۱ څښتن موسی ته وویل: «زه به تا فرعون ته لکه د خدای په شان کړم او ستا ورور هارون به ستا د پیغمبر په توګه د هغه سره خبرې کوي. ۲ زه چې تاته د هر شي په اړه حکم کوم، هغه هارون ته ووایه او هغه به فرعون ته ووایي چې اسراییلیان پرېږدي چې د مصر د خاورې څخه لاړ شي. ۳-۴ خو زه به د فرعون زړه سخت کړم او هغه به ستا خبرو ته غوږ نه نیسي. حتی که زه ډېرې وېروونکې معجزې هم هغه او مصریانو ته وروښایم هغه به درته غوږ ونه نیسي. بیا به زه په مصر باندې سخت عذاب نازل کړم او د خپل قوم خلک یعنې اسراییل به له هغه ځای څخه وباسم. ۵ کله چې زه مصریانو ته خپل قدرت وښایم او اسراییلیان د هغوی له وطنه وباسم، بیا به هغوی پوه شي چې زه څښتن یم.» ۶ څنګه چې څښتن موسی او هارون ته حکم کړی ؤ، هغوی هماغسې وکړل. ۷ هغه وخت چې هغوی د فرعون سره خبرې وکړې، موسی د اتیا کالو او هارون د دري اتیا کالو په عمر ؤ.
۸ څښتن موسی او هارون ته وویل: ۹ «که چېرې فرعون تاسو ته ووایي چې ماته یوه معجزه وښایئ، بیا هارون ته ووایه چې خپله امسا راواخلي او د فرعون په مخکې یې وغورځوي او هغه به په مار بدله شي.» ۱۰ نو موسی او هارون فرعون ته ورغلل او هماغسې یې وکړل څنګه چې څښتن ورته حکم کړی ؤ. هارون خپله امسا د فرعون او د هغه د درباریانو په مخکې وغورځوله او هغه په مار بدله شوه. ۱۱ بیا فرعون خپل حکیمان او جادوګران راوغوښتل. هغوی هم د خپلې جادو په وسیله دا کار وکړ. ۱۲ هغوی هر یو خپلې امساګانې په ځمکه وغورځولې او هغه امساګانې په مارانو بدلې شوې. خو د هارون مار هغه نور ماران روغ تېر کړل. ۱۳ بیاهم د فرعون زړه سخت پاتې شو او څنګه چې څښتن ویلي وو، فرعون موسی او هارون ته غوږ ونه نیوه.
۱۴ بیا څښتن موسی ته وویل: «د فرعون زړه ډېر سخت دی او د اسراییلو قوم نه پرېږدي چې لاړ شي. ۱۵ سهار کله چې فرعون د نیل سیند ته ځي خپله امسا چې په مار بدله شوې وه هغه هم د ځان سره یوسه او د سیند په غاړه هغه ته انتظار وکړه. ۱۶ بیا هغه ته ووایه: څښتن د عبرانیانو خدای زه رالېږلی یم چې تاته داسې ووایم: زما قوم پرېږده چې دښتې ته لاړ شي او هلته زما عبادت وکړي. خو تر اوسه پورې دې ورته پام نه دی کړی. ۱۷ اعلیحضرته، څښتن داسې وایي: زه به داسې کار وکړم چې ته پوه شې چې زه څښتن یم. اوس ګوره، دا امسا چې زما په لاس کې ده، په دې به د نیل د سیند اوبه ووهم او هغه به په وینه بدلې شي. ۱۸ د سیند ماهیان به مړه شي او د نیل سیند به بد بوی کوي. مصریان به نه شي کولای چې له هغه څخه اوبه وڅښي.»
۱۹ څښتن موسی ته وویل: «هارون ته ووایه چې خپله امسا د ځان سره یوسي او د مصر د اوبو یعنې ویالو، نهرونو او ډنډونو خواته یې ونیسي چې هغه به په وینو بدلې شي. د مصر په هرځای کې به اوبه په وینو باندې بدلې شي، حتی د خلکو په کورونو کې به هم د لرګیو په لوښو او د تیږو په منګیو کې وینه وي.»
۲۰ بیا موسی او هارون د څښتن په حکم باندې عمل وکړ. د فرعون او د هغه د درباریانو په حضور کې هارون خپله امسا پورته کړه او د سیند اوبه یې په هغې ووهلې او ټولې اوبه چې په کې وې په وینه بدلې شوې. ۲۱ د سیند ماهیان مړه شول او سیند دومره ډېر بد بوی کاوه چې مصریانو نه شو کولای چې له هغه څخه اوبه وڅښي. د مصر په هر ځای کې وینه وه. ۲۲ بیا د فرعون جادوګرانو هم د خپلې جادو په وسیله همداسې عمل سرته ورساوه او د فرعون زړه د مخکې په شان سخت پاتې شو. لکه څنګه چې څښتن ویلي وو، فرعون د موسی او هارون خبرو ته غوږ ونه نیوه. ۲۳ د دې په ځای چې هغه دې خبرې ته پام وکړي، هغه بېرته راستون شو او خپلې ماڼۍ ته لاړ. ۲۴ ټولو مصریانو د نیل د سیند غاړه وکیندله چې د څښلو اوبه راپیدا کړي، ځکه چې هغوی نه شو کولای د سیند اوبه وڅښي.
۲۵ د هغه وخت څخه چې څښتن د نیل د سیند اوبه په وینه باندې بدلې کړې، پوره اووه ورځې تېرې شوې.