۱ څښتن یوځل بیا ماته وویل: ۲ «ای فاني انسانه، د اورشلیم خلک د هغوی د کرکې وړ کارونو څخه خبر کړه. ۳ اورشلیم ته ووایه چې څښتن تعالی ورته داسې وایي: ‹ستا د زېږېدنې اصلي ځای کنعان دی. ستا پلار اموری ؤ او مور دې حیتۍ وه. ۴ کله چې ته پیدا شوې، نو هېچا ستا نوم غوڅ نه کړ، نه چا ولمبولې، نه یې مالګه درباندې وموښله او نه یې په اورڼي کې تاو کړې. ۵ هېچا درباندې رحم ونه کړ. کله چې ته پیدا شوې، نو هېچا په مینه دا کارونه ستا دپاره نه کول، بلکې تاته یې د کرکې په سترګه کتل، نو ته یې د زېږېدلو په وخت کې په صحرا کې وغورځولې.
۶ کله چې زه ستا له څنګ نه تېرېدم، نو ته مې ولیدلې چې په خپلو وینو کې لاسونه او پښې وهې. خو ما غوښتل چې ته ژوندۍ پاتې شې او مړه نه شې. ۷ لکه د بوټي په شان مې لویه کړې. ته لویه شوې او قد دې لوړ شو او یوه پېغله درڅخه جوړه شوه. تیونه دې غټ شول او د بدن ویښتان دې راشنه شول، خو په پوره توګه لوڅه وې.
۸ کله چې زه بیا ستا له څنګ نه تېرېدم، نو ومې لیدل چې پېغله شوې یې او ستا د واده کولو وخت دی. په دې خاطر مې خپله چپنه درباندې واچوله، ستا لوڅ بدن مې پټ کړ او وعده مې درسره وکړه چې مینه به درسره کوم. هو، ما درسره د واده کولو لوظ وکړ او ته زما شوې.›» څښتن تعالی داسې ویلي دي. ۹ «بیا ما په اوبو ولمبولې او ستا وینې مې پاکې کړلې. ستا پوستکی مې د زیتونو په تېلو باندې غوړ کړ. ۱۰ ګلدوزي شوي کالي مې درواغوستل، ډېر ښه د څرمن بوټان مې درته په پښو کړل او د کتان او د ورېښمو قیمتي کالي مې درواغوستل. ۱۱ په ګاڼو مې ته ښایسته کړې، بنګړي مې درته په لاس کړل او غاړهکۍ مې درته واچوله. ۱۲ پېزوان او غوږوالۍ مې درواچولې او ښکلی تاج مې درته په سر کړ. ۱۳ ته د سرو او سپینو زرو په ګاڼو باندې ښایسته شوې او ګلدوزي شوي د کتان او ورېښمو قیمتي کالي به دې اغوستل. د ښو اوړو نه پخه شوې ډوډۍ، شات او د زیتونو تېل به دې خوړل. ته ډېره ښکلې شوې او ملکه درڅخه جوړه شوه. ۱۴ د خپل بېشانه ښایست له امله په هر قوم کې مشهوره شوې، ځکه چې دا زه وم چې ته مې دومره ښکلې کړې.» څښتن تعالی داسې ویلي دي.
۱۵ «خو تا په خپل ښایست باندې تکیه وکړه او د خپل شهرت نه دې ګټه واخیستله ترڅو بدلمنه شې. هرڅوک چې راتله، نو ته ورسره څملاستلې او ستا د ښایست نه به یې خوند اخیست. ۱۶ تا په خپلو ښکلیو کالیو باندې بتخانې ښایسته کړې او د یوې بدلمني ښځې په شان دې خپل ځان د هر چا په اختیار کې ورکړ. تا داسې کار وکړ چې هیچا تر اوسه نه ؤ کړی او نه به یې وکړي. ۱۷ ما چې تاته د سرو او سپینو زرو کوم ښایسته ګاڼې درکړې وې، د هغو څخه دې د نرانو مجسمې جوړې کړې او هغوی ته دې په عبادت کولو سره د یوې بدلمنې په شان عمل وکړ. ۱۸ ما چې تاته کوم ګلدوزي شوي کالي درکړي وو، هغه دې بتانو ته واغوستل او زما د زیتونو تېل او خوشبویي دې هم بتانو ته وړاندې کړل. ۱۹ ما تاته خواړه، ښه اوړه، د زیتونو تېل او شات درکړل، خو تا هغه د قربانۍ په توګه بتانو ته وړاندې کړل چې ورباندې خوشحاله شي. دا هغه څه دي چې څښتن تعالی یې وایي.
