۱وختِیکه روزِ آرام تیر شُد، مریَمِ مَجدَلیه و مریَم آبِه یعقُوب قد سالومه مَوادِ خوشبُوی خرِید تا رفته دَ جَسَدِ عیسیٰ بُمَله. ۲پس اُونا صَباح‌گاهِ روزِ یگشَمبِه دَ وختِ آفتَو بُر شُدو دَ سرِ قبر رفت. ۳اُونا قد یگدِیگِه خُو مُوگُفت: ”امُو سنگ ره کِی بَلدِه مو از دانِ قبر لول بِدیه؟“ ۴وختی اُونا توخ کد، دِید که امُو سنگِ کٹه از دانِ قبر لول دَده شُده.
۵امی که اُونا دَ قبر داخِل شُد، یگ آدمِ جوان ره دِید که چَپَنِ سفید دَ جان شی بُود و طرفِ راست شِشتُد و اُونا بِیم کد. ۶مگم اُو دَزوا گُفت: ”بِیم نَکُنِید، شُمو عیسای ناصِری ره مُوپالِید که دَ صلِیب میخکوب شُد. اُو دُوباره زِنده شُده؛ اُو دَ اِینجی نِییه. اینه، اِی جایی اَسته که اُونا اُو ره دَ اِینجی ایشتُد. ۷آلی بورِید دَ یارای شی و دَ پِترُس بُگِید که اُو از شُمو کده پیش دَ جلِیلیه موره و شُمو اُو ره دَ اُونجی مِینگرِید، امُو رقمِیکه اُو دَز شُمو گُفتُد.“
۸اُونا از قبر بُر شُده دُوتا کد، چراکه اُونا ره لَرزه گِرِفتُد و اُونا حَیرَت زَده شُدُد؛ اُونا دَ هیچ کس چِیز نَگُفت، چُون ترس مُوخورد.
۹[وختِیکه عیسیٰ صَباح‌گاهِ روزِ یگشَمبِه دُوباره زِنده شُد، اُو اوّل دَ مریَمِ مَجدَلیه که ازُو هفت جِن ره بُر کدُد، ظاهِر شُد. ۱۰مریَم رفت و کسای ره که قد عیسیٰ بُود و ماتم مِیگِرِفت و چخرا مُوکد، خبر کد. ۱۱وختی اُونا شِنِید که عیسیٰ زِنده شُده و دَ وسِیلِه مریَم دِیده شُده، اُونا باوَر نَکد.
۱۲بعد ازُو عیسیٰ دَ شکلِ دِیگه دَ دُو نفرِ ازوا دَ حالِیکه سُون اطراف مورفت، ظاهِر شُد. ۱۳اُونا رفته دَ دِیگرو خبر دَد، مگم اُونا دَ تورای ازوا ام باوَر نَکد.
۱۴چند وخت بعد عیسیٰ دَ امزُو یازده یار که سرِ دِسترخو شِشتُد ظاهِر شُد و اُونا ره بخاطرِ بےایمانی و سخت‌دِلی ازوا سرزنِش کد، چراکه اُونا دَ تورای کسای باوَر نَکد که اُو ره بعد از دُوباره زِنده شُدون شی دِیدُد. ۱۵اوخته اُو دَزوا گُفت: ”دَ تمامِ دُنیا بورِید و خوشخبری ره دَ تمامِ مخلُوقات اِعلان کُنِید. ۱۶هر کسی که ایمان میره و غُسلِ تعمِید مِیگِیره نِجات پَیدا مُونه، مگم هر کسی که ایمان نَمیره، اُو محکُوم مُوشه. ۱۷و اینیا نشانی های اَسته که ایماندارا قد خُو دَره: اُونا دَ نامِ ازمه جِنیات ره بُر مُونه، دَ زِبونای نَو توره مُوگیه، ۱۸مار ها ره قد دِستای خُو باله مُونه و اگه زارِ کُشِنده ره وُچی کُنه دَزوا کُدَم ضَرَر نَمِیرَسَنه و اُونا دِستای خُو ره دَ بَلِه ناجورا میله و اُونا جور مُوشه.“
۱۹مَولا عیسیٰ بعد از توره گُفتو قد ازوا سُونِ آسمو بُرده شُد و دَ دِستِ راستِ خُدا شِشت. ۲۰و یارا بُرو رفته خوشخبری ره دَ هر جای اِعلان مُوکد و دَ عَینِ حال مَولا قد ازوا کار مُوکد و کلام خُو ره قد مُعجزه های که انجام مُوشُد، تصدِیق مُوکد.]