۱آدمِ رِیش سفید ره هرگِز دَ تَلخی-و-تُندی سرزَنِش نَکُو، بَلکِه اُو ره رقمِ آتِه خُو اَلّی دَ مُلایمت نصِیحَت کُو. قد مَردای جوان رقمِ بِرارای خُو اَلّی، ۲قد خاتُونوی پِیر رقمِ آبِه خُو اَلّی و قد دُخترونِ جوان رقمِ خوارای خُو اَلّی دَ پاکی رفتار کُو.
۳خاتُونوی بیوه ره که واقِعاً بیوه بَشه، عِزَت کُو. ۴و اگه یگ خاتُونِ بیوه اَولادا یا نوسه‌گو دَشته بَشه، بیل که اوّل اُونا مسئُولیَت دِینی خُو ره دَ جای اَوُرده حقِ آته و آبه و بابه‌کَلونای خُو ره پُوره کُنه، چراکه اِی کار دَ نظرِ خُدا قابِلِ قبُول اَسته. ۵خاتُونی که واقعاً بیوه یَه و هیچ کسی ره نَدره، اُمِیدِ ازُو دَ خُدا یَه و اُو شاو و روز خُو ره دَ راز-و-نیاز و دَ دُعا تیر مُونه. ۶مگم خاتُونِ بیوِه که تسلِیمِ عیاشی مُوشه، حتیٰ اگه زِنده ام بَشه، دَ حقِیقت اُو مُرده یَه. ۷اِی چِیزا ره دَزوا اَمر کُو تاکه اُونا از ملامَتی دُور بَشه. ۸اگه یَگو کس ضرُورَت های قَومای خُو ره و خصُوصاً ضرُورَت های اَعضای خانَوادِه خُو ره تَهیه نَکُنه، اُو اَصلاً ایمان خُو ره اِنکار مُونه و از یگ شخصِ بےایمان کده بَدتَر اَسته. ۹خاتُونِ بیوِه که سِن شی کَلوتَر از شصت سال بَشه و از یگ شُوی زیاد نَکده بَشه، باید نام شی ثَبت شُنه. ۱۰علاوه ازی، اُو باید دَ نیکوکاری معرُوف بَشه: مَثلاً، بچکِیچا ره تَربیه کده بَشه، مِهمونَواز بُوده بَشه، پایای ایماندارا ره شُشته بَشه و دَ یاری بےچاره‌گو رسِیده بَشه. خُلاصه، اُو باید دَ هر کارِ نیک عمل کده بَشه. ۱۱لیکِن نامِ خاتُونوی بیوِه جوان ره نوِشته نَکُو، چُون وختی خاهِشاتِ نَفسانی ازوا اُونا ره از مسیح دُور کُنه، اُونا خاهِشِ توی کدو ره مُونه. ۱۲اوخته قد ازی کار خُو اُونا پَیمانِ اوّلی خُو ره قد مسیح مَیده مُونه و ملامَت مُوشه. ۱۳علاوه ازی، اُونا بےکاری و ٹمبلی ره یاد مِیگِیره و خانه دَ خانه مِیگرده؛ اُونا نَه تنها بےکاره و ٹمبل مُوشه، بَلکِه دُواَنداز و چُغُول ام مُوشه و چِیزای ره مُوگیه که نَباید بُگیه. ۱۴ازی خاطر ما خاهِش مُونُم که بیوه های جوان دُوباره شُوی کُنه و صاحِبِ بچکِیچا شُده دَ خانَداری مشغُول شُنه و بَلدِه دُشمو مَوقِع ملامَت کدو ره نَدیه. ۱۵چُون بَعضی از خاتُونوی بیوه پیش ازی ام گُمراه شُده و از پُشتِ شَیطو رفته. ۱۶اگه یَگو خاتُونِ ایماندار دَ مَنِه قَومای خُو بیوه ها دَشته بَشه، بیل که خود شی اُونا ره یاری بِدیه تاکه اُونا بارِ دوشِ جماعتِ ایماندارا نَشُنه. دَزی رقم جماعتِ ایماندارا مِیتنه دَ بیوه های واقِعی کومَک کُنه.
۱۷بُزُرگای که کارای جماعت ره دَ خُوبی پیش مُوبَره، خصُوصاً اُونای که دَ وَعظ و تعلِیمِ کلام زَحمت مِیکشه، مُستَحقِ دُو برابر اِحتِرام بَشه. ۱۸چُون نوِشته های مُقَدَّس مُوگیه: ”دانِ گاو ره دَ غَیتِ جُغُول کدو بسته نَکُو.“ و امچُنان مُوگیه: ”کارگر حقدارِ مُزد خُو اَسته.“ ۱۹هیچ تُهمَت ره دَ ضِدِ یَگو بُزُرگِ جماعت قبُول نَکُو، سِوای که دَ وسِیلِه دُو یا سِه شاهِد تایِید شُنه. ۲۰لیکِن اُونای ره که دَ گُناهِ خُو اِدامه مِیدیه، دَ پیشِ پگ سرزَنِش کُو تاکه دِیگرو عِبرَت گِرِفته ترس بُخوره. ۲۱دَ حُضُورِ خُدا و مسیح عیسیٰ و ملایکه های اِنتِخاب شُده، تُو ره قَسم مِیدُم که اِی دستُورا ره بِدُونِ تعصُب-و-تبعِیض اِجرا کُو و هیچ کاری ره از رُوی طرفداری نَکُو.
۲۲دَ دِست کشِیدو بَلِه کس عَجَله نَکُو و دَ گُناهای دِیگرو ام شرِیک نَشُو. خود ره پاک نِگاه کُو. ۲۳امچُنان، تنها آو وُچی نَکُو، بَلکِه از خاطرِ کَورِه خُو و از خاطرِ ناجوریای که اَکثرِ وخت دَری، یگ کَمَک وَری شرابِ انگُور ام وُچی کُو.
۲۴گُناهای بَعضی کسا امی‌آلی معلُومدار اَسته و اُونا ره سُون جَزا مِیکشَنه، ولے گُناه های بَعضی کسای دِیگه پسان بَرمَلا مُوشه. ۲۵امی رقم اعمالِ نیک ام معلُومدار اَسته و حتیٰ اگه آلی بَرمَلا نَبَشه، اُونا نَمِیتنه بَلدِه همیشه تاشه بُمَنه.