۱وختِیکه پگِ قَوم از دریای اُردُن تیر شُده خلاص شُد، خُداوند دَ یوشِع گُفت: ۲ ”امُو دوازده نفر ره که اِنتِخاب کدے از مینکلِ قَوم بِگِیر، از ھر طایفه یگ نفر ۳و دَزوا اَمر کده بُگی، ’دوازده سنگ ره ازِینجی از مَنِه دریای اُردُن از جایی که پای های پیشوایو ایسته شُده بِگِیرِید و قد خُو بُرده دَ امزُو جای بیلِید که اِمشاو خَیمه مِیزَنِید.‘“
۴پس یوشِع دوازده مَردی ره که از مینکلِ بَنی اِسرائیل اِنتِخاب کدُد کُوی کد، یعنی از هر طایفه یگ نفر. ۵و یوشِع دَزوا گُفت: ”دَ پیشِ صندُوقِ خُداوند، خُدای خُو دَ مینکلِ دریای اُردُن بورِید و هر کُدَم شُمو یگ سنگ ره دَ شانِه خُو باله کده بُبرِید، دوازده سنگ دَ مُطابِقِ طایفه های بَنی اِسرائیل، ۶تا امیا دَ مینکل شُمو یگ نشانی بَشه؛ و غَیتِیکه بچکِیچای شُمو دَ آینده از شُمو پُرسان کده مُوگیه: ’امی سنگا بَلدِه شُمو چی معنیٰ دَره؟‘ ۷شُمو دَزوا بُگِید که آوهای دریای اُردُن پیشِ رُوی صندُوقِ عهدِ خُداوند از حَرکت مَند، یعنی وختِیکه اُو از دریای اُردُن تیر مُوشُد، آوهای دریای اُردُن دُوپاره شُد. پس امی سنگا باید بَلدِه بَنی اِسرائیل تا اَبَد یگ یادگار بَشه.“
۸بَنی اِسرائیل امُو رقم کد که یوشِع اَمر کدُد. اُونا دوازده سنگ ره از مَنِه دریای اُردُن دَ مُطابِقِ تِعدادِ طایفه های بَنی اِسرائیل گِرِفت، امُو رقم که خُداوند دَ یوشِع اَمر کدُد، و اُونا ره قد خُو دَ جایی بُرد که خَیمه زَدُد و دَ امُونجی ایشت. ۹امچُنان یوشِع دوازده سنگ ره دَ مینکلِ دریای اُردُن شِیخ کد، دَمزُو جای که پای های پیشوایونی که صندُوقِ عهد ره مُوبُرد ایسته شُدُد؛ و اُونا تا اِمروز دَ اُونجی اَسته.
۱۰پیشوایونی که صندُوق ره مُوبُرد دَ مینکلِ دریای اُردُن ایسته مَند تا پگِ چِیزای که خُداوند دَ یوشِع اَمر کدُد که دَ قَوم بُگیه کامِلاً انجام دَده شُد، مُطابِقِ پگِ چِیزای که مُوسیٰ دَ یوشِع هِدایت دَده بُود. پس مردُم دَ عَجَله تیر شُد. ۱۱امی که پگِ قَوم تیر شُده خلاص شُد، صندُوقِ خُداوند قد پیشوایو دَ پیشِ رُوی قَوم از دریا تیر شُد. ۱۲اَولادِه رئوبین، اَولادِه جاد و نِیمِ طایفِه مَنَسّی مُسَلَح پیش پیشِ بَنی اِسرائیل از دریا تیر شُد، امُو رقم که مُوسیٰ دَزوا اَمر کدُد. ۱۳تقرِیباً چِل هزار نفرِ مُسَلَح بَلدِه جنگ دَ حُضُورِ خُداوند از دریا دَ دَشت های اَریحا تیر شُد.
۱۴دَ امزُو روز خُداوند یوشِع ره دَ نظرِ پگِ اِسرائیل بُزُرگ کد و اُونا از یوشِع دَ تمامِ روزای زِندگی شی مِیتَرسِید، امُو رقم که از مُوسیٰ ترس مُوخورد.
۱۵اوخته خُداوند قد یوشِع گپ زَده گُفت: ۱۶”دَ پیشوایونی که صندُوقِ عهد ره مُوبره، اَمر کُو که از دریای اُردُن بُر شُنه.“ ۱۷پس یوشِع دَ پیشوایو اَمر کده گُفت: ”از دریای اُردُن بُر شُنِید.“ ۱۸وختی پیشوایونی که صندُوقِ عهدِ خُداوند ره مُوبُرد از مینکلِ دریای اُردُن بُر شُد و قفِ پایای پیشوایو دَ خُشکی ایشته شُد، آوِ دریای اُردُن دُوباره دَ جای خُو اَمَد و رقمِ گاه اَلّی از لَبای شی سرریزی کد.
۱۹دَ روزِ دَهُمِ ماهِ اوّل، قَوم از دریای اُردُن بُر شُد و دَ جِلجال دَ سرحدِ شَرقی اَریحا خَیمه زَد. ۲۰و یوشِع امُو دوازده سنگ ره که از دریای اُردُن گِرِفته بُود، دَ جِلجال شِیخ کد ۲۱و قد بَنی اِسرائیل گپ زَده گُفت: ”وختِیکه بچکِیچای شُمو دَ آینده از آته‌گون خُو پُرسان کده بُگیه، ’امی سنگا بَلدِه شُمو چی معنیٰ دَره؟‘ ۲۲اوخته دَ بچکِیچای خُو تعلِیم دَده بُگِید، ’ قَومِ اِسرائیل از خُشکی از دریای اُردُن تیر شُد،‘ ۲۳چُون خُداوند، خُدای شُمو آوهای دریای اُردُن ره پیشِ رُوی شُمو خُشک کد تا وختِیکه شُمو تیر شُدِید، امُو رقم که خُداوند، خُدای شُمو دریای سُرخ ره پیشِ رُوی ازمو خُشک کد تا غَیتِیکه مو تیر شُدی. ۲۴ اُو اِی کار ره کد تا تمامِ قَوم های زمی بِدَنه که دِستِ خُداوند قُدرتمَند اَسته و تا شُمو از خُداوند، خُدای خُو همیشه ترس دَشته بَشِید.“