۱بعد ازُو پولُس آتِن ره ایله کده دَ شارِ قُرِنتُس رفت ۲و دَ اُونجی قد یگ آدمِ یهُودی دَ نامِ اَکِیلا که از مردُمِ اَصلی پونطُس بُود، شِنَخته شُد. اَکِیلا قد خاتُون خُو پرِسکِلا نَو از مُلکِ اِیتالیا دَ قُرِنتُس اَمَدُد، چراکه کلَودیوس اَمپراطور حُکم کده بُود که پگ یهُودیا از رُوم بُر شُنه. پولُس دَ دِیرِ ازوا رفت ۳و ازی که اُونا همشُغل بُود، پولُس قد ازوا مَند و کار کد، چُون شُغلِ پگِ ازوا خَیمه‌دوزی بُود. ۴اُو هر روزِ آرام دَ عِبادت خانه جَر-و-بَحث کده کوشِش مُوکد که یهُودیا و یونانیا ره دَ بارِه عیسیٰ مسیح قِناعت بِدیه. ۵وختِیکه سِیلاس و تِیموتائوس از منطقِه مَقدونیه اَمَد، پولُس تمامِ وخت خُو ره وَقفِ اِعلانِ پَیغامِ خُدا کد؛ اُو بَلدِه یهُودیا شاهِدی مِیدَد که عیسیٰ امُو مسیحِ وعده شُده اَسته. ۶مگم وختِیکه اُونا قد ازُو مُخالِفَت کده بَد زِبونی کد، اُو خاکِ چَپَن خُو ره دَ اِعتراض ٹَک زَده دَزوا گُفت: ”خُون شُمو دَ گردونِ خودگون شُمو! از گردونِ ازمه خلاص اَسته. بعد ازی دَ پیشِ غَیرِ یهُودیا مورُم.“ ۷اوخته پولُس اُونا ره ایله کده دَ خانِه یگ نفر دَ نامِ تِیتیُس یُوستُس رفت. اُو یگ آدمِ خُدا پرَست بُود و خانِه شی دَ پالُوی عِبادت خانِه یهُودیا مَوقعیت دَشت. ۸و کریسپُس که سرپرَستِ عِبادت خانه بُود، قد تمامِ خانَوار خُو دَ مَولا عیسیٰ ایمان اَوُرد. علاوِه ازی، غَدر مردُمِ قُرِنتُس که پَیغامِ پولُس ره شِنِید، ایمان اَوُرد و غُسلِ تعمِید گِرِفت. ۹یگ شاو مَولا عیسیٰ دَ خاو دَ پولُس گُفت: ”هیچ ترس نَخور؛ دَ وَعظ خُو اِدامه بِدی و چُپ نَشی، ۱۰چراکه ما قد تُو اَستُم. هیچ کس دَ بَلِه تُو دِست باله نَمُونه که دَز تُو ضَرَر بِرسَنه، چُون غَدر مردُم دَمزی شار دَز مه تعلُق دَره.“ ۱۱پس پولُس مُدَتِ یگ سال و شَش ماه دَ اُونجی مَند و کلامِ خُدا ره دَزوا تعلِیم مِیدَد.
۱۲وختِیکه گالّیو، والی ولایتِ اَخَیا بُود، یهُودیا دِسته‌جَمی دَ سرِ پولُس هُجُوم اَوُرده اُو ره دَ محکمه بُرد ۱۳و گُفت: ”اِی آدم مردُم ره وادار مُونه که خُدا ره قد رَوِش های که برخِلافِ قانُونِ رُومی اَسته، پرَستِش کُنه.“ ۱۴حینِ که پولُس میخاست دان خُو ره واز کنه، گالّیو دَ یهُودیا گُفت: ”او مردُمِ یهُود! اگه اِی مَسئلِه یَگو جُرم و جِنایت مُوبُود، ما دَ اِدعا های شُمو گوش مِیدَدُم. ۱۵مگم ازی که امی مَسئلِه مربُوط دَ تورا، نام ها و شریعتِ خودگون شُمو اَسته، باید خودگون شُمو حَل-و-فصل کُنِید. ما نَمیخایُم دَ بارِه امزی مَسئله ها قضاوَت کنُم.“ ۱۶پس گالّیو اُونا ره از محکمه بُر کد. ۱۷اوخته پگِ ازوا سوستِنیس ره که سرپرَستِ عِبادت خانه بُود، گِرِفته دَ پیشِ محکمه زَد-و-کوی کد، مگم گالّیو هیچ دَ غَمِ امزی چِیزا نَشُد.
