۱هر کسی که ایمان دَره که عیسیٰ امُو مسیح اَسته، اُو از خُدا سرچشمه گِرِفته و هر کسی که آتِه آسمانی ره دوست دَره، اُو باچِه شی ره ام دوست دَره. ۲مو مِیدَنی که بچکِیچای خُدا ره مُحَبَت مُونی، چُون مو خُدا ره مُحَبَت مُونی و از احکامِ ازُو اِطاعَت مُوکُنی. ۳مُحَبَت دَ خُدا اینَمی اَسته که مو احکامِ ازُو ره نِگاه کنی و احکامِ ازُو بارِ گِرَنگ نِییه. ۴چُون هر کسی که از خُدا سرچشمه گِرِفته، اُو دَ سرِ دُنیا پیروز مُوشه. اینَمی پیروزی اَسته که دَ بَلِه دُنیا زور شُده، یعنی ایمان مو.
۵کِی مِیتنه دَ سرِ دُنیا پیروز شُنه بَغَیر از کسی که ایمان دَره که عیسیٰ مسیح باچِه خُدا یَه؟ ۶اُو امُو کس اَسته که قد آو و خُون اَمَد، یعنی عیسیٰ مسیح؛ نَه تنها قد آو، بَلکِه قد آو و خُون اَمَد. روح امُو اَسته که شاهِدی مِیدیه و روح حق اَسته. ۷چُون سِه شاهِد اَسته: ۸روح، آو و خُون، و هر سِه شی یگدِست اَسته. ۹اگه مو شاهِدی اِنسان ها ره قبُول مُونی، شاهِدی خُدا ره که ازُو کده بُزُرگتَر اَسته، باید قبُول کنی. شاهِدی خُدا اینَمی اَسته که اُو خود شی دَ بارِه باچِه خُو شاهِدی دَده. ۱۰کسی که دَ باچِه خُدا ایمان دَره، اُو امی شاهِدی ره دَ قَلب خُو دَره، لیکِن هر کسی که دَ خُدا ایمان نَدره، اُو ره دروغگوی حِساب مُونه، چراکه دَ شاهِدی که خُدا دَ بارِه باچِه خُو دَده، باوَر نَمُونه. ۱۱شاهِدی اینَمی اَسته که خُدا دَز مو زِندگی اَبَدی بخشِیده و اِی زِندگی اَبَدی دَ باچِه ازُو یَه. ۱۲کسی که باچه ره دَره، اُو زِندگی اَبَدی دَره، لیکِن کسی که باچِه خُدا ره نَدره، اُو زِندگی اَبَدی نَدره.
۱۳اِی چِیزا ره ما دَز شُمو نوِشته کدُم که دَ نامِ باچِه خُدا ایمان اَوُردِید، تا بِدَنِید که صاحِبِ زِندگی اَبَدی شُدِید. ۱۴اِطمِینانِ ازمو دَ حُضُورِ خُدا اینَمی اَسته که اگه کُدَم چِیز دَ مُطابِقِ خاستِ ازُو طلب کنی، اُو آواز مو ره مِیشنَوه. ۱۵و اگه مو مِیدَنی که هر چِیزی که طلب کنی اُو آواز مو ره مِیشنَوه، پس اِی ره ام مِیدَنی که هرچِیزی که ازُو طلب کنی حاصِل مُونی.
۱۶اگه کسی مِینگره که بِرار شی یَگو گُناه مُونه که سَزای ازُو گُناه مَرگ نِییه، اُو باید از خُدا درخاست کنه و خُدا دَزُو زِندگی مُوبَخشه، یعنی دَ کسی که گُناهِ ازُو سزاوارِ مَرگ نِییه. اُوطور گُناه ام اَسته که سَزای شی مَرگ اَسته؛ ما نَمُوگُم که بَلدِه ازُو دُعا کنه. ۱۷هر کارِ نادُرُست-و-بَد گُناه اَسته، لیکِن گُناهی ام اَسته که جَزای شی مَرگ نِییه.
۱۸مو مِیدَنی، هر کسی که از خُدا سرچشمه گِرِفته، اُو یگسَره گُناه نَمُوکُنه، چُون مسیح که خود شی از خُدا سرچشمه گِرِفت، اُو ره حِفظ مُونه و دِستِ شرِیر دَزُو نَمِیرَسه. ۱۹مو مِیدَنی که از خُدا اَستی، ولے تمامِ دُنیا دَ چنگِ شرِیر اُفتَده. ۲۰ امچُنانمو مِیدَنی که باچِه خُدا اَمَده و دَز مو دانایی-و-بِینایی دَده تا امُو ره که حق اَسته بِنَخشی؛ و مو دَمزُو اَستی که حق اَسته، یعنی دَ باچِه ازُو، عیسیٰ مسیح. اونَمُو خُدای حقِیقی و زِندگی اَبَدی اَسته.
۲۱اَی بچکِیچای عزِیز، از بُت‌ها دُوری کُنِید.