۲۰ تا چې زما دپاره کوم زامن او لورګانې راوړې وې، هغه دې بتانو ته د خوراک دپاره د قربانۍ په توګه وړاندې کړل. ایا هغه بدلمنتوب دې بس نه ؤ ۲۱ چې زما اولادونه دې حلال کړل او بتانو ته دې د سوځېدونکې نذرانې په توګه وړاندې کړل؟ ۲۲ تا د خپلې زناکارۍ او د کرکې وړ ژوند په دوران کې هېڅکله خپل ماشومتوب در په یاد نه کړ چې په پوره توګه لوڅه وې او په خپلو وینو کې دې لاسونه او پښې وهلې.
۲۳ څښتن تعالی داسې وویل: ‹افسوس ستا په حال! افسوس ستا په حال! برسېره په هغو بدو کارونو چې تا وکړل، ۲۴ بیا دې په هر چوک کې د بتانو د عبادت او د بدلمنتوب دپاره ځایونه جوړ کړل. ۲۵ هو، تا د هرې کوڅې په سر کې د بدلمنتوب دپاره ځایونه جوړ کړل او خپل ښایست دې د کرکې وړ کړ او هرڅوک چې به تېرېده تا به ورسره زنا کوله او ستا زناکاري ورځ په ورځ زیاتېدله. ۲۶ ته د خپلو شهوتپرسته ګاونډیانو یعنې مصریانو سره څملاستلې او په خپلې زیاتېدونکې زناکارۍ سره دې زه په قهر کړم.
۲۷ نو بیا مې خپل لاس پورته کړ چې سزا درته درکړم او ستا ځمکه مې کمه کړه. ته مې خپلو دښمنانو یعنې فلسطیني ښځو ته چې ستا د بداخلاقۍ نه کرکه کوي، تسلیم کړې یې. ما هغوی پرېښودل څه چې زړه یې غواړي، درسره وکړي.
۲۸ تا د آشوریانو سره زناکاري وکړه، ځکه چې ستا شوق نه پوره کېده او حتی له هغې وروسته هم ستا شوق پوره نه شو. ۲۹ همدارنګه تا د بابلیانو سره چې د سوداګرانو قوم دی، خپل بدلمنتوب نور هم زیات کړ، خو هغوی هم ونه شو کولی چې ستا شويق پوره کړي.›
۳۰ څښتن تعالی داسې وایي: ‹زه دې ډېر په قهر کړم، ځکه چې تا د یوې بېشرمې بدلمنې په شان دا ټول کارونه وکړل او دا دې وښودل چې هرڅه چې دې زړه وغواړي هغه کوې. ۳۱ تا د هرې کوڅې په سر کې د بتانو د عبادت ځایونه او په هر چوک کې دې د بدلمنتوب دپاره ځایونه جوړ کړل. خو تا دا کار د نورو بدلمنو ښځو په شان د پیسو په خاطر نه کاوه او پیسې دې ردولې. ۳۲ ته د هغې ښځې په شان یې چې د دې په ځای چې د خپل مېړه سره مینه وکړې، د پردیو خلکو سره زنا کوې. ۳۳ خلک نورو بدلمنو ښځو ته سوغاتونه ورکوي، خو تا خپلو ټولو عاشقانو ته سوغاتونه او رشوتونه ورکول چې د هرځای نه راشي او تا سره څملي. ۳۴ نو ته د نورو بدلمنو ښځو په شان نه یې. ته دې کار ته چا نه هڅولې. تا به پیسې نه اخیستلې، بلکې هغو خلکو ته به دې ورکولې چې تا سره زنا وکړي! هو، ته د نورو په شان نه یې.›»
