۱دَ سالِ بِیست و هفتُمِ پادشاهی یرُبعامِ پادشاهِ اِسرائیل، عَزَریا باچِه اَمَصیا پادشاهِ یهُودا شُد. ۲اُو شوزده ساله بُود که پادشاه شُد و پِنجاه و دُو سال دَ اورُشَلیم پادشاهی کد. آبِه شی یکُلیا نام دَشت و از اورُشَلیم بُود. ۳اُو چِیزای ره که دَ نظرِ خُداوند دُرُست بُود انجام دَد، امُو رقم که آتِه شی اَمَصیا انجام دَدُد. ۴لیکِن عِبادت‌گاه های جای‌های بِلند از بَین بُرده نَشُد و مردُم هنوز ام دَ جای‌های بِلند قُربانی تقدِیم مُوکد و بُخورِ خوشبُوی مُوسوختَند. ۵خُداوند عَزَریا ره دَ مَرَضِ کولی گِرِفتار کد و اُو تا روزی مُردون خُو کولی گِرِفته بُود و دَ یگ خانِه جدا زِندگی مُوکد. یوتام باچِه پادشاه مسئُولِ قصر شی بُود و مردُمِ سرزمِین یهُودا ره اِداره مُوکد. ۶باقی کارای عَزَریا و چِیزای که کد، دَ کِتابِ تَوارِیخِ پادشایونِ یهُودا نوِشته یَه. ۷وختی عَزَریا فَوت کده قد بابه‌کَلونای خُو خاو کد و دَ مینکلِ بابه‌کَلونای خُو دَ شارِ داوُود دَفن شُد، باچِه شی یوتام دَ جای ازُو پادشاه شُد.
۸دَ سالِ سی و هشتُمِ پادشاهی عَزَریا پادشاهِ یهُودا، زِکریا باچِه یرُبعام دَ سامِره پادشاهِ اِسرائیل شُد و شَش ماه پادشاهی کد. ۹اُو چِیزای ره که دَ نظرِ خُداوند بَد بُود انجام دَد، امُو رقم که بابه‌کَلونای شی انجام دَدُد؛ اُو از گُناه های یرُبعام باچِه نِباط که باعِث شُد اِسرائیل گُناه کنه، ام دُوری نَکد. ۱۰پس شَلّوم باچِه یابیشِ دَ خِلافِ ازُو شورِش کد و اُو ره دَ پیشِ رُوی مردُم زَده کُشت و خود شی دَ جای ازُو پادشاه شُد. ۱۱باقی کارای زِکریا دَ کِتابِ تَوارِیخِ پادشایونِ اِسرائیل نوِشته یَه. ۱۲اینی کلامِ خُداوند بُود که دَ ییهُو گُفتُد: ”اَولادِه تُو تا پُشتِ چارُم دَ تَختِ اِسرائیل مِیشِینه.“ و امُو رقم شُد.
۱۳دَ سالِ سی و نُھُمِ پادشاهی عُزیا پادشاهِ یهُودا، شَلّوم باچِه یابیش پادشاه شُد و یگ ماه دَ سامِره پادشاهی کد. ۱۴دَ امزُو غَیت مِنَحیم باچِه جادی از تِرصه حَرکت کده دَ سامِره اَمَد و شَلّوم باچِه یابیش ره دَ سامِره زَده کُشت و خود شی دَ جای ازُو پادشاه شُد. ۱۵باقی کارای شَلّوم و شورِشی که کد، دَ کِتابِ تَوارِیخِ پادشایونِ اِسرائیل نوِشته یَه. ۱۶بعد ازُو مِنَحیم که از تِرصه اَمدُد شارِ تِفسَح و هر چِیزی ره که دَ مَنِه ازُو بُود و گِرد-و-بَر شی ره زَده تَباه کد و کورِه خاتُونوی شِکامتُو ره چَک کد، چراکه مردُمِ تِفسَح درگه های شار ره بَلدِه شی واز نَکدُد.
۱۷دَ سالِ سی و نُھُمِ پادشاهی عَزَریا پادشاهِ یهُودا، مِنَحیم باچِه جادی پادشاهِ اِسرائیل شُد و دَه سال دَ سامِره پادشاهی کد. ۱۸اُو چِیزای ره که دَ نظرِ خُداوند بَد بُود انجام دَد و از گُناه های یرُبعام باچِه نِباط که باعِث شُد اِسرائیل گُناه کنه، دُوری نَکد. ۱۹دَ امزُو زمان فُول پادشاهِ آشُور دَ سرزمِینِ اِسرائیل هُجُوم اَوُرد، لیکِن مِنَحیم بَلدِه فُول یگ هزار وَزنه نُقره دَد تا فُول دِست خُو ره قد ازُو یگ کنه و پادشاهی دَ دِست مِنَحیم مُستَحکم باقی بُمنه. ۲۰مِنَحیم امی پَیسه ره از مردُمِ اِسرائیل دَ زور گِرِفت، یعنی از پگِ آدمای ثُروَتمَند، از هر کُدَم شی پِنجاه مِثقال نُقره گِرِفته دَ پادشاهِ آشُور دَد؛ امزی خاطر پادشاهِ آشُور پس رفت و دَ سرزمِینِ ازوا نَشِشت. ۲۱باقی کارای مِنَحیم و چِیزای که کد دَ کِتابِ تَوارِیخِ پادشایونِ اِسرائیل نوِشته یَه. ۲۲وختی مِنَحیم فَوت کده قد بابه‌کَلونای خُو خاو کد، باچِه شی پِقَحیا دَ جای ازُو پادشاه شُد.
