۱خوارِ ایماندار مو فِیبی ره که خِدمتگارِ جماعتِ ایماندارا دَ شارِ کِنخریا اَسته دَز شُمو معرفی مُونُم ۲تا اُو ره دَ نامِ مَولا پَذِیرایی کُنِید، امُو رقم که دَ بَینِ مُقَدَّسِین مُناسِب اَسته. دَ هر چِیزی که اُو دَز شُمو ضرُورَت دَشته بَشه قد شی کومَک کُنِید، چراکه اُو دَ غَدر کسا کومَک کده و دَ خود مه ام.
۳دَ پرِسکِلا و اَکِیلا که دَ راهِ خِدمت دَ مسیح عیسیٰ همکارای مه اَسته، سلام بِرسَنِید. ۴اُونا بخاطرِ جانِ ازمه سر خُو ره دَ خطر اَندخت. نَه تنها مه، بَلکِه پگِ جماعت های ایماندارای غَیرِ یهُود ازوا تَشَکُری مُونه. ۵امچُنان دَ جماعتِ ایماندارای که دَ خانِه ازوا جَم مُوشه سلام بِرسَنِید. دَ دوستِ عزِیز مه اِپَنیطُس که اوّلِین ایماندارِ اَسته سلام بِرسَنِید. ۶دَ مریَم که بَلدِه رُشد شُمو غَدر سخت زَحمت کشِیده، سلام بِرسَنِید. ۷دَ قَومای مه اَندرونیکاس و یُونیه که قد ازمه یگجای بَندی بُود، سلام بِرسَنِید؛ اُونا دَ مینکلِ رسُولا مشهُور اَسته و از مه پیش دَ مسیح ایمان اَوُرده. ۸دَ اَمپلیاتُس که دَ رفاقتِ مَولا دوستِ عزِیز مه یَه، سلام بِرسَنِید. ۹دَ اوربانُس که دَ خِدمتِ مسیح همکار مو اَسته و دَ استاخِیس دوستِ عزِیز مه، سلام بِرسَنِید. ۱۰دَ آپِلیس که دَ خِدمتِ مسیح ثابِت شُده، سلام بِرسَنِید. دَ کسای که دَ خانَوارِ اَرِستوبولُس تعلُق دَره، سلام بِرسَنِید. ۱۱دَ قَومای مه هیرودیون و دَ کسای که دَ خانَوارِ نرکیسوس دَ مَولا ایمان دَره سلام بِرسَنِید. ۱۲دَ تریفینا و تریفوسا که دَ راهِ خِدمت دَ مَولا زَحمت کشِیده، سلام بِرسَنِید. دَ پرسیسِ عزِیز که دَ راهِ خِدمت دَ مَولا زَحمت کشِیده، سلام بِرسَنِید. ۱۳دَ رُوفُس که دَ خِدمتِ مَولا اِنتِخاب شُده و دَ آبِه شی که آبه خاندِه مه اَسته، سلام بِرسَنِید. ۱۴دَ اَسینکریتُس، فلیگون، هِرمِس، پَطروباس، هِرماس و دِیگه بِرارو که قد ازوا اَسته، سلام بِرسَنِید. ۱۵دَ فِیلولوگوس، یُولیه، نیریاس و خوار شی و دَ اولیمپاس و پگِ مُقَدَّسِینِ که قد ازوا اَسته، سلام بِرسَنِید. ۱۶یگدِیگِه خُو ره قد رُوی ماخی مُقَدَّسانه سلام بُگِید. تمامِ جماعت های ایماندارای مسیح ام دَز شُمو سلام مُوگیه.
۱۷اَی بِرارو، دَز شُمو تاکِید مُونُم که فِکر خُو ره سُون کسای بِگِیرِید که دَ مینکل شُمو تفرِقه مِیندَزه و مانِع راهِ شُمو مُوشه و برخِلافِ تعلِیمی که شُمو حاصِل کدِید رفتار مُونه؛ ازوا دُوری کُنِید. ۱۸چُون اِی رقم نفرا مَولای مو مسیح ره خِدمت نَمُونه، بَلکِه کَوره های خُو ره خِدمت مُونه و قد توره های نَرم و شِیرِین دِل های ساده-دِل ها ره بُرده اُونا ره بازی مِیدیه. ۱۹ازی که اِطاعَت شُمو دَ پگ معلُومدار شُده، ما دَ بارِه شُمو خوشحال اَستُم. پس ما میخایُم که شُمو دَ نیکی کدو دانا بَشِید و دَ بَدی کدو نادو. ۲۰خُدای صُلح-و-سلامَتی دَ زُودی شَیطو ره دَ تَی پای شُمو جَو جَو مُونه! فَیضِ مَولای مو عیسیٰ مسیح نصِیب شُمو شُنه.
۲۱تِیموتائوس همکار مه و لُوکیوس و یاسون و سوسِیپاتروس قَومای مه دَز شُمو سلام مُوگیه. ۲۲ما تِرتیوس که نوِشته کُنِندِه امزی خط اَستُم، دَز شُمو دَ نامِ مَولا سلام مِیرسَنُم. ۲۳غایوس که ما و تمامِ جماعتِ ایماندارا مِهمون شی اَستی، دَز شُمو سلام مِیرسَنه. اِرَستوس خزانه‌دارِ شار و بِرار مو کوارتوس دَز شُمو سلام مُوگه. ۲۴[فَیضِ مَولای مو عیسیٰ مسیح نصِیبِ پگ شُمو شُنه. آمین.]
۲۵آلی حمد-و-ثنا دَ خُدای که قُدرت دَره شُمو ره دَ مُطابِقِ خوشخبری که دَ بارِه عیسیٰ مسیح موعِظه مُونُم قُوَت بِدیه، دَ مُطابِقِ بَرمَلا شُدونِ رازی که از زمانای گاه تاشه نِگاه شُدُد، ۲۶لیکِن آلی بَرمَلا شُده. امُو راز از طرِیقِ نوِشته های اَنبیا مُطابِقِ حُکمِ خُدای اَزَلی-و-اَبَدی دَ تمامِ مِلَّت ها فامَنده شُده تا اِطاعَت کده ایمان بیره. ۲۷دَ خُدای یکتا و دانا دَ وسِیلِه عیسیٰ مسیح تا اَبَداُلاباد بُزُرگی-و-جلال باد! آمین.