۱ از طرفِ پولُس، غُلامِ عیسیٰ مسیح که کُوی شُد تا رسُول بَشه و جدا شُد بَلدِه اِعلانِ خوشخبری خُدا ۲که خُدا پیش از پیش از طرِیقِ اَنبیای خُو دَ نوِشته های مُقَدَّس وعده کدُد. ۳ اِی خوشخبری دَ بارِه باچِه شی اَسته که اُو دَ مُطابِقِ جِسم از نسلِ داوُود پَیدا شُد ۴و قد قُدرت دَ مُطابِقِ روح اُلقُدس دَ وسِیلِه دُوباره زِنده شُدو از مُرده‌ها «باچِه خُدا» معرفی شُد، یعنی مَولای مو عیسیٰ مسیح. ۵دَ وسِیلِه ازُو مو فَیض یافتی و رسُول شُدی تا از مینکلِ تمامِ مِلَّت ها مردُم ره بخاطرِ نامِ ازُو دعوَت کُنی که اِطاعَت کده ایمان بیره ۶که شُمو ام دَ مینکلِ ازوا کُوی شُده های عیسیٰ مسیح اَستِید. ۷بَلدِه تمامِ عزِیزای خُدا که دَ شارِ رُوم اَستِید و کُوی شُدِید تا مُقَدَّسِین بَشِید: فَیض و سلامَتی از طرفِ آتِه مو خُدا و مَولای مو عیسیٰ مسیح نصِیبِ شُمو شُنه.
۸ دَ قَدمِ اوّل، خُدای خُو ره دَ وسِیلِه عیسیٰ مسیح بخاطرِ پگ شُمو شُکر-و-سِپاس مُوگُم، چُون ایمان شُمو دَ سراسرِ دُنیا مشهُور شُده. ۹خُدای که ما اُو ره قد روح-و-رَوان خُو دَ وسِیلِه اِعلانِ خوشخبری باچِه شی خِدمت مُونُم، شاهِد مه اَسته که ما شُمو ره همیشه یاد کده ۱۰دَ دُعا های خُو هر وخت درخاست مُونُم که بِلآخِره از یَگو طرِیق کامیاب شُنُم تا اگه خاستِ خُدا بَشه دَ پیش شُمو بییُم. ۱۱چُون کَلو شَوق دَرُم که شُمو ره بِنگرُم تا تُحفِه روحانی ره دَز شُمو بِرسَنُم که شُمو قَوی شُنِید؛ ۱۲یعنی تا یگجای دَ وسِیلِه ایمانِ یگدِیگِه خُو تشوِیق شُنی، ام مه و ام شُمو. ۱۳اَی بِرارو، ما نَمیخایُم که شُمو بےخبر بَشِید، ما بار ها قَصد کدُم که دَ پیش شُمو بییُم، مگم تا آلی ره یَگو چِیز مانِع اَمَدون مه شُده. ما میخایُم که دَ مینکلِ ازشُمو ام یَگو ثَمر دَشته بَشُم، امُو رقم که دَ مینکلِ دِیگه مردُمای غَیرِ یهُود دَرُم. ۱۴ما ام دَین‌دارِ یونانیا و بَربَریا اَستُم و ام از دانایو و نادانا. ۱۵امزی خاطر ما کَلو شَوق دَرُم که خوشخبری ره بَلدِه ازشُمو که دَ رُوم اَستِید، ام اِعلان کنُم.
