۱پس یرُوب-بَعل یعنی جدعون قد تمامِ لشکری که قد شی بُود صَباح‌گاه باله شُد و حَرکت کده دَ نزدِیکِ چشمِه حَرود خَیمه زَد؛ و خَیمه‌گاهِ مِدیانیا دَ شمالِ ازوا دَ نزدِیکِ کوهِ مورِح دَ دَرّه بُود. ۲خُداوند دَ جدعون گُفت: ”مَردای که قد تُو اَسته، از حد کَلو یَه، ما مِدیانیا ره دَ دِستِ ازوا تسلِیم نَمُونُم؛ نَشُنه که بَنی اِسرائیل خود ره دَ بَلِه مه کٹه کٹه کده بُگیه که زورِ خودون مو، مو ره نِجات دَد. ۳پس آلی اِی ره اِعلان کُو و دَ گوشِ قَوم رَسَنده بُگی: ’هر کسی که ترس خورده و وَحشَت کده، مِیتَنه از کوهِ جِلعاد پس بوره.‘“ اوخته بِیست و دُو هزار نفرِ قَوم پس رفت و دَه هزار نفر باقی مَند.
۴و خُداوند بسم دَ جدعون گُفت: ”مَردای قَوم هنوز ام کَلو یَه؛ اُونا ره دَ لبِ آو بَیر و ما اُونا ره دَ اُونجی بَلدِه تُو آزمایش مُونُم. هر کسی ره که گُفتُم اینَمی قد تُو بوره، اُو باید قد تُو بوره و هر کسی ره که گُفتُم اینَمی قد تُو نَرَوه، اُو باید قد تُو نَرَوه.“ ۵پس جدعون مَردای قَوم ره دَ لبِ آو اَوُرد و خُداوند دَزُو گُفت: ”کسای که آو ره قد زِبون خُو وُچی مُونه، رقمی که سَگ چَل مِیزَنه، اُونا ره یگ طرف جدا کُو، و کسای که دَ بَلِه زانُوی خُو شِشته قد قفِ اَلغِه خُو آو وُچی مُونه، اُونا ره یگ طرف.“ ۶اوخته تِعدادِ کسای که دِست خُو ره دَ دان خُو بُرده آو وُچی کد سِه صد نفر بُود؛ لیکِن باقی مَردای قَوم پگ شی قد زانُوی خُو خَم شُده آو وُچی کد. ۷اوخته خُداوند دَ جدعون گُفت: ”ما قد امزی سِه صد نفر که قد قفِ اَلغِه خُو آو وُچی کد، شُمو ره نِجات مِیدیُم و مِدیانیا ره دَ دِست تُو تسلِیم مُونُم. مَردای دِیگه ره بیل که پس دَ مُلک-و-جای خُو بوره.“ ۸پس امُو سِه صد نفر خوراکه و شیپُورا ره از دِستِ ازوا گِرِفت. اوخته جدعون باقی اِسرائیلیا ره هر کُدَمِ ازوا ره پس دَ خَیمِه شی رَیی کد، لیکِن امُو سِه صد نفر ره نِگاه کد. خَیمه‌گاهِ مِدیانیا تَیلونِ ازوا دَ مَنِه دَرّه بُود.
۹دَمزُو شاو خُداوند دَ جدعون گُفت: ”باله شُو و دَ بَلِه خَیمه‌گاهِ مِدیانیا حَمله کُو، چُون ما اُونا ره دَ دِستِ ازتُو تسلِیم کدیم. ۱۰لیکِن اگه از حَمله کدو ترس مُوخوری، قد خِدمتگار خُو فُوره دَ خَیمه‌گاهِ ازوا بورُو ۱۱و گوش بِگِیر که اُونا چِیزخیل مُوگه. اوخته دِست تُو قَوی مُوشه و دَ بَلِه خَیمه‌گاهِ ازوا حَمله مُونی.“ پس اُو و خِدمتگار شی فُوره دَ نزدِیکِ مَردای مُسَلَح که دَ خَیمه‌گاهِ مِدیانیا بُود تاه شُد. ۱۲مِدیانیا، عمالیقیا و پگِ مردُمِ شَرق رقمِ مَلَخ وری غَدر کَلو دَ دَرّه جَم شُدُد و اُشتُرای ازوا رقمِ ریگِ دریا اَلّی بےحِساب و کَلو بُود. ۱۳وختی جدعون دَ اُونجی رَسِید، آوازِ یگ نفر ره شِنِید که خاو خُو ره دَ رفِیق خُو نَقل کده مُوگُفت: ”اینه، ما یگ خاو دِیدیم، ما دِیدُم که یگ نانِ ٹِکی جَوی دَ مینکلِ خَیمه‌گاهِ مِدیانیا لول خورده تا اَمَد و دَ یگ خَیمه خورد و خَیمه ره اُوطور زَد که اُفتَد؛ و خَیمه سرنِگون شُده چَپه شُد.“ ۱۴رفِیق شی دَ جوابِ ازُو گُفت: ”اِی دِیگه چِیز نِییه بغَیر از شمشیرِ جدعون باچِه یوآش قومَندانِ اِسرائیلیا، چُون خُدا مِدیانیا و پگِ خَیمه‌گاه ره دَ دِستِ ازُو تسلِیم کده.“