۲۳دَ سالِ پِنجاهُمِ پادشاهی عَزَریا پادشاهِ یهُودا، پِقَحیا باچِه مِنَحیم دَ سامِره پادشاهِ اِسرائیل شُد و دُو سال حُکمرانی کد. ۲۴اُو چِیزای ره که دَ نظرِ خُداوند بَد بُود انجام دَد و از گُناه های یرُبعام باچِه نِباط که باعِث شُد اِسرائیل گُناه کنه، دُوری نَکد. ۲۵پس پِقَح باچِه رِمَلیا که یکی از قومَندانای پِقَحیا بُود، پِنجاه نفر از مردُمای جِلعاد ره قد خُو گِرِفته دَ خِلافِ پِقَحیا نَقشه کشِید و اُو ره قد اَرجوب و اَریه دَ بُرجِ قصرِ پادشاهی زَده کُشت و خود شی دَ جای ازُو پادشاه شُد. ۲۶باقی کارای پِقَحیا و هر چِیزی که کد، دَ کِتابِ تَوارِیخِ پادشایونِ اِسرائیل نوِشته یَه.
۲۷دَ سالِ پِنجاه و دوّمِ پادشاهی عَزَریا پادشاهِ یهُودا، پِقَح باچِه رِمَلیا دَ سامِره پادشاهِ اِسرائیل شُد و بِیست سال حُکمرانی کد. ۲۸اُو چِیزای ره که دَ نظرِ خُداوند بَد بُود انجام دَد و از گُناه های یرُبعام باچِه نِباط که باعِث شُد اِسرائیل گُناه کنه، دُوری نَکد.
۲۹دَ دَورونی که پِقَح پادشاهِ اِسرائیل بُود، تِغلَت-فِلاسر پادشاهِ آشُور اَمَده عِیون، آبِلِ-بَیت-مَعکه، یانوَح، قادِش، حاصور، جِلعاد، جلِیلیه و تمامِ سرزمِینِ نَفتالی ره گِرِفت و مردُمای شی ره اسِیر کده دَ آشُور بُرد. ۳۰دَ سالِ بِیستُمِ پادشاهی یوتام باچِه عُزیا، هوشِعَ باچِه ایله دَ خِلافِ پِقَح باچِه رِمَلیا نَقشه کشِید و اُو ره زَده کُشت و خود شی دَ جای ازُو پادشاه شُد. ۳۱باقی کارای پِقَح و چِیزای که کد، دَ کِتابِ تَوارِیخِ پادشایونِ اِسرائیل نوِشته یَه.
۳۲دَ سالِ دوّمِ پادشاهی پِقَح باچِه رِمَلیا پادشاهِ اِسرائیل، یوتام باچِه عُزیا پادشاهِ یهُودا شُد. ۳۳اُو بِیست و پَنج ساله بُود که پادشاه شُد و شوزده سال دَ اورُشَلیم پادشاهی کد. آبِه شی یرُوشه نام دَشت و دُخترِ صادوق بُود. ۳۴اُو چِیزای ره که دَ نظرِ خُداوند دُرُست بُود انجام دَد و مُطابِقِ تمامِ چِیزای که آتِه شی عُزیا کدُد، رفتار کد. ۳۵لیکِن عِبادت‌گاه های جای‌های بِلند از بَین بُرده نَشُد و مردُم هنوز ام دَ جای‌های بِلند قُربانی تقدِیم مُوکد و بُخورِ خوشبُوی مُوسوختَند. یوتام کسی بُود که درگِه بَلنِه خانِه خُداوند ره جور کد. ۳۶باقی کارای یوتام و چِیزای که کد، دَ کِتابِ تَوارِیخِ پادشایونِ یهُودا نوِشته یَه. ۳۷دَ امزُو روزا خُداوند رَیی کدونِ رِصِین پادشاهِ ارام و پِقَح باچِه رِمَلیا ره دَ خِلافِ یهُودا شُروع کد. ۳۸وختی یوتام فَوت کده قد بابه‌کَلونای خُو خاو کد و دَ شارِ بابه‌کَلون خُو داوُود، دَ مینکلِ بابه‌کَلونای خُو دَفن شُد، باچِه شی آحاز دَ جای ازُو پادشاه شُد.