کِتابِ اوّلِ پادشایو
فصلِ چارُم
اَعضای دربارِ سُلَیمان
۱سُلَیمان پادشاه دَ بَلِه تمامِ اِسرائیل پادشاه بُود ۲و اینیا نفرای دَربار شی بُود:
- عَزَریاه باچِه صادوق، پیشوا؛
- ۳اِلیحورِف و اَخیا باچه های شیشه مُنشی ها؛
- یهوشافاط باچِه اَخِیلُود کاتِب؛
- ۴بِنایا باچِه یھویاداع قومَندانِ لشکر؛
- صادوق و اَبیاتار پیشوایو؛
- ۵عَزَریاه باچِه ناتان کٹِه والیها؛
- زابُود باچِه ناتان، پیشوا و دوستِ نزدِیکِ پادشاه؛
- ۶اَخِیشار مسئُولِ قصر
- و اَدونِیرام باچِه عَبدا مسئُولِ بیگاریا.
۷سُلَیمان دوازده والی دَ تمامِ اِسرائیل دَشت که بَلدِه پادشاه و دَربار شی خوراک تَهیه مُوکد؛ هر کُدَمِ ازوا دَ یگ سال باید بَلدِه یگ ماه خوراک تَهیه مُوکد. ۸نام های ازوا اینیا بُود:
- بِن-حور دَ کوھِستونِ اِفرایم؛
- ۹بِن-دِقر دَ ماقَص، شعلبِیم، بَیت-شَمس و ایلونِ بَیت-حانان؛
- ۱۰بِن-حِسِد دَ اَرُوبوت که سوکوه و تمامِ سرزمِینِ حِفِر دَزُو تعلُق دَشت؛
- ۱۱بِن-اَبِیناداب دَ تمامِ نافَت-دور؛ تافَت دُخترِ سُلَیمان خاتُونِ ازُو بُود؛
- ۱۲بَعنا باچِه اَخِیلُود دَ تَعنَک، مِگِیدو و تمامِ بَیت-شان که دَ پالُوی صرتان تَیلونِ یِزرعیل اَسته، یعنی از بَیت-شان تا آبِل-مِحوله و تا اُو طرفِ یُقمِعام؛
- ۱۳بِن-جابَر دَ راموتِ جِلعاد؛ آغِیلای یاعیر باچِه مَنَسّی دَ جِلعاد دَزُو تعلُق دَشت و منطقِه اَرجوب دَ باشان، دَ شُمُولِ شصت شارِ کٹِه دیوالدار که درگه ھای شی پُشت-بند های برونزی دَشت ام مربُوطِ ازُو مُوشُد؛
- ۱۴اَخِیناداب باچِه عِدّو دَ مَحَنایِیم؛
- ۱۵اَخِیمَعص دَ نَفتالی؛ اُو ام یگ دُخترِ سُلَیمان ره دَ عِنوانِ خاتُو گِرِفتُد که نام شی باسَمَت بُود؛
- ۱۶بَعنا باچِه حُوشای دَ اَشیر و بِعَلوت؛
- ۱۷یهوشافاط باچِه فاروَح دَ یسّاکار؛
- ۱۸شِمعی باچِه ایلا دَ بِنیامِین؛
- ۱۹جابَر باچِه اُوری دَ سرزمِینِ جِلعاد که مُلکِ سِیحون پادشاهِ اَموریا و عوج پادشاهِ باشان بُود؛ جابَر تنهای خُو دَ امزُو سرزمی والی بُود.
تَرَقی و شُهرَتِ سُلَیمان
۲۰ مردُمِ یهُودا و اِسرائیل رقمِ ریگِ دریا اَلّی بےحِساب بُود؛ اُونا مُوخورد و وُچی مُوکد و خوشحال بُود. ۲۱سُلَیمان دَ بَلِه تمامِ مَملَکَت ها از دریای فَرات تا سرزمِینِ فَلَسطِینیا و تا سرحدِ مِصر پادشاهی مُوکد. اُونا تُحفه ها میوُرد و سُلَیمان ره دَ تمامِ روزای عُمر شی خِدمت مُوکد.
۲۲خوراکِ روزانِه دربارِ سُلَیمان سی کُر آردِ نَرم، شصت کُر غَلّه-و-دانه، ۲۳دَه گاوِ چاغی، بِیست گاو از چراگاه و صد گوسپو علاوه از آهُو ها، آهُوباره ها، گوَزن ها و مُرغ های چاق بُود. ۲۴چُون اُو دَ بَلِه تمامِ منطقِه غَربِ دریای فَرات، از تِفسَح تا غَزه حُکمرانی مُوکد، یعنی دَ بَلِه تمامِ پادشایونِ غَربِ دریای فَرات؛ و اُو از هرطرف دَ صُلح-و-اَمنیَت بُود. ۲۵دَ روزای پادشاهی سُلَیمان مردُمِ یهُودا و اِسرائیل از دان تا بِئیرشِبَع پگ شی دَ تَی تاکِ انگُور و دِرختِ انجِیر خُو آرام-و-بیغَم مِیشِشت. ۲۶سُلَیمان چِل هزار آوخور بَلدِه اَسپ های گاڈی های جنگی خُو دَشت و دوازده هزار اَسپسوار. ۲۷امُو والیها بَلدِه خوراکِ سُلَیمان پادشاه و تمامِ کسای که دَ سرِ دِسترخونِ سُلَیمان پادشاه مِیشِشت خوراک تَهیه مُوکد؛ اُونا هر کُدَم شی دَ ماهِ خُو تَهیه مُوکد و نَمیایشت که هیچ چِیز کمبُود شُنه. ۲۸اُونا امچُنان جَو و کاه بَلدِه اَسپ ها و اَسپ های تیزپای دَ جای تعیِین شُده میوُرد، هر کس دَ مُطابِقِ وظِیفِه خُو عمل مُوکد.
حِکمتِ سُلَیمان
۲۹خُدا دَ سُلَیمان حِکمت و دانایی غَدر کَلو دَد و روحِ فامِیدَگی از حد کَلو رقمِ ریگِ لبِ دریا اَلّی. ۳۰حِکمتِ سُلَیمان ام از حِکمتِ تمامِ مردُمِ مشرِق و ام از حِکمتِ پگِ مِصریا کده کَلوتر بُود. ۳۱اُو از تمامِ اِنسان ها کده داناتَر بُود، داناتَر از ایتان اِزراحی و داناتَر از حیمان، کَلکول و دَردَع باچه های ماحول؛ نامِ ازُو دَ مینکلِ تمامِ مِلَّت های که دَ گِردوبَر شی بُود مشهُور شُد. ۳۲اُو سِه هزار مثل گُفت و تِعدادِ بَیت های شی یگ هزار و پَنج بُود. ۳۳اُو دَ بارِه دِرختا و گیاه ها، از دِرختِ سَروِ لِبنان گِرِفته تا عَلفِ زوفا که دَ دیوال ها بُر مُوشه توره گُفت و دَ بارِه حَیوانا، مُرغَکو، خزِندهگو و ماهیا ام گپ زَد. ۳۴ مردُمِ تمام مِلَّت ها میمَد تا حِکمتِ سُلَیمان ره گوش بِگِیره؛ اُونا از طرفِ تمامِ پادشایونِ زمی که آوازِه حِکمتِ سُلَیمان ره شِنِیده بُود، میمَد.