۱اینیا مُلک های اَسته که بَنی اِسرائیل دَ سرزمِینِ کِنعان دَ دِست اَوُرد، مُلک های که اِلعازار پیشوا، یوشِع باچِه نُون و کٹه‌کَلونای طایفه های بَنی اِسرائیل بَلدِه ازوا تقسِیم کد. ۲مُلکِ ازوا دَ وسِیلِه پِشک بَلدِه امزُو نُه طایفه و نِیم طایفه تعیِین شُد، امُو رقم که خُداوند دَ وسِیلِه مُوسیٰ اَمر کدُد. ۳چُون مُوسیٰ مُلکِ دُو طایفه و نِیم طایفه ره دَ شرقِ دریای اُردُن دَده بُود، لیکِن دَ مینکلِ بَنی اِسرائیل دَ لاویا هیچ مُلک نَدَد. ۴باچه های یوسُف مَنَسّی و اِفرایم دُو طایفه حِساب شُد تا دوازده پُوره شُنه. پس دَ لاویا هیچ تقسِیم دَده نَشُد، لیکِن شار ها بَلدِه زِندگی کدو و عَلفچَر ها بَلدِه گَله و رَمِه ازوا دَده شُد. ۵امُو رقم که خُداوند دَ مُوسیٰ اَمر کدُد، بَنی اِسرائیل امُو رقم عمل کده زمی ره تقسِیم کد.
۶اوخته اَولادِه یهُودا دَ جِلجال پیشِ یوشِع اَمَد و کالیب باچِه یفُنِّه قِنِیزی دَزُو گُفت: ”چِیزی ره که خُداوند دَ بارِه ازمه و ازتُو دَ قادِش بَرنیَع دَ مُوسیٰ مَردِ خُدا گُفت دَ یاد تُو مَنده؟ ۷ما چِل ساله بُودُم که مُوسیٰ خِدمتگارِ خُداوند مَره از قادِش بَرنیَع بَلدِه جاسُوسی امزی سرزمی رَیی کد؛ و ما بَلدِه ازُو خبرِ راست اَوُردُم. ۸مگم بِرارونِ اِسرائیلی مه که قد ازمه رفتُد دِلِ قَوم ره بےجُراَت کد؛ ولے ما از خُداوند، خُدای خُو قد تمامِ دِل پَیرَوی کدُم. ۹و دَ امزُو روز مُوسیٰ قَسم خورده گُفت: ’دَ امزُو سرزمی که پای تُو ایشته شُد، اُو بَلدِه ازتُو و اَولادای تُو مُلکِ اَبَدی مُوشه، چراکه تُو از خُداوند، خُدای مه قد تمامِ دِل پَیرَوی کدی.‘
۱۰و آلی بِنگرِید، خُداوند امُو رقم که گُفتُد، مَره دَ امزی چِل و پَنج سال زِنده نِگاه کده، یعنی از وختِیکه خُداوند اِی توره ره دَ مُوسیٰ گُفت و از غَیتِیکه قَومِ اِسرائیل دَ بیابو دَ سَفر بُود؛ و آلی، اینه ما اِمروز هشتاد و پَنج ساله اَستُم. ۱۱اِمروز هنوز ما قَوی اَستُم مِثلِ امزُو روز که مُوسیٰ مَره دَ جاسُوسی رَیی کد؛ قُوَت مه امُو رقم که دَ اُو وخت بُود، آلی ام قُوَت مه امُو رقم اَسته، چی بَلدِه جنگ کدو و چی بَلدِه رفتو و اَمَدو. ۱۲پس آلی امی کوھِستو ره که خُداوند دَ امزُو روز دَ بارِه شی گُفت، دَز مه بِدی؛ چُون تُو دَ امزُو روز شِنِیدی که عَناقیا دَ اُونجی بُود، دَ شارای کٹه و دیوالدار؛ اگه خُداوند قد مه بَشه، ما اُونا ره هَی مُونُم، امُو رقم که خُداوند گُفت.“
۱۳پس یوشِع کالیب باچِه یفُنّه ره بَرکت دَد و حِبرون ره دَ عِنوانِ مُلکیَت دَزُو بخشِید. ۱۴امزی خاطر حِبرون تا اِمروز مُلکیَتِ کالیب باچِه یفُنِّه قِنِیزی اَسته، چراکه اُو از خُداوند، خُدای اِسرائیل قد تمامِ دِل پَیرَوی کد. ۱۵نامِ پیشنِه حِبرون قِریَت-اَربَع بُود؛ و اَربَع دَ مینکلِ عَناقیا بُزُرگتَرِین مَرد بُود. بعد ازُو زمی از جنگ آرام شُد.