۱ نادان وتی دلا گوَشیت:
”هُداے نێست.“
اے پَلیتّ اَنت و کارِش بَژناک،
نێک‌کارے نێست.
۲ هُدا چه آسمانا بنی آدما چاریت
تان بگندیت بارێن داناے هست
که هُدائے شۆهازا اِنت.
۳ سجّهێنان هُدائے راه گار داتگ،
هۆریگا پلیت بوتگ‌اَنت،
نێک‌کارے نێست،
یکّے هم نێست.
۴ بدکار هچ سرپدَ نبنت؟
اے منی کئوما اَنچشَ ورنت که مردم نگنَ ورنت و
هُدایا هچ تئوارَ نکننت.
۵ اۆدا که هچ تُرسے نێست
اے سَکَّ تُرسنت،
چیا که هُدا شمئے اَنگِرّ کنۆکانی هڈّان شِنگ و شانگَ کنت،
تئو اِشان شرمندگَ کنئے،
چیا که هُدایا آ چه وت دئور داتگ‌اَنت.
۶ کَسے چه سَهیونا بیایات و اِسراییلا برَکّێنات.
وهدے هُدا وشبهتیا په وتی کئوما پِرَ ترّێنیت،
آکوب گَل و بالَ بیت و اِسراییل شادهیَ کنت.