۱ اَی عزِیزا، دَ هر روح اِعتِماد نَکُنِید، بَلکِه اُونا ره آزمایش کُنِید که از طرفِ خُدا اَسته یا نَه، چراکه غَدر اَنبیای دروغی دَ دُنیا بُر شُده. ۲دَ امزی طرِیقه مِیتنی که روحِ خُدا ره بِنَخشی: هر روحِ که اِقرار مُونه که عیسیٰ مسیح دَ جِسم دَ اِی دُنیا اَمَده، از خُدا یَه. ۳و هر روحِ که اِی حقِیقتِ عیسیٰ ره اِقرار نَمُونه، از خُدا نِییه، بَلکِه امُو روح، روحِ دَجال اَسته و شُمو شِنِیدید که اُو مییه و امی آلی دَ دُنیا وجُود دَره.
۴ اَی بچکِیچای عزِیز، شُمو از خُدا اَستِید و دَ سرِ ازوا زور شُدِید، چُون اُو که دَز شُمو وجُود دَره، بُزُرگتَر ازُو اَسته که دَ دُنیا یَه. ۵اُونا از دُنیا اَسته، ازی خاطر اُونا تورای دُنیایی مُوگه و دُنیا دَزوا گوش مِیدیه. ۶مو از خُدا اَستی و کسی که خُدا ره مِینَخشه، دَز مو گوش مِیدیه. مگم کسی که از خُدا نِییه، دَز مو گوش نَمِیدیه. دَ امزی طرِیقه مو روحِ حق و روحِ باطِل ره مِینَخشی.
۷ اَی عزِیزا، مو باید یگدِیگِه خُو ره مُحَبَت کنی، چراکه مُحَبَت از خُدا یَه و هر کسی که مُحَبَت مُونه اُو از خُدا سرچشمه گِرِفته و خُدا ره مِینَخشه. ۸کسی که مُحَبَت نَمُونه خُدا ره نَمِینَخشه، چراکه خُدا مُحَبَت اَسته. ۹مُحَبَتِ خُدا دَ امزی رقم دَ بَینِ ازمو بَرمَلا شُد که خُدا باچِه یگانِه خُو ره دَ دُنیا رَیی کد تا مو دَ وسِیلِه ازُو زِندگی اَبَدی پَیدا کُنی. ۱۰مُحَبَت ازی قرار اَسته: نَه اِی که مو خُدا ره مُحَبَت کدے، بَلکِه اُو مو ره مُحَبَت کد و یگانه باچِه خُو ره رَیی کد تا کِفارِه گُناه های مو شُنه.
۱۱ اَی عزِیزا، اگه خُدا دَ امزی رقم مو ره مُحَبَت کد، مو ام باید یگدِیگِه خُو ره مُحَبَت کنی. ۱۲هیچ کس خُدا ره هرگِز هُوش نَکده. ولے اگه مو یگدِیگِه خُو ره مُحَبَت کُنی، خُدا دَز مو مُومَنه و مُحَبَتِ ازُو دَ وجُودِ ازمو کامِل مُوشه. ۱۳اِی ره مو مِیدَنی که مو دَ خُدا مُومَنی و اُو دَز مو، چراکه اُو از روحِ خُو دَز مو دَده. ۱۴و مو دِیدی و شاهِدی مِیدی که آتِه آسمانی باچِه خُو ره رَیی کد تا نِجات دِهِندِه دُنیا بَشه. ۱۵کسی که اِقرار مُونه که عیسیٰ باچِه خُدا یَه، خُدا دَزُو مُومَنه و اُو دَ خُدا. ۱۶و مو از مُحَبَتی که خُدا نِسبَت دَز مو دَره آگاه شُدے و دَزُو اِعتِماد دَری.
خُدا مُحَبَت اَسته و کسی که دَ مُحَبَت مُومَنه دَ خُدا مُومَنه و خُدا دَزُو. ۱۷دَ امزی طرِیقه مُحَبَت دَ وجُودِ ازمو کامِل شُده تا دَ روزِ قضاوَت اِطمِینان دَشته بَشی، چراکه زِندگی مو مِثلِ زِندگی عیسیٰ مسیح دَ اِی دُنیا اَسته. ۱۸دَ مُحَبَت هیچ ترس وجُود نَدره، بَلکِه مُحَبَتِ کامِل ترس ره دُور مُونه. چُون عاقُبَتِ ترس جَزا اَسته و کسی که ترس مُوخوره اُو دَ مُحَبَتِ کامِل نَرسِیده. ۱۹مو دِیگرو ره مُحَبَت مُونی، چراکه خُدا اوّل مو ره مُحَبَت کد. ۲۰اگه یَگو کس بُگه که ”ما خُدا ره دوست دَرُم،“ لیکِن از بِرارِ خُو نَفرَت دَشته بَشه، اُو دروغگوی اَسته. چُون اگه بِراری ره که قد چِیم خُو دِیده، مُحَبَت نَمُونه، اُو خُدای ره که هیچ نَدِیده، مُحَبَت نَمِیتنه. ۲۱و خُدا اینَمی حُکم ره دَز مو دَده: کسی که خُدا ره مُحَبَت مُونه، باید بِرار خُو ره ام مُحَبَت کنه.