما سر بوت، ۱۵ گۆن یکّ مردێا دُچار کپت. مَردا دیست که ایسُّپ گیابانا سرگردان اِنت، جُستی کرت: ”تئو چے شۆهاز کنگا ائے؟“ ۱۶ ایسُّپا گوَشت: ”وتی براتان. تئو زانئے رَمگا کُجا چارێنگا اَنت؟“ ۱۷ مردا پَسّئو دات: ”چه اِدا شتگ‌اَنت. من اِشکت، آ گوَشگا اَتنت: ’دۆتانا برئوێن.‘“گڑا ایسُّپ هما نێمگا دێم په براتان شت. دۆتانا دری گێتکنت.
۱۸ براتان ایسُّپ چه دورا دیست و آییئے سر بئیگا پێسر په آییئے کُشَگا پَندَلے سازِتِش. ۱۹ وت‌مان‌وتا گوَشتِش: ”بچارێت، وابانی واجه پێداک اِنت. ۲۰ بیاێت نون کُشێن و چه اے چاتان یکّێا دئوریَ دئیێن، گوَشێن رسترێا وارتگ. گڑا چارێن که چه آییئے وابان چے درَ کئیت.“
۲۱ بله وهدے روبِنا اے هبر اِشکت، جُهدی کرت که ایسُّپا چه آیانی دستا برَکّێنیت. گوَشتی: ”اِنّه، ایسُّپئے ساها نگرێن. ۲۲ هۆن مَرێچێت. همے گیابانا، اے چاتا دئوریَ دئیێن، بله نکُشێنی.“روبِنا اے هبر پمێشکا گوَشت که ایسُّپا برَکّێنیت و گۆن وت بزوریت و پتئے کِرّا ببارت.
۲۳ وهدے ایسُّپ براتانی کرّا سر بوت، آییئے گوَرئے کَباه، هما ڈئولدارێن کباهِش در کرت و ۲۴ ایسُّپِش گِپت و چاتا دئور دات. چاتا آپ مان نێست‌اَت، کۆرچاتے اَت. ۲۵ برات نانئے ورگا نِشتنت. چَمِّش که چست کرتنت، دیستِش اِسماێلیانی کاروانے چه گِلیادا پێداک اِنت. آیان وتی اُشتران سُسُرّ و بام و وَشبۆ لَڈّتگ‌اَت و مِسرا برگا اَتنت.
۲۶ یَهودایا گۆن وتی براتان گوَشت: ”مارا چه وتی براتئے کُشگ و آییئے هۆنئے چێر دئیگا چِه پائِدگے رسیت؟ ۲۷ بیاێت، ایسُّپا اِسماێلیانی کِرّا بها کنێن. آییئے جندا نکُشێن. مئے برات اِنت. مئے وتی هَڈّ و هۆن اِنت.“براتان منِّت. ۲۸ وهدے میدیانی سئوداگر نزّیکّا رَستنت، براتان ایسُّپ چه چاتا کشِّت و بیست نُگرها اِسماێلیانی کرّا بها کرت. اِسماێلیان ایسُّپ مِسرا برت.
۲۹ وهدے روبِن پِر تَرِّت و چاتئے کِرّا آتک و ایسُّپی اۆدا ندیست، وتی گُدی دِرتنت. ۳۰ وتی براتانی کرّا شت و گوَشتی: ”بچکّ اۆدا نه‌اِنت. نزانان چے بکنان.“ ۳۱ گڑا پَسے هلارِش کرت، ایسُّپئے کباهِش زرت و پَسئے هۆنان جَت. ۳۲ نون ایسُّپئے ڈئولدارێن کباهِش پتئے کِرّا برت و گوَشتِش: ”ما اے چِتگ. بچاری، بارێن تئیی چُکّئے کَباه نه‌اِنت؟“ ۳۳ آکوبا کباه پَجّاه آورت، گوَشتی: ”اے منی چُکّئے کباه اِنت. چُکّ رسترێا وارتگ. اَلّما ایسُّپ ٹُکّر ٹُکّر بوتگ.“
۳۴ گڑا آکوبا وتی گُد دِرتنت و گۆنیێن گُد گوَرا کرت و تان بازێن رۆچێا وتی چُکّئے پُرسا نِشت. ۳۵ آکوبئے سجّهێن بَچّ و جنکّ په آییئے تَسَلّا دئیگا آتکنت، بله آ تَسَلّا نبوت. گوَشتی: ”من پُرسیگا پُرسیگ مُردَگانی جهانا، وتی چُکّئے کِرّا جَهلادَ رئوان.“و پت مُدام په ایسُّپا گرێوَگا اَت.
۳۶ و آ نێمگا میدیانیان مِسرا ایسُّپ پوتیپارئے کِرّا بها کرت. پوتیپار، پِرئونئے اَپسرے اَت. نِگهپانانی مستر اَت.