۱۸بعد ازی واقِعه پولُس روزای کَلو ره دَ اُونجی تیر کده قد بِرارای ایماندار خُدا حافِظی کد و دَ کِشتی طرفِ سُوریه رَیی شُد و پرِسکِلا و اَکِیلا ام قد شی قَتی بُود. دَ شارِ کِنخریا پولُس سر خُو ره کَل کد، چراکه دَ گردون خُو نَذر گِرِفته بُود. ۱۹وختِیکه اُونا دَ شارِ اِفِسُس رسِید، پولُس ازُو دُو جدا شُد و خود شی دَ عِبادت خانه رفت و قد یهُودیا دَ بَحث کدو شُد. ۲۰اُونا از شی خاهِش کد که بَلدِه وختِ کَلو قد ازوا بُمَنه، مگم اُو قبُول نَکد، ۲۱بَلکِه ازوا خُدا حافِظی کده گُفت: ”اگه خاستِ خُدا بَشه، بسم پیش شُمو مییُم.“ بعد ازُو دَ کِشتی سوار شُده از اِفِسُس رَیی شُد. ۲۲وختِیکه اُو دَ بندرِ قَیصَریه رسِید، ازُونجی دَ اورُشَلیم رفت و بعد از سلام و احوال پُرسی قد جماعتِ ایماندارا سُون شارِ اَنطاکیه حَرکت کد.
۲۳بعد از تیر کدونِ یگ مُدَت دَ اَنطاکیه، اُو بسم حَرکت کد و سِلسِله‌وار سرزمِینِ غلاتیه و فرِیجیه ره گشته تمامِ پَیرَوا ره تقویَت کد.
۲۴دَ امزُو غَیت یگ آدمِ یهُودی دَ نامِ آپولُّس که دَ شارِ سِکندَریه تَوَلُد شُده بُود، دَ اِفِسُس اَمَد. اُو یگ توره‌گوی خُوب و دَ کلامِ خُدا دانا و قَوی بُود. ۲۵اُو دَ راهِ مَولا عیسیٰ تَربیه شُدُد و پُر از شور-و-شَوقِ روحانی چِیزای ره که دَ بارِه عیسیٰ بُود، دَ دِقَت مُوگُفت و تعلِیم مِیدَد، اگرچِه فقط از تعمِیدِ یحییٰ خبر دَشت. ۲۶امُو آدم دَ عِبادت خانه بِدُونِ ترس-و-وَهم دَ توره گُفتو شُد. وختِیکه پرِسکِلا و اَکِیلا تورای شی ره شِنِید، اُونا اُو ره گوشه بُرده راهِ خُدا ره دقِیقتَر بَلدِه شی بیان کد. ۲۷غَیتِیکه آپولُّس میخاست سُون ولایتِ اَخَیا سَفر کُنه، بِرارای ایماندار اُو ره تشوِیق کد و دَ ایماندارای امزُو جای نوِشته کد که ازُو پَذِیرایی کنه. آپولُّس امی که دَ اُونجی رسِید، کسای ره که دَ وسِیلِه فَیضِ خُدا ایمان اَوُرده بُود، کَلو کومَک کد، ۲۸چراکه اُو دَ پیشِ تمامِ مردُم یهُودیا ره قد قُدرتِ بَیان بَند اَندخت و قد اِستِفاده از کِتابِ مُقَدَّس ثابِت کد که عیسیٰ امُو مسیحِ وعده شُده اَسته.