۱۵وختِیکه جدعون نقلِ خاو و تعبِیر شی ره شِنِید، اُو خُدا ره سَجده کد و پس دَ خَیمه‌گاهِ اِسرائیل اَمَده گُفت: ”باله شُنِید، چُون خُداوند خَیمه‌گاهِ مِدیانیا ره دَ دِستِ ازشُمو تسلِیم کده.“ ۱۶اوخته سِه صد نفر ره دَ سِه دِسته تقسِیم کد و دَ دِستِ هر کُدَمِ ازوا شیپُورا و کُوزه های خالی ره دَد و مَشعل ها ره دَ کُوزه ها ایشت ۱۷و دَزوا گُفت: ”وختِیکه ما دَ نزدِیکِ خَیمه‌گاهِ دُشمو رسِیدُم، سُون ازمه توخ کده رقمِ ازمه رفتار کنِید، یعنی هر کار که ما کدُم، شُمو ام امُو کار ره کُنِید. ۱۸غَیتِیکه ما و پگِ کسای که قد مه اَسته، شیپُورا ره دَ صَدا اَوُردی، اوخته شُمو ام از هرطرفِ خَیمه‌گاه شیپُورا ره دَ صَدا بَیرِید و چِیغ زَده بُگِید: ’بَلدِه خُداوند و بَلدِه جدعون!‘“
۱۹پس جدعون و صد نفری که قد شی بُود دَ شُروعِ پَیرِه نِیمِ شاو دَ بَغلِ خَیمه‌گاه رَسِید، دَ غَیتِیکه پَیره‌دارای نَو اَمَد؛ اوخته اُونا شیپُورا ره دَ صَدا اَوُرد و کُوزه های ره که دَ دِستای ازوا بُود، مَیده کد. ۲۰پس هر سِه دِسته شیپُورا ره دَ صَدا اَوُرد و کُوزه ها ره مَیده کد؛ اُونا مَشعل ها ره دَ دِستای چَپ خُو گِرِفتُد و شیپُورا ره دَ دِستای راست خُو تا دَ صَدا بَیره و چِیغ زَده مُوگُفت: ”شمشیر بِزنِید بَلدِه خُداوند و بَلدِه جدعون!“ ۲۱اُونا هر کُدَم شی دَ جای خُو دَ چارطرفِ خَیمه‌گاه ایسته شُد و تمامِ لشکرِ مِدیانیا هر سُو مُودَوِید و چِیغ زَده دُوتا مُوکد.
۲۲وختِیکه امُو سِه صد نفر شیپُورا ره دَ صَدا اَوُرد، خُداوند شمشیرِ هر نفرِ دُشمو ره دَ ضِدِ همدِست شی دَ کار بُرد و دَ ضِدِ تمامِ لشکر. لشکرِ ازوا تا بَیت-شِطه سُون صِریره و تا سرحدِ آبِل-مِحوله که دَ نزدِیکِ طَبات اَسته، دُوتا کد. ۲۳اوخته مَردای اِسرائیل از نَفتالی، اَشِیر و پگِ مَنَسّی کُوی شُد و اُونا مِدیانیا ره دُمبال کد. ۲۴دَمزُو غَیت جدعون قاصِدا ره دَ پگِ کوهِستونِ اِفرایم رَیی کد و گُفت: ”بَلدِه جنگ قد مِدیانیا تاه بیِید و راه ره دَ آوهای دریای اُردُن تا بَیت-باره بِگِیرِید.“ پس تمامِ مَردای اِفرایم جم شُده راهِ ازوا ره دَ آوهای دریای اُردُن تا بَیت-باره گِرِفت. ۲۵و اُونا مِدیانیا ره دُمبال کده دُو سرکرده های مِدیانیا ره که عُرِب و زِئب نام دَشت، دِستگِیر کد؛ اوخته اُونا عُرِب ره دَ قادِه عُرِب و زِئب ره دَ چرخُشتِ انگُورِ زِئب کُشت و سرِ عُرِب و سرِ زِئب ره از اُو طرفِ دریای اُردُن دَ پیشِ جدعون اَوُرد.