۱پِشکِ طایفِه اَولادِه یهُودا دَ مُطابِقِ اَولادِ بابه های ازوا دَ طرفِ جنُوب تا سرحدِ اِدوم، دَ بیابونِ صِین تا آخرِین نُقطِه جنُوبی بُر شُد. ۲سرحدِ جنُوبی ازوا از آخِرِ دریای مُرده، از خلِیجی که سُون جنُوب اَسته شُروع مُوشُد ۳و طرفِ جنُوبِ کوتلِ عَقرَبِیم رفته دَ صِین تیر مُوشُد و دَ جنُوبِ قادِش بَرنیَع بُر شُده دَ حِصرون تیر مُوشُد و تا اَدار مورفت؛ ازُونجی سُون قَرقَع دَور مُوخورد ۴و از عَصمون تیر شُده دَ درِّه مِصر مِیرَسِید و دَ دریای کٹه خَتم مُوشُد. اِی سرحدِ جنُوبی ازوا بُود. ۵سرحدِ شَرقی ازوا از دریای مُرده تا شُروعِ دریاچِه اُردُن مِیرَسِید. سرحدِ شمالی ازوا از خلِیجِ دریای مُرده از دانِ دریاچِه اُردُن شُروع مُوشُد ۶و اِی سرحد دَ بَیت-حُجله بُر شُده دَ شمالِ بَیت-عَرَبه تیر مُوشُد و سرحد دَ سنگِ بُهَن باچِه رئوبین باله مورفت؛ ۷اِی سرحد از دَرِّه عَخور دَ دبِیر بُر مُوشُد و طرفِ شمال رفته سُونِ جِلجال تاو مُوخورد که رُوی دَ رُوی کوتلِ اَدُمِیم دَ جنُوبِ دَرّه اَسته؛ اِی سرحد سُون آوھای عین-شَمس تیر مُوشُد و دَ عین-روگِل خَتم مُوشُد. ۸بعد ازُو سرحد از دَرِّه باچِه هِنّوم سُون دامَنِه جنُوبی یبُوسیا یعنی اورُشَلیم بُر مُوشُد و ازُونجی سُون شِیخی کوهی بُر مُوشُد که رُوی دَ رُوی درِّه هِنّوم دَ غَرب بُود، دَ آخِرِین نُقطِه شَمالِ دَرِّه رِفائیا؛ ۹بعد ازُو سرحد از شِیخی کوه سُون چشمِه آوهای نِفتوَح پیش رفته دَ شارای کوهِ عِفرون بُر مُوشُد و تا بَعله یعنی قِریَت-یِعارِیم اِدامه پَیدا مُوکد؛ ۱۰و سرحد از بَعله طرفِ غَرب دَور خورده دَ کوهِ سَعِیر مورفت و از دامَنِه شمالی کوهِ یِعارِیم یعنی کِسالون تیر شُده دَ بَیت-شَمس تاه مُوشُد و دَ تِمنه مِیرَسِید؛ ۱۱بعد ازُو سرحد سُون شمال دَ دامَنِه عِقرون مورفت و طرفِ شِکرون پیش رفته دَ کوهِ بَعله تیر مُوشُد و دَ یَبنئیل مِیرَسِید؛ و سرحد دَ دریای کٹه خَتم مُوشُد. ۱۲و سرحدِ غَربی ازوا دریای کٹه و بَغل های شی بُود. اِی بُود سرحدای چارطرفِ اَولادِه یهُودا دَ مُطابِقِ اَولادِ بابه های ازوا.
۱۳دَ مُطابِقِ اَمری که خُداوند دَ یوشِع کدُد، اُو بَلدِه کالیب باچِه یفُنّه دَ مینکلِ اَولادِه یهُودا یگ تقسِیم زمی دَد که اُو قِریَت اَربَع یعنی حِبرون بُود. اَربَع آتِه عَناق بُود. ۱۴کالیب سِه اَولادِه عَناق ره که شیشَی، اَخِیمان و تَلمَی بُود، ازُونجی هَی کد. ۱۵ازُونجی اُو دَ خِلافِ باشِنده های دبِیر بُر شُد؛ نامِ پیشنِه دبِیر قِریَت سِفر بُود. ۱۶و کالیب گُفت: ”ھر کسی که دَ بَلِه قِریَت سِفر حَمله کنه و اُو ره بِگِیره، ما دُختر خُو عَخسه ره دَ عِنوانِ خاتُو دَ امزُو مِیدیُم.“ ۱۷اوخته عُتنِئیل باچِه قِناز، باچِه بِرارِ کالیب اُو ره تَصَرُف کد و کالیب دُختر خُو عَخسه ره دَ عِنوانِ خاتُو دَزُو دَد.
۱۸وختِیکه عَخسه پیشِ عُتنِئیل اَمَد، عُتنِئیل اُو ره گپ دَد که از آتِه خُو زمی طلب کُنه. غَیتِیکه عَخسه از اُلاغ خُو تاه شُد، کالیب ازُو پُرسان کده گُفت: ”چِطور که اِی سُونا اَمَدی؟“ ۱۹اُو گُفت: ”مَره بَرکت بِدی؛ ازی که زمِینِ جنُوب ره دَز مه دَدے، چشمه های آو ره ام دَز مه بِدی.“ اوخته کالیب چشمه های باله و چشمه های تاه ره دَزُو بخشِید.
۲۰مُلکِ طایفِه اَولادِه یهُودا دَ مُطابِقِ اَولادِ بابه های ازوا اینی اَسته:
۶۳مگم اَولادِه یهُودا یبُوسیا ره که باشِنده های اورُشَلیم بُود، هَی نَتنِست. امزی خاطر یبُوسیا تا اِمروز قد اَولادِه یهُودا دَ اورُشَلیم زِندگی مُونه.