۱اوخته داریوش پادشاه فرمان صادِر کد و اُونا دَ کِتاب خانِه که مربُوطِ خزانه های پادشاهی بابُل بُود و دَز شی اَسناد ذخِیره مُوشُد، تحقِیق کد. ۲و اُونا دَ قلعِه اِکباتان دَ ولایتِ مادها یگ طومار پَیدا کد که دَزشی اینی رقم نوِشته بُود: سَنَدِ رَسمی ۳”دَ سالِ اوّلِ حُکمرانی کوروش پادشاه، یگ فرمان از طرفِ کوروش پادشاه دَ بارِه خانِه خُدا دَ اورُشَلیم صادِر شُد که اینی رقم نوِشته شُدُد: ’بیلِید که خانه دَ عِنوانِ جایی که قُربانی‌ها دَ اُونجی تقدِیم مُوشه دُوباره آباد شُنه و پای‌سنگ شی مِثلِ سابِق بَشه. بِلندی شی شصت توغَی و بَر شی ام شصت توغَی بَشه. ۴ دَ دیوال های شی سِه قطار سنگای کٹه و یگ قطار چیو کار شُنه و خَرچ شی از خزانِه قصرِ پادشاه دَده شُنه. ۵امچُنان ظرفای طِلّایی و نُقره‌یی خانِه خُدا که نِبُوکَدنِصر از عِبادت‌گاهِ اورُشَلیم گِرِفته دَ بابُل اَوُردُد، پس دَده شُنه و دُوباره دَ جای خُو دَ عِبادت‌گاهِ اورُشَلیم بُرده شُده دَ خانِه خُدا ایشته شُنه.‘“
۶ جوابِ داریوش پادشاه: ”آلی تُو، اَی تَتنای والی غَربِ دریای فَرات، شِتَر-بوزِنای و همدِستای شُمو که حُکمرانای غَربِ دریای فَرات اَستِید، ازُونجی دُور شُنِید ۷و مُزاحِمِ کارِ خانِه خُدا نَشُنِید. بیلِید که والی یهُودیا و رِیش سفیدای مردُمِ یهُود خانِه خُدا ره دَ جای اوّل شی دُوباره آباد کنه. ۸امچُنان ما دَ بارِه ازی که شُمو قد رِیش سفیدای یهُودیا دَ دُوباره آباد کدونِ خانِه خُدا چِیز کار کُنِید، اینی حُکم ره مِیدیُم: خَرچِ دُوباره آباد کدونِ خانِه خُدا از عایدِ پادشاه، یعنی از مالیِه ولایتِ غَربِ دریای فَرات بَلدِه امزُو مَردا بِدُونِ تاخِیر دَده شُنه تا کارِ ازوا ایسته نَشُنه. ۹هر چِیزی که اُونا ضرُورَت دَره، یعنی گاوو، قُوچ ها و باره‌گو بَلدِه قُربانی های سوختَنی دَ خُدای آسمو و گندُم، نَمَک، شراب و روغو که پیشوایو دَ اورُشَلیم طلب مُونه، هر روز بِدُونِ کم-و-کاست دَزوا دَده شُنه، ۱۰تا اُونا قُربانی های مَورِدِ پِسَندِ خُدای آسمو ره تقدِیم کنه و بَلدِه عُمرِ پادشاه و اَولادای شی دُعا کنه. ۱۱علاوه ازی ما حُکم مُونُم، هرکسی که اِی حُکم ره تغیِیر بِدیه، مسئُولِین یگ دِستَک‌چیو ره از خانِه شی کشِیده نوک شی ره تیز کنه و اُو ره دَ سرِ امزُو چیوِ نوک تیز باله کنه و خانِه شی ره بخاطرِ امزی کار جنگلی-دانی جور کنه. ۱۲خُدای که نام خُو ره دَ امزُو جای قرار دَده، هر پادشاه یا قَومی که دِست خُو ره بَلدِه تغیِیر دَدونِ امزی حُکم یا خراب کدونِ خانِه خُدا دَ اورُشَلیم دِراز کنه، امُو خُدا اُو ره سرنِگون کنه. ما داریوش امی حُکم ره صادِر کدُم، پس قد دِقَتِ کامِل باید عملی شُنه.“
۱۳اوخته تَتنای والی غَربِ دریای فَرات، شِتَر-بوزِنای و همدِستای ازوا مُطابِقِ حُکمی که داریوش پادشاه صادِر کدُد، قد دِقَتِ کامِل عمل کد. ۱۴رِیش سفیدای یهُودیا دَ کارِ دُوباره آباد کدو اِدامه دَد و مُطابِقِ نَبُوَتِ حَگَی نَبی و زِکریا باچِه عِدّو دَ مقصد خُو کامیاب شُد. اَرے، اُونا مُطابِقِ اَمرِ خُدای اِسرائیل و فرمانِ کوروش، داریوش و اَردِشیر پادشایونِ فارس، خانه ره آباد و تکمِیل کد. ۱۵امی خانه دَ روزِ سِوّمِ ماهِ اَدار دَ سالِ شَشُمِ حُکمرانی داریوش پادشاه تکمِیل شُد. ۱۶بَنی اِسرائیل، یعنی پیشوایو، لاویا و پگِ کسای که از اسِیری پس اَمدُد قد خوشی خانِه خُدا ره وَقف کد. ۱۷اُونا بَلدِه وَقف کدونِ خانِه خُدا صد نَرگاو، دُو صد قُوچ و چار صد باره تقدِیم کد و بخاطرِ قُربانی گُناه بَلدِه تمامِ اِسرائیل، دوازده ٹَکه دَ مُطابِقِ تِعدادِ طایفه های اِسرائیل تقدِیم کد. ۱۸بعد ازُو اُونا پیشوایو ره دَ دِسته های ازوا و لاویا ره دَ وظِیفه های ازوا بَلدِه خِدمتِ خُدا دَ اورُشَلیم تعیِین کد، امُو رقم که دَ کِتابِ مُوسیٰ نوِشته یَه.
۱۹کسای که از اسِیری پس اَمدُد، عِیدِ پِصَح ره دَ روزِ چاردَهُمِ ماهِ اوّل برگُزار کد، ۲۰چُون پیشوایو و لاویا خودون ره یگجای پاک کدُد و پگ شی پاک بُود. پس لاویا بارِه عِیدِ پِصَح ره بَلدِه تمامِ کسای که از اسِیری پس اَمدُد، بَلدِه پیشوایونِ همکار خُو و بَلدِه خودون خُو حلال کد. ۲۱اوخته بَنی اِسرائیل که از اسِیری پس اَمدُد و تمامِ کسای که خودون ره از ناپاکی مِلَّت های امزُو سرزمی جدا کده قد بَنی اِسرائیل یگجای شُدُد تا خُداوند، خُدای اِسرائیل ره پرَستِش کنه، از خوراکِ عِیدِ پِصَح خورد. ۲۲اُونا عِیدِ فطِیر ره هفت روز قد خوشی برگُزار کد، چُون خُداوند اُونا ره خوشحال کدُد و دِلِ پادشاهِ آشُور ره دَزوا مایل کدُد تا دِستای ازوا ره بَلدِه آباد کدونِ خانِه خُدا، خُدای اِسرائیل قَوی کُنه.