۱بَلدِه خُداوند سرُودِ نَو بِخانِید،
چراکه کارای عجِیب انجام دَده.
دِستِ راست و بازُوی مُقَدَّس شی اُو ره پیروز کده.
۲خُداوند نِجات خُو ره اِعلان کده،
و عدالت خُو ره دَ پیشِ چِیمِ مِلَّت ها بَرمَلا کده.
۳اُو رَحمت و وفاداری خُو ره
بَلدِه خانَوارِ اِسرائیل یادآوَری کده؛
پگِ گوشه های زمی نِجاتِ خُدای مو ره دِیده.
۴اَی تمامِ زمی، بَلدِه خُداوند آوازِ خوشی بُر کُنِید.
چِیغ بِزنِید، خوشی کُنِید و سرُود بِخانِید.
۵بَلدِه خُداوند قد بَربط سرُود بِخانِید،
قد بَربط و آوازِ ساز ها.
۶قد شیپُور ها و آوازِ سُرنَی
دَ حُضُورِ خُداوند، پادشاهِ مو آوازِ خوشی بُر کُنِید.
۷بیل که دریا و ھر چِیزی که دَ مَنِه ازُو اَسته، دَ جوش-و-خروش بییه،
دُنیا و باشِنده های شی ام.
۸بیل که دریاچه ها چَک-چَک کنه
و کوه ها یگجای سرُودِ خوشی بِخانه؛
۹ سرُودِ خوشی دَ حُضُورِ خُداوند،
چراکه اُو بَلدِه قضاوَتِ زمی مییه.
اُو دُنیا ره قد عدالت
و قَوم ها ره قد اِنصاف قضاوَت مُونه.