۳۵ «نو ای اورشلیمه، ای بدلمنې! څښتن چې څه وایي هغه ته غوږ ونیسه. ۳۶ دا هغه څه دي چې څښتن تعالی یې وایي: ‹تا خپل کالي وویستل او لکه د یوې بدلمنې په شان د خپلې شهوت پرستۍ په خاطر خپلو عاشقانو او د کرکې وړ بتانو دپاره تیاره وې او د خپلو اولادونو وینه دې بتانو ته د قربانۍ په توګه وړاندې کړه. ۳۷ نو له دې امله زه به ستا ټول پخواني عاشقان چې تا ورڅخه خوند اخیسته، پرته له دې چې په تا ګران وو او یا دې د هغوی څخه کرکه کوله، هغوی ټول به ستا نه ګردچاپېره راټول کړم، بیا به ستا نه کالي وباسم او هغوی به په پوره توګه تا لوڅه وویني. ۳۸ زه به تا داسې محاکمه کړم لکه څنګه چې یوه زناکاره او قاتله ښځه محکمه کیږي او په خپل قهر او غیرت سره به درته د مرګ سزا درکړم. ۳۹ زه به تا خپلو عاشقانو ته په لاس ورکړم او هغوی به هغه ځایونه وران کړي چې تا په کې د بتانو عبادت او بدلمنتوب کاوه. هغوی به ستا نه کالي وباسي، ښایسته زېورات به ستا نه واخلي او تا به په پوره توګه لوڅه پرېږدي.
۴۰ ستا عاشقان به ډېر خلک راوپاروي چې تا سنګساره کړي او په خپلو تورو به دې ټوټې ټوټې کړي. ۴۱ هغوی به ستا کورونه وسوځوي او د ډېرو ښځو په مخکې به درته سزا درکړي. زه به تا دې ته مجبوره کړم چې بدلمنتوب پرېږدې او خپلو عاشقانو ته د سوغاتونو د ورکولو نه لاس واخلې. ۴۲ بیا به زه ارام شم او زما د غیرت قهر به سوړ شي او زه به نور په تا باندې نه په قهرېږم. ۴۳ تا هېر کړي دي کله چې ځوانه وې، ما درباندې څومره پام کاوه، خو تا په خپلو ټولو بدو کارونو زه په قهر کړم. نو په دې خاطر زه تاته د دې ټولو بدو عملونو په بدل کې سزا درکوم. برسېره په هغو ټولو د کرکې وړ کارونو، زنا دې ولې کوله؟ څښتن تعالی داسې ویلي دي.›»
۴۴ «څښتن وویل: ‹ای اورشلیمه، هغه خلک چې متلونه خوښوي، نو هغوی به ستا په هکله دا متل وایي: ”څنګه یې چې مور وي، نو هماغسې به یې لور هم وي.“ ۴۵ ته په رښتیا د خپلې مور په شان یې چې د خپل مېړه او خپلو اولادونو نه به یې کرکه کوله. ته هم د خپلو خویندو په شان یې چې د خپلو مېړونو او خپلو اولادونو نه به یې کرکه کوله. ستا مور حیتۍ وه او ستا پلار اموري ؤ.
