۱ د اموریانو ټولو پاچاهانو چې د اردن د سیند په لوېدیځ کې وو او د کنعانیانو ټولو پاچاهانو چې د مدیترانې د بحیرې په غاړه وو، واورېدل چې څښتن د اردن سیند تر هغه وخته پورې وچ کړی ؤ، ترڅو د اسراییلو قوم د هغه څخه تېر شو. هغوی ووېرېدل او نور یې دا جرات نه درلود چې د اسراییلو سره مخامخ شي.
۲ په هغه وخت کې څښتن یوشع ته وویل: «د بکرۍ د تیږې څخه چړې جوړې کړه او پاتې اسراییلیان سنت کړه.» ۳ نو څنګه چې څښتن حکم کړی ؤ، یوشع هماغسې وکړل او اسراییلیان یې په هغه ځای کې سنت کړل چې د سنت ګیرۍ د غونډۍ په نوم یاد شو. ۴ نو په دې خاطر هغه داسې وکړل. هغه ټول نارینه یعنې ټول جنګي کسان چې د مصر څخه راوتلي وو، د سفر په دوران کې په دښته کې مړه شول. ۵ هغه خلک چې د مصر څخه راوتلي وو هغوی ټول سنت شوي وو، خو هغه ټول خلک چې د سفر په دوران کې په دښته کې زېږېدلي وو، هغوی سنت شوي نه وو. ۶ اسراییلیانو څلوېښت کاله په دښته کې سفر وکړ، تر هغې چې ټول خلک یعنې د قوم ټول جنګي کسان چې د مصر څخه راووتل مړه شول، ځکه چې د څښتن د امر څخه یې سرغړونه کړې وه. لکه څنګه چې څښتن قسم خوړلی ؤ، هغوی ته اجازه ورنه کړای شوه چې هغه غني او حاصلخېزه ځمکه وویني چې د هغو د نیکونو سره یې وعده کړې وه. ۷ د دغو خلکو زامن هېڅکله سنت شوي نه وو او دا هغه نوی نسل ؤ چې یوشع سنت کړ.
۸ کله چې د اسراییلو ټول نارینه سنت شول، هغوی تر هغې پورې په کمپ کې پاتې شول، ترڅو چې زخمونه یې روغ شول. ۹ څښتن یوشع ته وویل: «دا زما د قوم دپاره د شرم خبره وه چې په مصر کې دې غلامان وي، خو ما نن هغه رسوایي لېرې کړه.» نو اسراییلیانو دغه ځای د جلجال په نوم یاد کړ او تر اوسه پورې په دې نوم یادیږي.
۱۰ کله چې اسراییلیانو په جلجال کې اریحا ته نژدې په ډاګ کې خېمې ودرولې، هغوی د میاشتې د څوارلسمې ورځې په ماښام د فسحې اختر ولمانځه. ۱۱ راتلونکې ورځ اول ځل ؤ چې هغوی د کنعان د محصولاتو څخه خواړه وخوړل یعنې وریتې شوې غلې دانې او فطیره ډوډۍ. ۱۲ د هماغې ورځې څخه د خدای له خوا د من رالېږل بند شول او د اسراییلو دپاره نور من نه پیدا کېده. د هماغه وخت څخه هغوی هغه څه خوړل چې په کنعان کې پیدا کېدل.
۱۳ یو وخت یوشع اریحا ته نژدې ؤ، چې ناڅاپه یې یو سړی ولیده چې د هغه مخې ته ولاړ ؤ او په لاس کې یې توره وه. یوشع هغه ته ورغی او پوښتنه یې ترې وکړه: «ته زمونږ په خوا یې که زمونږ د دښمنانو په خوا؟» ۱۴ هغه په ځواب کې وویل: «هېڅ یو نه، زه اوس د څښتن د لښکر د قوماندان په توګه راغلی یم.» بیا یوشع په ځمکه باندې پړمخې پرېوت او ویې ویل: «صاحبه، زه ستاسو خدمتګار یم. زما څخه څه غواړئ چې ویې کړم؟» ۱۵ د څښتن د لښکر قوماندان هغه ته وویل: «خپلې څپلۍ وباسه، ځکه چې ته په سپېڅلې ځمکې باندې ولاړ یې.» او یوشع همداسې وکړل.