۱۶ما از اِعلانِ خوشخبری نَنگ نَدرُم، چُون قُدرتِ خُدا بَلدِه نِجاتِ هر کسی اَسته که ایمان بیره، اوّل بَلدِه مردُمِ یهُود و بعد ازُو بَلدِه مردُمِ غَیرِ یهُود. ۱۷چُون دَ وسِیلِه خوشخبری عدالتِ خُدا بَرمَلا شُده موره، از طرِیقِ ایمان بَلدِه ایمان؛ امُو رقم که نوِشته شُده: ” شخصِ عادِل دَ وسِیلِه ایمان زِندگی مُونه.“
۱۸غَضَبِ خُدا از عالمِ باله دَ ضِدِ تمامِ بےخُدایی و شرارَتِ کسای ظاهِر شُد که دَ وسِیلِه شرارَت خُو مانِع حقِیقت مُوشه. ۱۹چُون چِیزی ره که اِنسان دَ بارِه خُدا فامِیده مِیتَنه، بَلدِه ازوا معلُومدار اَسته، چراکه خُدا اُو ره بَلدِه ازوا معلُومدار کده. ۲۰چُون چِیزای ازُو که دِیده نَمُوشه، یعنی قُدرتِ اَبَدی و ذاتِ اِلٰهی شی از شُروعِ خِلقتِ عالم دَ وسِیلِه چِیزای که اُو جور کده بطَورِ واضِح فامِیده و دِیده مُوشه؛ پس اُونا بانه نَدره. ۲۱چُون اگرچِه اُونا خُدا ره شِنَخت، ولے اُو ره بحَیثِ خُدا اِحتِرام نَکد و از شی شُکرگُزاری نَکد، بَلکِه دَ خیالات خُو باطِل شُد و دِل های نادانِ ازوا ترِیک شُد. ۲۲اُونا اِدعا مُوکد که دانا اَسته، مگم لَوڈه شُد ۲۳و جلالِ خُدای نیست ناشُدَنی ره قد بُت های که هَمشکلِ اِنسانِ نیست شُدَنی یا مُرغَکو یا چارپایا و یا خزِندَگو بُود، تَبدِیل کد.
۲۴امزی خاطر خُدا اُونا ره دَ وسِیلِه شهواتِ دِل های ازوا دَ ناپاکی تسلِیم کد تا دَ مینکلِ خودون خُو جِسمای خُو ره بےحُرمَت کُنه؛ ۲۵اُونا حقِیقتِ خُدا ره قد دروغ تبدِیل کد و چِیزای خَلق شُده ره دَ جای خالِق عِبادت و خِدمت کد، دَ حالِیکه تنها خُدا تا اَبَد لایقِ سِتایش اَسته. آمین.
۲۶امزی خاطر خُدا اُونا ره دَ هَوَس های شرم‌آوَرِ ازوا تسلِیم کد. حتیٰ خاتُونوی ازوا رابِطِه جِنسی طبیعی ره دَ غَیرِ طبیعی تبدِیل کد. ۲۷و دَ عَینِ رقم مَردا ام رابِطِه جِنسی طبیعی ره قد خاتُونو ایله کده دَ آتِشِ شهوَت بَلدِه یگدِیگه خُو دَر گِرِفت. مَرد قد مَرد مُرتکِب اعمالِ شرم‌آوَر شُد و دَ وجُود خُو جَزای گُناهِ خُو ره دِید که حقدار شی بُود. ۲۸و ازی که اُونا شِناختِ خُدا ره بااَرزِش نَدَنِست، خُدا اُونا ره دَ یگ فِکرِ فاسِد تسلِیم کد تا کارای ره انجام بِدیه که مُناسِب نِییه. ۲۹اُونا پُر از هر رقم بےعدالَتی، شرارَت، حِرص-و-طَمع و کِینه اَسته، پُر از حَسَد، قتل، نِزاع، مَکر و بَد نِیَتی. اُونا غَیبَت‌گر، ۳۰تُهمَت‌گر، از خُدا بَدبُر، بےاَدَب، مغرُور، لافُک و مَنشِه شرارَت اَسته و از اَیدِ آته-و-آبِه خُو نَمُوشه؛ ۳۱ اُونا لَوڈه، بےوَفا، بےاحساس و بےرَحم اَسته. ۳۲باوجُودِ که اُونا حُکمِ خُدا ره مِیدَنه که کسای که امی رقم کارا ره انجام مِیدیه سزاوارِ مَرگ اَسته، ولے اُونا نَه تنها امی کارا ره مُوکُنه، بَلکِه دَ کسای که انجام مِیدیه، آفرِین ام مُوگیه.