۱وختِیکه اُونا از شارای اَمفِیپولِس و آپولّونیا تیر شُد اُونا دَ شارِ تِسالونِیکی رسِید که یگ عِبادت خانِه یهُودیا دَ اُونجی بُود. ۲پولُس مُطابِقِ عادت خُو دَ عِبادت خانه رفت و دَ سِه روزِ آرام قد ازوا از کِتابِ مُقَدَّس بَحث و گُفتُگو کد ۳و تشریح کده دلِیل میاَوُرد که لازِم بُود مسیح رَنج بِنگره و از مُرده ها دُوباره زِنده شُنه و ام مُوگُفت: ”امی عیسیٰ ره که ما دَز شُمو اِعلان مُونُم، امُو مسیحِ وعده شُده اَسته.“ ۴بعضی از یهُودیا قانِع شُده قد پولُس و سِیلاس یگجای شُد، امچُنان گروهِ کٹِه یونانیای خُدا پرَست و تِعدادِ کَلونِ خاتُونوی نامدار. ۵مگم یهُودیا کَلو بَخِیلی شی اَمَد. پس اُونا یگ تِعداد آدمای ایله گشت ره از کوچه-و-بازار جَم کده یگ گروه جور کد و شار ره دَ شورِش اَوُرد و دَ خانِه یاسون حَمله کد تا پولُس و سِیلاس ره دَ پیشِ مردُم بیره. ۶وختِیکه اُونا ره پَیدا نَتنِست، اُونا یاسون و یگ تِعداد از بِرارای ایماندار ره دَ پیشِ حاکِمای شار بُرد و چِیغ زَده گُفت: ”امی کسای که پگِ دُنیا ره گڈوَڈ کده، آلی دَ اِینجی اَمَده ۷و یاسون اُونا ره دَ خانِه خُو جای دَده. اُونا پگ شی دَ خِلافِ حُکمِ قَیصر رفتار مُونه و مُوگه که یگ پادشاهِ دِیگه دَ نامِ عیسیٰ وجُود دَره.“ ۸پس مردُم و حاکِمای شار از شِنِیدونِ ازی خبر سخت دَ تَشوِیش شُد. ۹مگم از یاسون و دِیگرو ضمانَت گِرِفته، اُونا ره ایله کد.
۱۰امی که هَوا ترِیک شُد بِرارای ایماندار، پولُس و سِیلاس ره دَ شارِ بیریه رَیی کد. اُونا وختِیکه دَ اُونجی رسِید دَ عِبادت خانِه یهُودیا رفت. ۱۱یهُودیای بیریه از یهُودیای تِسالونِیکی کده فِکر شی روشوتَر بُود، چُون اُونا پَیغامِ پولُس و سِیلاس ره دَ شَوقِ کَلو قبُول کد و هر روز کِتابِ مُقَدَّس ره میخاند تا بِنگره چِیزای ره که پولُس گُفته، راست اَسته یا نَه. ۱۲امی رقم غَدرِ ازوا ایمان اَوُرد؛ امچُنان تِعدادِ کَلونِ خاتُونوی نامدارِ یونانی و مَردای یونانی. ۱۳مگم وختِیکه یهُودیای تِسالونِیکی فامِید که پولُس دَ بیریه کلامِ خُدا ره اِعلان مُونه، اُونا دَ اُونجی ام اَمَده مردُم ره دَ شورِش اَوُرد. ۱۴پس بِرارای ایماندار دِستی پولُس ره سُون لبِ دریا رَیی کد، مگم سِیلاس و تِیموتائوس دَ بیریه مَند. ۱۵نفرای که پولُس ره همراهی مُوکد، اُو ره تا شارِ آتِن رَسَند و بعد ازی که از پولُس بَلدِه سِیلاس و تِیموتائوس دستُور گِرِفت که اُونا هر چی زُودتَر دَ پیشِ ازُو بییه، خودونِ ازوا پس دَ بیریه رفت.