۴۶ ستا مشره خور سامره ده چې د خپلو لورګانو سره ستا په شمال کې اوسیږي. ستا کشره خور سدوم ده چې د خپلو لورګانو سره په جنوب کې اوسیږي. ۴۷ ته نه یوازې دا چې د هغوی په لارو باندې روانه شوې او د هغوی د کرکې وړ کارونو پیروي دې وکړه، بلکې په ډېر لږ وخت کې دې د هغوی نه هم زیات د فساد نه ډک کارونه وکړل.›
۴۸ څښتن تعالی داسې وایي: ‹زه په خپل ذات باندې قسم خورم چې ستا خور سدوم او د هغې لورګانو هېڅکله داسې بد کارونه نه دي کړي لکه څنګه چې تا او ستا لورګانو کړي دي. ۴۹ ګوره، سدوم او د هغې لورګانې مغروره وې، د خوراک دپاره یې هرڅه پرېمانه درلودل او په سوله او ارامۍ کې یې ژوند کاوه. خو د هغوی ګناه دا وه چې د غریبو او حاجتمندو خلکو سره یې مرسته نه کوله. ۵۰ هغوی مغرور خلک وو او هغه کارونه یې کول چې ما ورڅخه کرکه کوله. نو کله چې ما دا ولیدل، هغوی مې له منځه یووړل.
۵۱ سامرې ستا په نیمه اندازه ګناه هم نه ده کړې. تا دومره بد کارونه وکړل چې هغې کله هم نه دي کړي. تا دومره د کرکې وړ کارونه کړي دي چې د هغو کارونو په پرتله ستا خویندې بېګناه ښکاري. ۵۲ نو ته به اوس خپله رسوایي وزغمې. ستا ګناهونه ستا د خویندو نه دومره زیات دي چې ته د دې سبب شوې چې هغوی ستا په پرتله بېګناه ښکاره شي. نو اوس وشرمېږه او خپله بېعزتي وزغمه، ځکه چې تا دومره د کرکې وړ کارونه کړي دي چې ستا خویندې پاکې ښکاره شي.›»
۵۳ «څښتن اورشلیم ته وویل: ‹زه به سدوم او د هغې لورګانې او سامره او د هغې لورګانې یوځل بیا نېکمرغه کړم. هو، تا به هم اباد کړم، ۵۴ ترڅو ته د هغو کارونو په خاطر چې کړي دې دي، وشرمېږې او ستا خویندې به خوشحاله شي چې هغوی ستا په شان ګناهکارې نه دي. ۵۵ ستا خویندې سدوم او سامره او د هغوی لورګانې به بېرته خپل پخواني حالت ته راشي او ته او ستا لورګانې به هم بېرته خپل پخواني حال ته راشئ. ۵۶-۵۷ ایا تا د خپل غرور په وخت کې او مخکې له دې چې ستا بد کارونه ښکاره شي په سدوم پورې دې ملنډې نه وهلې؟ اوس ته هم د هغې په شان شوې او د سوریایانو، فلسطینیانو او د خپلو نورو ګاونډیانو چې ستا نه کرکه کوي، د هغوی د ملنډو شوې. ۵۸ ته باید د خپلې شهوت پرستۍ او د کرکې وړ کارونو په خاطر چې کړي دې دي، سزا ووینې.› څښتن داسې ویلي دي.
۵۹ څښتن تعالی داسې وایي: ‹زه به ستا سره داسې چلند وکړم چې څنګه یې لایقه یې، ځکه چې تا خپله وعده هېره کړې ده او خپل لوظ دې مات کړ. ۶۰ خو زه به خپل هغه لوظ رایاد کړم چې ستا سره مې ستا د ځوانۍ په وخت کې کړی ؤ او ستا سره به یو ابدي لوظ وکړم. ۶۱ هغه وخت به دې بد کارونه در په یاد شي، کله چې زه تاته خپله مشره او کشره خور بېرته راولم، نو ته به وشرمېږې. زه به هغوی ستا لورګانې کړم، که څه هم دا خبره په هغه لوظ کې نشته. ۶۲ زه به ستا سره خپل لوظ ټینګ وساتم، نو هغه وخت به ته پوهه شې چې زه څښتن یم. ۶۳ زه به ستا د ټولو ګناهونو دپاره کفاره ادا کړم، خو ته به د هغو په رایادولو د ډېره شرمه خپله خوله خلاصولی نه شې.› څښتن تعالی داسې ویلي دي.»