۱وختی اِیشبوشِت باچِه شائول شِنِید که اَبنیر دَ حِبرون کُشته شُده، دِست-و-پای شی سُست شُد و تمامِ اِسرائیل دَ وَحشَت اُفتَد. ۲باچِه شائول دُو نفر دَشت که اُونا قومَندانای دِستِه تعرُضی بُود؛ نامِ یگِ ازوا بَعنه بُود و نامِ دِیگِه شی ریکاب. اُونا باچه های رِمّونِ بِئیروتی از اَولادِه بِنیامِین بُود، چُون بِئیروت دَ جمِ بِنیامِین حِساب مُوشُد؛ ۳لیکِن بئیروتیا دُوتا کده دَ جِتایم رفتُد و تا اِمروز دَ اُونجی دَ عِنوانِ بیگَنه زِندگی مُونه.
۴یوناتان باچِه شائول یگ باچه دَشت که از ھر دُو پای خُو شَل بُود. اُو پَنج ساله بُود که خبرِ کُشته شُدونِ شائول و یوناتان از یِزرعیل رسِید. اوخته دایِه شی اُو ره دَ بَغل خُو گِرِفته دُوتا کد، مگم دَ غَیتِیکه دَ عَجَله دُوتا مُوکد، اُو از بَغل شی اُفتَد و شَل شُد؛ نامِ امزُو باچه مِفِیبوشِت بُود.
۵ یگ روز ریکاب و بَعنه باچه‌های رِمّون بئیروتی رفته دَ غَیتِ گرمی روز دَ خانِه اِیشبوشِت داخِل شُد و اُو دَ خاوِ چاشتی بُود. ۶اُونا دَ بانِه ازی که گندُم مِیگِیره دَ مَنِه خانه داخِل شُد و قد شمشیر دَ کَورِه اِیشبوشِت زَد؛ بعد ازُو ریکاب و بِرار شی بَعنه دُوتا کد.
۷ اَرے، وختِیکه اُونا دَ خانه داخِل شُد اِیشبوشِت دَ اُتاقِ خاو خُو دَ بَلِه چارپایی خاو بُود؛ اوخته اُونا اُو ره زَده کُشت و سر شی ره از تَن شی جدا کد. بعد ازُو سر شی ره گِرِفته تمامِ شاو از راهِ عَرَبه سَفر کد ۸و سرِ اِیشبوشِت ره دَ پیشِ داوُود دَ حِبرون اَوُرده دَ پادشاه گُفت: ”اینه، سرِ اِیشبوشِت باچِه شائول دُشمون تُو که قَصدِ گِرِفتونِ جان تُو ره دَشت. خُداوند اِمروز اِنتِقامِ بادار مو پادشاه ره از شائول و اَولادِه شی گِرِفت.“
۹لیکِن داوُود دَ جوابِ ریکاب و بِرار شی بَعنه باچه های رِمّونِ بئیروتی گُفت: ”قَسم دَ زِندگی خُداوند که جان مَره از هر مُصِیبت-و-بَدبَختی خلاص کده، ۱۰وختی کسی که دَز مه خبر دَده گُفت، ’اونه، شائول مُرده،‘ و فِکر کد که خبرِ خوش اَوُرده، ما اُو ره دِستگِیر کدُم و دَ صِقلَگ کُشتُم. امی جایزِه بُود که بَلدِه خبر شی دَزُو دَدُم. ۱۱پس چِیقس کَلوتر بَشه جایزِه مَردای شرِیر که یگ آدمِ نیک ره دَ خانِه شی دَ بَلِه جاگِه شی کُشته بَشه! و آلی آیا خُونِ ازُو ره از شُمو بازخاست نَکنُم و شُمو ره از رُوی زمی نابُود نَکنُم؟“ ۱۲اوخته داوُود دَ مَردای جوان اَمر کد و اُونا امُو دُو ره کُشت؛ اُونا دِست و پای ازوا ره مُنٹی کد و جَسَدای ازوا ره دَ پالُوی نَوُرِ حِبرون اَوزو کد. لیکِن سرِ اِیشبوشِت ره گِرِفته دَ قبرِ اَبنیر دَ حِبرون دَفن کد.