۱۶دَ حالِیکه پولُس دَ آتِن اِنتِظارِ سِیلاس و تِیموتائوس ره مِیکشِید، اُو تمامِ شار ره پُر از بُت ها دِید و روحِ شی دَ وجُودِ ازُو دَ شور اَمَد. ۱۷پس اُو دَ عِبادت خانه قد یهُودیا و مردُمای خُدا پرَست و امچُنان دَ بازار قد راه‌رَوا هر روز بَحث مُوکد. ۱۸تِعدادِ از فَلسَفه دانای اِپِیکُوری و رَواقی ام قد ازُو بَحث ره شُروع کد. بعضی ازوا مُوگُفت: ”اِی آدمِ ایله‌گوی چی میخایه بُگیه؟“ دِیگرو مُوگُفت: ”مِثلِ که تبلِیغگرِ خُدایونِ بیگَنه اَسته،“ چراکه پولُس خوشخبری عیسیٰ و قیامت ره اِعلان مُوکد. ۱۹پس اُو ره گِرِفته دَ شورای کوهِ آریوپاگُس بُرد و گُفت: ”آیا اِمکان دَره مو ام بُفامی که امی تعلِیمِ نَو ره که تُو پیشنِهاد مُونی چی اَسته؟ ۲۰تورای تُو دَ گوش مو عجِیب-و-غرِیب مییه. مو میخاهی معنای ازوا ره بُفامی.“ ۲۱پگِ آتِنی ها و خارِجی های که دَ اُونجی زِندگی مُوکد، وخت خُو ره بَغَیر از گُفت و شُنُود دَ بارِه چِیزای نَو دَ هیچ چِیزی دِیگه مَصرَف نَمُوکد.
۲۲پس پولُس دَ مینکلِ شورای کوهِ آریوپاگُس ایسته شُده گُفت: ”اَی مردُمِ شارِ آتِن! ما مِینگرُم که شُمو دَ تمامِ چِیزا خُوب مذهَبی اَستِید. ۲۳چُون غَیتِیکه دَ شار شُمو میگشتُم و عِبادتگاه های شُمو ره توخ مُوکدُم، دَ یگ قُربانگاه رسِیدُم که دَزُو نوِشته شُده بُود: ’تقدِیم دَ خُدای نَشِنَخته.‘
امُو خُدای ره که شُمو نَشِنَخته پرَستِش مُونِید، ما امُو ره دَز شُمو اِعلان مُونُم. ۲۴خُدای که دُنیا و هر چِیزی ره که دَ مَنِه شی مَوجُود اَسته جور کد، اُو صاحِبِ زمی و آسمو اَسته؛ اُو دَ خانه های که قد دِستِ اِنسان جور شُده زِندگی نَمُونه ۲۵و نَه ام دَ وسِیلِه دِستِ اِنسان خِدمت مُوشه مِثلِ که بُگی اُو دَ یَگو چِیز ضرُورَت دَشته بَشه، چراکه خود شی دَ پگِ آدما زِندگی و نَفس و تمامِ چِیزای دِیگه ره مِیدیه. ۲۶اُو پگِ مِلَّت ها ره از یگ آدم خَلق کد تاکه دَ تمامِ رُوی زمی جای بِگِیره و بَلدِه ازوا وخت ها و سرحدای جای بُود-و-باش ازوا ره تعیِین کد. ۲۷مقصدِ خُدا اِی بُود که مردُم اُو ره بِطَلبه تا شاید تیمتَله کده اُو ره پَیدا کُنه، اگرچِه اُو از هیچ کُدَمِ از مو دُور نِییه.
۲۸چُون دَ قُدرتِ ازُو مو زِنده اَستی، حَرکت مُونی و وجُود دَری؛ امُو رقم که بعضی از شاعِرای شُمو مُوگیه:
’مو از نسلِ ازُو اَستی.‘
۲۹و چُون پگ مو نسلِ خُدا اَستی، مو نَباید گُمان کُنی که اُلوهیَت مِثلِ بُتی اَسته که از طِلّا، نُقره یا سنگِ تَراش شُده دَ مُطابِقِ هُنر و مهارتِ اِنسان جور مُوشه. ۳۰خُدا زمانای جهالتِ اِنسان ره نادِیده گِرِفت، مگم آلی دَ پگِ مردُم دَ هر جای اَمر مُوکُنه که توبه کُنه. ۳۱چُون اُو یگ روز ره تعیِین کده که دَ اُو روز دُنیا ره دَ وسِیلِه مَردی که اِنتِخاب کده عادِلانه قضاوَت مُونه و خُدا وختِیکه امُو شخص ره از مُرده‌ها دُوباره زِنده کد، اِی توره ره دَ تمامِ مردُم ثابِت کد.“
۳۲وختِیکه شورا دَ بارِه قیامِ مُرده ها شِنِید، بعضی کسا رِیشخَندی کد، ولے یگ تِعداد گُفت: ”دَ یگ وختِ دِیگه بسم دَ بارِه اِی چِیزا از تُو مِیشنَوی.“ ۳۳امی رقم پولُس از بَینِ ازوا بُر شُد. ۳۴مگم چند نفر قد ازُو یگجای شُده ایمان اَوُرد که دَ بَینِ ازوا دیونِیسیوس عُضوِ شورای آریوپاگُس و یگ خاتُو دَ نامِ دامارِیس و ام دِیگه نفرای که قد ازوا بُود، وجُود دَشت.