Afghan Bibles
English · دری · پښتو

خطِ پولُس بَلدِه ایماندارای اِفِسُس

بَخشِ ۱

دُعا و سلام

۱ از طرفِ پولُس که دَ خاست-و-اِرادِه خُدا رسُولِ مسیح عیسیٰ اَسته، بَلدِه مُقَدَّسِینِ شارِ اِفِسُس که دَ مسیح عیسیٰ وفادار اَسته: ۲فَیض و سلامَتی از طرفِ آتِه مو خُدا و مَولا عیسیٰ مسیح نصِیب شُمو شُنه.

بَرکت های روحانی دَ مسیح

۳حمد-و-ثنا دَ خُدا و آتِه مَولای مو عیسیٰ مسیح که مو ره دَ وسِیلِه مسیح قد تمامِ بَرکت های روحانی که دَ عالمِ باله اَسته، بَرکت دَد. ۴چُون اُو پیش از بُنیادِ دُنیا مو ره بَلدِه مسیح اِنتِخاب کد تا مو دَ حُضُور شی مُقَدَّس و بےعَیب بَشی. از رُوی مُحَبَت ۵اُو مو ره مُطابِقِ خاست-و-اِرادِه نیک خُو تعیین کد تا دَ وسِیلِه عیسیٰ مسیح بچکِیچای فرزندی شی شُنی ۶بَلدِه سِتایشِ فَیضِ پُر جلال شی که مُفت-و-رایگان دَ وسِیلِه باچِه دوست دَشتنی خُو دَز مو بخشِید. ۷مو دَ وسِیلِه رابِطه قد مسیح، دَ وسِیلِه خُونِ ازُو بازخرِید شُدی و گُناه های مو بخشِیده شُد دَ مُطابِقِ فَیضِ بےاندازِه خُدا ۸که پِرَیمو دَز مو بخشِید. اُو قد تمامِ حِکمت و دانایی ۹رازِ خاست-و-اِرادِه خُو ره بَلدِه ازمو معلُومدار کد، مُطابِقِ رِضایت خُو که دَ وسِیلِه مسیح قَصد کدُد. ۱۰ اُو اِی کار ره بَلدِه تنظِیمِ تکمِیل شُدونِ زمان ها کد تا تمامِ چِیزا ره دَ مسیح جَم کنه، ام چِیزای ره که دَ آسمو اَسته و ام چِیزای ره که دَ زمی یَه. ۱۱مو ام دَ وسِیلِه مسیح صاحِبِ میراث شُدے، چراکه مُطابِقِ قَصدِ خُدا مو پیش از پیش تعیین شُده بُودی، مُطابِقِ قَصدِ امزُو که تمامِ چِیزا ره مُطابِقِ فَیصَله-و-خاست خُو انجام مِیدیه ۱۲تا مو اوّلِین کسای که دَ مسیح اُمِید کدی، باعِثِ سِتایشِ بُزُرگی-و-جلالِ ازُو بَشی. ۱۳شُمو ام دَ مسیح، وختِیکه کلامِ حقِیقت یعنی خوشخبری نِجات خُو ره شِنِیدِید و دَزُو ایمان اَوُردِید، قد روح اُلقُدسِ وعده شُده مُهر شُدِید ۱۴که اِی بَیعانِه میراث مو اَسته تا وختِ بازخرِیدِ کسای که مالِ خُدا یَه بَلدِه سِتایشِ بُزُرگی-و-جلالِ ازُو.

شُکرگُزاری و دُعا

۱۵دَ امزی دلِیل، ما از وختِیکه دَ بارِه ایمان شُمو دَ مَولا عیسیٰ و مُحَبَت شُمو قد تمامِ مُقَدَّسِین شِنِیدُم، ۱۶دَوامدار بَلدِه شُمو شُکرگُزاری کده شُمو ره دَ دُعاهای خُو یاد مُونُم، ۱۷تا خُدای مَولای مو عیسیٰ مسیح که آتِه پُرجلال اَسته، روحِ حِکمت و پَی بُردو بَلدِه شِناس خُو دَز شُمو بِدیه. ۱۸ دُعا مُونُم که چِیمای دِل شُمو روشو شُنه تا بِدَنِید اُمِیدی که خُدا شُمو ره بَلدِه شی کُوی کده چی اَسته و اَرزِشِ میراثِ پُرجلالِ ازُو دَ مینکلِ مُقَدَّسِین چی یَه، ۱۹و بُزُرگی بےاندازِه قُدرتِ ازُو بَلدِه ازمو ایماندارا چی معنیٰ دَره. امُو قُدرت مُطابِقِ عملِ قُوَتِ عظِیمِ ازُو اَسته ۲۰که اُو ره دَ وجُودِ مسیح دَ کار بُرد وختِیکه اُو ره از مُرده ها دُوباره زِنده کد و دَ دِستِ راست خُو دَ عالمِ باله شَند، ۲۱باله‌تَر از هر حُکُومت و قُدرت و قُوَت و پادشاهی و هر نامی که گِرِفته مُوشه، نَه تنها دَزی عالم، بَلکِه دَ عالمی که اَمدَنی اَسته ام. ۲۲ خُدا تمامِ چِیزا ره دَ زیرِ پایای مسیح ایشت و اُو ره دَ بَلِه تمامِ چِیزا قرار دَده بَلدِه جماعتِ ایماندارا سر جور کد ۲۳که جماعتِ ایماندارا جِسمِ ازُو اَسته، یعنی پُری ازُو که پگِ چِیزا ره از هر نِگاه پُر مُونه.