۱ بیا موسی او هارون فرعون ته ورغلل او ورته ویې ویل: «د اسراییلو څښتن خدای وایي: ‹زما قوم پرېږده چې دښتې ته لاړ شي او هلته زما د درناوي په خاطر اختر ولمانځي.›» ۲ فرعون وویل: «څښتن څوک دی؟ زه ولې د هغه خبرو ته غوږ ونیسم او اسراییلیان پرېږدم چې لاړ شي؟ زه څښتن نه پېژنم او نه به اسراییلو ته د تګ اجازه ورکړم.» ۳ هغوی په ځواب کې وویل: «د عبرانیانو خدای مونږ ته راښکاره شوی دی. مونږ پرېږده چې د درېو ورځو دپاره په دښته کې سفر وکړو، ترڅو خپل څښتن خدای ته قرباني وړاندې کړو. که نه، نو هغه به مونږ د ناروغیو او جګړې په وسیله ووژني.» ۴ فرعون موسی او هارون ته وویل: «تاسو ولې خلک له کاره وباسئ؟ هر یو بېرته په خپل کار پسې لاړ شئ! ۵ ستاسو شمېر له مصریانو څخه زیات شوی دی او اوس غواړئ چې کار بس کړئ!»
۶ په هماغه ورځ فرعون د غلامانو په مصري مسوولانو او د اسراییلي کارګرانو په مشرانو امر وکړ: ۷ «نور خلکو ته د خښتو جوړولو دپاره بوس مه ورکوئ. هغوی ته ووایئ چې لاړ شي او په خپله یې د ځانونو دپاره پیدا کړي. ۸ خو هغوی باید دومره خښتې جوړې کړي څومره یې چې پخوا جوړولې. هغوی تنبلان دي، ځکه ماته زارۍ کوي چې هغوی پرېږدم چې لاړ شي او خپل خدای ته قرباني وړاندې کړي! ۹ په هغوی باندې سخت کار وکړئ او بوخت یې وساتئ چې د داسې دروغو اورېدلو دپاره وخت ونه لري.»
۱۰ نو د غلامانو مسوولان او د کارګرانو مشران راغلل او ویې ویل: «فرعون وایي: زه به نور تاسو ته بوس درنه کړم. ۱۱ لاړ شئ او هر چېرته چې کولای شئ د ځانونو دپاره بوس پیدا کړئ، خو بیا به همدومره خښتې جوړوئ څومره چې مو مخکې جوړولې.» ۱۲ نو خلک په ټول مصر کې وګرځېدل، ترڅو د ځانونو دپاره بوس پیدا کړي. ۱۳ د غلامانو مسوولانو به په هغوی فشار اچاوه او هغوی ته به یې ویل: «تاسو باید هره ورځ دومره خښتې جوړې کړئ څومره چې تاسو هغه وخت جوړولې چې بوس درته درکول کېدل.» ۱۴ د غلامانو مصري مسوولانو به هغه اسراییلي مشران وهل چې په دوی باندې یې مقرر کړي وو او ورته ویل به یې: «تاسو نن سبا دا غلامان ولې نه مجبوروئ چې دومره خښتې جوړې کړي څومره چې هغوی مخکې جوړولې؟»
۱۵ په اخر کې د کارګرانو مشران فرعون ته ورغلل او ورته ویې ویل: «تاسو ولې زمونږ سره داسې چلند کوئ؟ ۱۶ مونږ ته هېڅوک بوس نه راوړي، خو بیاهم امر راته کیږي چې هماغومره خښتې جوړې کړو. هغوی مونږ وهي، حال دا چې ستاسو خپل خلک ملامت دي.» ۱۷ فرعون په ځواب کې وویل: «تاسو تنبلان یئ او نه غواړئ چې کار وکړئ. په دې خاطر ماته وایئ چې تاسو پرېږدم چې لاړ شئ او څښتن ته قرباني وړاندې کړئ. ۱۸ اوس خپل کار پسې لاړ شئ! تاسو ته به بوس نه درکول کیږي، خو بیاهم په هماغه اندازه خښتې جوړې کړئ.» ۱۹ د کارګرانو مشران پوه شول چې د هغوی حال نور هم خراب شو کله چې فرعون په هغوی امر وکړ چې تاسو به هغومره خښتې جوړوئ لکه مخکې به چې تاسو جوړولې.
۲۰ څنګه چې هغوی د فرعون له دربار څخه ووتل، د موسی او هارون لیدلو ته چې ورته په انتظار وو، لاړل. ۲۱ هغوی موسی او هارون ته وویل: «تاسو چې څه کړي دي هغه څښتن لیدلي دي او تاسو دواړو ته به سزا درکړي، ځکه چې ستاسو د لاسه فرعون او د هغه درباریان زمونږ څخه کرکه کوي. تاسو هغوی ته بهانه په لاس ورکړه چې مونږ ووژني.»
۲۲ موسی بېرته څښتن ته ورغی او ویې ویل: «ای څښتنه، ولې دې خپل قوم د بدبختیو سره مخامخ کړی دی؟ ایا زه دې د همدې دپاره رالېږلی یم؟ ۲۳ له هغه وخت څخه چې تا ماته وویل چې د فرعون سره خبرې وکړه، هغه ورباندې ظلم کوي او تا د هغوی سره هېڅ مرسته ونه کړه.»