د هجرت کتاب

اتم فصل

د چونګښو بلا

۱ بیا څښتن موسی ته وویل: «فرعون ته ورشه او هغه ته ووایه چې څښتن وایي: زما قوم پرېږده چې لاړ شي او زما عبادت وکړي. ۲ که چېرې ته د هغوی د پرېښودلو څخه انکار وکړې، زه به ستا په ټول هېواد باندې د چونګښو بلا نازله کړم. ۳ د نیل سیند به د چونګښو څخه ډک شي. هغوی به ستا ماڼۍ او ستا د خوب کوټې ته درننوځي او ستا کټ ته به دروخېژي. حتی ستا د قوم او د درباریانو کورونو او ستا تنورونو او د خمیره کولو لګنونو ته به هم ورننوځي. ۴ چونګښې به ستا، ستا د قوم او ستا د ټولو درباریانو سرونو باندې ټوپونه وهي.»

۵ څښتن موسی ته وویل: «هارون ته ووایه: خپله امسا د ویالو، نهرونو او ډنډونو خواته ونیسه، ترڅو چونګښې دباندې ووځي او د مصر ځمکه په هغو پټه شي.» ۶ نو هارون خپله امسا د اوبو په سر ونیوله او چونګښې راووتلې او ځمکه ورباندې پټه شوه. ۷ خو جادوګرانو هم همداسې کار وکړ. هغوی هم د جادو په وسیله چونګښې ځمکې ته راوویستلې.

۸ فرعون موسی او هارون راوغوښتل او ورته ویې ویل: «تاسو څښتن ته دعا وکړئ چې زمونږ څخه دا چونګښې لېرې کړي، نو زه به ستاسو قوم پرېږدم چې لاړ شي او څښتن ته قربانۍ وړاندې کړي.» ۹ موسی په ځواب کې وویل: «زه به ستا دپاره دعا وکړم. ماته وخت وټاکه چې زه کله ستا، ستا د درباریانو او ستا د قوم دپاره دعا وکړم. بیا به تاسو او ستاسو کورونه د چونګښو څخه خلاص شي او یوازې د نیل په سیند کې به چونګښې پاتې شي.»

۱۰ فرعون په ځواب کې وویل: «سبا زما دپاره دعا وکړه.» موسی وویل: «څنګه چې ستا خوښه وي زه به هماغسې وکړم. بیا به ته پوه شې چې زمونږ د څښتن خدای په شان بل خدای نشته. ۱۱ ته، ستا درباریان او ستا خلک به له چونګښو څخه خلاص شئ او چونګښې به د نیل د سیند څخه پرته په بل ځای کې پاتې نه شي.» ۱۲ بیا موسی او هارون د فرعون څخه لاړل او موسی څښتن ته سوال وکړ چې هغه چونګښې له منځه یوسي چې څښتن په فرعون باندې نازلې کړې وې. ۱۳ څښتن د موسی سوال قبول کړ او هغه چونګښې چې په کورونو، حوېلیو او پټیو کې وې، مړې شوې. ۱۴ مصریانو هغه ډېرۍ کړې او ټوله ځمکه بد بوی ونیوله. ۱۵ کله چې فرعون ولیدل چې چونګښې مړې شوې، هغه بیا خپل زړه سخت کړ او لکه څنګه چې څښتن ویلي وو، هغه د موسی او هارون خبرو ته غوږ ونه نیوه.

د میاشو بلا

۱۶ بیا څښتن موسی ته وویل: «هارون ته ووایه چې په خپله امسا باندې ځمکه ووهي چې د مصر ټولې خاورې په میاشو بدلې شي.» ۱۷ نو هارون ځمکه په امسا باندې ووهله او د مصر ټولې خاورې په میاشو بدلې شوې او ټول انسانان او حیوانات په کې پټ شول. ۱۸ جادوګرانو هڅه وکړه چې د جادو په وسیله میاشي پیدا کړي، خو هغوی ونه شو کولای. انسانانو او حیواناتو پورې میاشي نښتي وو. ۱۹ جادوګرانو فرعون ته وویل: «دا کار خدای کړی دی!» خو د فرعون زړه سخت ؤ او څنګه چې څښتن ویلي وو، فرعون د موسی او هارون خبرو ته غوږ ونه نیوه.

د مچانو بلا

۲۰ څښتن موسی ته وویل: «سبا سهار وختي پاڅه او کله چې فرعون سیند ته ځي، ورشه او ورسره وګوره او هغه ته ووایه چې څښتن داسې وایي: زما قوم پرېږده چې لاړ شي او زما عبادت وکړي. ۲۱ که ته زما قوم پرېنږدې چې لاړ شي، زه به په تا، ستا په درباریانو او ستا په قوم او په کورونو باندې مچان نازل کړم. د مصریانو کورونه به د مچانو څخه ډک شي او ځمکه به ورباندې پټه شي. ۲۲ خو زه به د جوشن سیمه چې زما قوم په کې اوسيږي، وژغورم چې هلته هېڅ مچان نه وي. دا کار د دې دپاره کوم، ترڅو تاسو پوه شئ چې زه حتی په دې خاوره باندې هم اختیار لرم. ۲۳ زه به ستا او د خپل قوم ترمنځ ښکاره فرق وکړم. دا معجزه به سبا پېښیږي.» ۲۴ نو څښتن د فرعون په ماڼۍ او د هغه د درباریانو په کورونو باندې ډېر زیات مچان نازل کړل. مچانو د مصر ټول هېواد وران کړ.

۲۵ بیا فرعون موسی او هارون راوغوښتل او هغوی ته یې وویل: «لاړ شئ او په همدې هېواد کې خپل خدای ته قربانۍ وړاندې کړئ.» ۲۶ موسی په ځواب کې وویل: «دا ښه کار نه دی. ځکه مصریان به زمونږ څخه خفه شي چې مونږ خپل څښتن خدای ته حیوانات قرباني کړو. که چېرې دا حیوانات په داسې ځای کې قرباني کړو چې مصریان مو وویني، نو هغوی به مونږ سنګسار کړي. ۲۷ لکه څنګه چې زمونږ څښتن خدای حکم کړی دی، مونږ باید هغه ته د قربانۍ وړاندې کولو په خاطر درې ورځې په دښته کې سفر وکړو.» ۲۸ فرعون وویل: «زه به تاسو پرېږدم چې لاړ شئ او خپل څښتن خدای ته په دښته کې قربانۍ وړاندې کړئ. خو ډېر لېرې لاړ نه شئ او زما دپاره دعا وکړئ.» ۲۹ موسی په ځواب کې وویل: «څنګه چې زه لاړ شم، نو ستا دپاره به دعا وکړم چې څښتن ستا، ستا له درباریانو او ستا له قوم څخه مچان لېرې کړي. خو ته به بیا مونږ نه غولوې او د قوم مخنیوی به نه کوې چې هغوی څښتن ته قرباني وړاندې کړي.» ۳۰ موسی د فرعون څخه لاړ او څښتن ته یې دعا وکړه. ۳۱ څښتن د موسی دعا قبوله کړه. مچانو فرعون، د هغه درباریان او د هغه قوم پرېښودل. یو مچ هم پاتې نه شو. ۳۲ خو دا ځل هم فرعون خپل زړه سخت کړ او د اسراییلو قوم یې پرېنښود چې لاړ شي.