دوهم تواریخ په پشتو ژبه

دوهم فصل

د څښتن د کور د جوړولو تیاری

(لومړی پاچاهان ۵‏:‌۱‌‏-‌۱۸)

۱ سلیمان پرېکړه وکړه چې د څښتن په نوم د عبادت دپاره یو کور او د خپل ځان دپاره یوه ماڼۍ جوړه کړي. ۲ هغه اویا زره تنه د ودانۍ د موادو د وړلو په کار او اتیا زره تنه یې د غونډیو څخه د تیږو د پرېکولو په کار بوخت کړل. هغه درې زره شپږ سوه سړي د دې دپاره غوره کړل چې د دغو کارګرانو د کار څارنه وکړي.

۳ سلیمان د صور پاچا حیرام ته دا لاندې پیغام ورولېږه:

پخوا کله چې زما پلار داود خپله ماڼۍ ودانوله، تاسو ورته د سبر د ونې لرګي رسول. اوس یې ماته هم راولېږئ. ۴ ګورئ، زه د خپل څښتن خدای په نوم یو کور ودانوم. زه به دا کور هغه ته وقفوم چې هلته خوشبویي وسوځیږي او تل سپېڅلې ډوډۍ هغه ته وړاندې شي. سوځېدونکې نذرانې به هر سهار او ماښام، د هر سبت په ورځ، د نوې میاشتې په اخترونو او د نورو سپېڅلو ورځو په لړ کې زمونږ څښتن خدای ته د هغه د عزت دپاره وړاندې شي. دا کارونه به تل کیږي لکه څنګه چې څښتن اسراییلو ته حکم کړی دی.

۵ هغه کور چې زه یې ودانوم هغه به ډېر لوی وي، ځکه چې زمونږ خدای د نورو ټولو خدایانو څخه لوی دی. ۶ خو څوک کولای شي چې خدای ته یو کور جوړ کړي؟ حتی دا اوچت او لوی اسمانونه هم د هغه د اوسېدلو دپاره کوچني دي! زه چې څه کولای شم هغه دا دي چې یو ځای جوړ کړم چې هغه ته په کې قربانۍ وسوځول شي.

۷ اوس ماته یو داسې سړی راولېږه چې په نقش ویستلو کې او همدارنګه د سرو او سپینو زرو، د برنجو او د اوسپنې په کار او د بانجاني، سرو او اسماني رنګو ټوکرو په اوبدلو کې ماهر وي. هغه به د یهودا او اورشلیم د هغو کسبګرو سره یوځای کار کوي چې زما پلار داود غوره کړي وو.

۸ تاسو ماته یو څه د سبر، سروې او د نښتر د ونو لرګي راولېږئ. زه پوهېږم چې تاسو داسې کارګران لرئ چې د لبنان د لرګیو په پرې کولو کې ماهر دي. زما کارګران به هلته ستاسو د کسانو سره مرسته کوي، ۹ ځکه چې د یو داسې لوی، پرتمین او د جلال نه ډک کور د ودانولو دپاره به زه ډېرو لرګیو ته اړتیا ولرم. ۱۰ زه به ستا د لرګیو پرې کوونکو ته دوه زره ټنه غنم ورکړم، په همدې اندازه اوربشې به هم ورکړم، څلور لکه لیتره شراب او په همدې اندازه د زیتونو تېل به ورکړم.

۱۱ حیرام پاچا سلیمان ته په ځواب کې یو لیک ورولېږه. هغه داسې ولیکل:

له دې امله چې څښتن د خپل قوم سره مینه کوي، تاسو یې د هغوی د پاچا په توګه غوره کړي یئ. ۱۲ ثنا او صفت دې وي د اسراییلو څښتن خدای ته چې د ځمکې او د اسمانونو پیدا کوونکی دی! هغه داود پاچا ته یو داسې زوی ورکړی دی چې د حکمت خاوند دی او د علم او د پوهې څخه ډک دی او اوس دا پلان لري چې د څښتن دپاره کور او د خپل ځان دپاره ماڼۍ جوړه کړي.

۱۳ دا دی زه تاسو ته حورام‌ابي درلېږم. هغه یو ماهر او تجربه لرونکی کسبګر دی. ۱۴ د هغه مور د دان د قبیلې څخه ده او پلار یې د صور څخه دی. هغه په دې پوهیږي چې څنګه د سرو او سپینو زرو، برنجو، اوسپنو، تیږو او لرګیو څخه شیان جوړ کړي. هغه د بانجاني او اسماني او د سرو ټوکرو او کتان سره کار کولای شي. هغه د هر ډول نقشونو کار کولای شي او د هر ډول نقشونو وړاندیز چې ورته وشي، هغه یې جوړولی شي. پرېږدئ چې هغه ستاسو د ماهرو کارګرانو او د هغو کارګرانو سره کار وکړي چې ستاسو د پلار یعنې داود پاچا دپاره یې کار کاوه.

۱۵ نو مونږ ته هغه غنم، اوربشې، د زیتونو تېل او شراب راولېږئ چې تاسو یې وعده کړې وه. ۱۶ مونږ به د لبنان په غرونو کې ستاسو د اړتیا وړ ونې ووهو، هغه به د یو بل سره وتړو او په بحیره کې به یې لاهو کړو چې تر یافا پورې ورسیږي. د هغه ځای نه یې تاسو کولای شئ چې اورشلیم ته یوسئ.

د خدای د کور جوړېدل پیل کیږي

۱۷ سلیمان ټول هغه پردي خلک وشمېرل چې په اسراییلو کې اوسېدل لکه څنګه چې د هغه پلار داود شمېرلي وو او د هغوی ټول شمېر یو لک او دري پنځوس زره او شپږ سوه تنه وو. ۱۸ هغه اویا زره تنه د ودانۍ د موادو د وړلو په کار او اتیا زره تنه یې د غونډیو څخه د تیږو د پرېکولو په کار بوخت کړل. هغه درې زره او شپږ سوه تنه نور د دې دپاره غوره کړل چې د کارګرانو د کار څارنه او په خلکو باندې کار وکړي.