۱حمد-و-ثنا دَ خُداوند!
خُداوند ره قد تمامِ دِل خُو شُکر-و-سِپاس مُوگیُم،
دَ جَمِ آدمای نیک و دَ مینکلِ جمعیَت شی.
۲کارای خُداوند بُزُرگ اَسته؛
کسای که ازوا خوشی حاصِل مُونه، دَ باره شی تحقِیق مُوکُنه.
۳کارای ازُو پُر از شِکوه و جلال اَسته
و عدالت شی تا اَبَد پایَدار مُومنه.
۴اُو کارای عجِیب خُو ره دَ عِنوانِ یادگار باقی ایشت؛
خُداوند پُرفَیض و رحِیم اَسته.
۵اُو بَلدِه کسای که ازُو ترس دَره، روزی مِیدیه؛
اُو عهد خُو ره تا اَبَد دَ یاد خُو نِگاه مُونه.
۶اُو قُدرتِ کارای خُو ره بَلدِه قَوم خُو دَ زمانی نِشو دَد
که میراثِ مِلَّت ها ره دَزوا بخشِید.
۷کارای دِستای ازُو پُر از راستی و اِنصاف اَسته
و پگِ احکام شی قابِلِ اِعتِماد.
۸اُونا پایَدار اَسته تا اَبَداُلاباد
و قد راستی و عدالت اِجرا مُوشه.
۹اُو نِجات ره بَلدِه قَوم خُو رَیی کد
و عهد خُو ره تا اَبَد قد ازوا ضمانَت کد.
نامِ ازُو مُقَدَّس و باهَیبَت اَسته.
۱۰ترس از خُداوند شُروعِ حِکمت اَسته؛
تمامِ کسای که احکامِ ازُو ره دَ جای میره دَرک-و-فهمِ خُوب دَره.
حمد-و-ثناءِ خُداوند تا اَبَد باقی اَسته!