۱ دَ امزُو زمان دُو نَبی، یعنی حَگَی نَبی و زِکریا باچِه عِدّو بَلدِه یهُودیای که دَ یهُودا و اورُشَلیم بُود، دَ نامِ خُدای اِسرائیل که نِگاهوانِ ازوا بُود نَبُوَت کد. ۲اوخته زِروبابِل باچِه شِئَلتِیئیل و یِشُوعَ باچِه یوصاداق باله شُده آباد کدونِ خانِه خُدا ره دَ اورُشَلیم دُوباره شُروع کد و اَنبیای خُدا قد ازوا بُود و ازوا حِمایت مُوکد.
۳لیکِن تَتنای والی غَربِ دریای فَرات قد شِتَر-بوزِنای و همدِستای خُو اَمَده دَزوا اینی رقم گُفت: ”دَز شُمو کِی اَمر دَده که اِی خانه ره آباد کُنِید و اِی ساختُمان ره تکمِیل کُنِید؟“ ۴اُونا امچُنان ازوا پُرسان کده گُفت: ”نام های مَردای که اِی ساختُمان ره آباد مُونه، چی اَسته؟“ ۵لیکِن نظرِ خُدای اِسرائیل دَ بَلِه رِیش سفیدای یهُودیا بُود و اُونا کارِ ازوا ره ایسته نَکد، بَلکِه تا رسِیدونِ امزی مَوضوع دَ داریوش و پس اَمدونِ خط دَ بارِه امزی توره، معطل کد.
۶اینی مَتنِ خطی اَسته که تَتنای والی غَربِ دریای فَرات، شِتَر-بوزِنای و همدِستای شی که حُکمرانای غَربِ دریای فَرات بُود، دَ داریوش پادشاه رَیی کد. ۷خطی ره که اُونا دَزُو رَیی کد، اینی رقم نوِشته شُدُد: ”سلام-و-اِحترامات خِدمتِ داریوش پادشاه، ۸ بعد از سلام دَ اِطلاعِ پادشاه رَسَنده شُنه که مو دَ ولایتِ یهُودا دَ خانِه خُدای بُزُرگ رفتی و دِیدی که اُو ره قد سنگای کٹه آباد مُونه و چیو ها دَ بَلِه دیوال های شی ایشته مُوشه؛ اِی کار دَ دِقَت انجام دَده مُوشه و دَ وسِیلِه دِستِ ازوا دَ کامیابی پیش موره. ۹دَ اُونجی مو قد رِیش سفیدای ازوا توره گُفته اینی رقم پُرسان کدی، ’دَز شُمو کِی اَمر دَده که اِی خانه ره آباد کُنِید و اِی ساختُمان ره تکمِیل کُنِید؟‘ ۱۰امچُنان نام های ازوا ره ازوا پُرسان کدی تا نوِشته کده بَلدِه تُو معلُومات بِدی که نام های کٹه‌کَلونای ازوا چی اَسته. ۱۱اُونا دَ جواب مو اینی رقم گُفت، ’مو خِدمتگارای خُدای آسمو و زمی اَستی و خانِه ره آباد مُونی که غَدر سال پیش آباد شُدُد؛ امی خانه ره پادشاهِ بُزُرگِ اِسرائیل آباد کده تکمِیل کدُد. ۱۲لیکِن ازی که بابه‌کَلونای مو قارِ خُدای آسمو ره باله اَوُرد، اُو اُونا ره دَ دِستِ نِبُوکَدنِصرِ کَلدانی پادشاهِ بابُل تسلِیم کد و نِبُوکَدنِصر اِی خانه ره بیرو کده مردُم ره دَ بابُل دَ اسِیری بُرد. ۱۳مگم دَ سالِ اوّلِ حُکمرانی کوروش پادشاهِ بابُل، کوروش پادشاه اَمر کد که امی خانِه خُدا باید آباد شُنه. ۱۴علاوه ازی، ظرفای طِلّایی و نُقره‌یی خانِه خُدا ره که نِبُوکَدنِصر از خانِه خُدا از اورُشَلیم گِرِفته دَ عِبادت‌گاهِ خُدایونِ بابُل اَوُردُد، کوروش پادشاه اُونا ره از عِبادت‌گاهِ خُدایونِ بابُل بُرو اَوُرد و دَ یگ نفر دَ نامِ شیشبَصَر که اُو ره والی تعیِین کدُد، تسلِیم کد ۱۵و دَزُو گُفت: ”اِی ظرفا ره گِرِفته بورُو و دَ جایگاهِ مُقَدَّس دَ اورُشَلیم بیل و ام اِجازه بِدی که خانِه خُدا دَ جای اوّل خُو آباد شُنه.“ ۱۶اوخته شیشبَصَر اَمَده پای‌سنگِ خانِه خُدا ره دَ اورُشَلیم ایشت و امزُو زمان تا آلی ره کارِ آباد کدون شی اِدامه دَره و هنوز تکمِیل نَشُده.‘ ۱۷آلی اگه پادشاه صَلاح مِیدَنه، بیله که یگ تحقِیق دَ خزانِه پادشاه دَ بابُل انجام شُنه تا دِیده شُنه که آیا یگ حُکم دَ وسِیلِه کوروش پادشاه بَلدِه آباد کدونِ امزی خانِه خُدا دَ اورُشَلیم صادِر شُده یا نَه؟ بعد ازُو اُمِید که تصمِیم خُو ره پادشاه دَ بارِه امزی مَوضوع دَز مو رَیی کنه.“