۱وختِیکه صحیح-و-سلامَت دَ لبِ دریا رسِیدی، اوخته فامِیدی که نامِ ازُو جزِیره مالت اَسته. ۲مردُمِ اُونجی قد ازمو کَلو خُوبی کد. ازی که بارو مُوبارِید و هَوا یَخ بُود، اُونا آتِش داغ کده از پگ مو پَذِیرایی کد. ۳پولُس یگ مِقدار خاشه جَم کده اَوُرد و دَ حینِ ایشتو دَ بَلِه آتِش یگ مار از قدِ ازُو بخاطرِ گرمی آتِش بُر شُد و دَ دِست شی چسپِید. ۴وختی مردُم امزُو جزِیره مار ره دَ دِست شی اَوزو دِید، قد یگدِیگِه خُو گُفت: ”اِی آدم حتماً قاتِل اَسته. اگرچِه از دریا نِجات پَیدا کده، مگم عدالتِ اِلٰهی اِجازه نَمِیدیه که زِنده بُمَنه.“ ۵مگم پولُس مار ره ٹَک زَده دَ مَنِه آتِش اَندخت و هیچ ضَرَر دَز شی نَرسِید. ۶اُونا مُنتظِر بُود که جان شی اَماس کُنه یا اِی که بےبلغه دَ زمی بُفته و بُمُره. لیکِن بعد از اِنتِظارِ کَلو اُونا دِید که هیچ ضَرَری دَ پولُس نَرسِید. اوخته فِکرِ ازوا بَدَل شُد و اُونا گُفت: ”اِی یکی از خُدایو اَسته.“
۷دَ نزدِیکِ امزُو جای زمِینای وجُود دَشت که مربُوطِ حاکِمِ امزُو جزِیره مُوشُد که پُوبلیوس نام دَشت. اُو مو ره دَ خانِه خُو بُرد و از مو پَذِیرایی کده مُدَتِ سِه روز مِهمو نَوازی کد. ۸دَمزُو غَیت آتِه پُوبلیوس جاگهیی بُود و تاو و پیچِشِ خُونی دَشت. پولُس دَ مُلاقاتِ ازُو رفت و دُعا کده دِستای خُو ره دَ بَلِه شی ایشت و اُو ره شَفا دَد. ۹بعد ازُو واقِعه پگِ ناجورای دِیگِه امزُو جزِیره ام اَمَد و شَفا یافت. ۱۰ امزی خاطر اُونا مو ره کَلو اِحتِرام کد و غَیتِیکه تَیاری رفتو ره مِیگِرِفتی، چِیزای ره که ضرُورَت دَشتی بَلدِه مو تَهیه کد.
۱۱بعد از سِه ماه مو دَ یگ کِشتی که از سِکندَریه بُود و زِمِستو ره دَ جزِیرِه مالت تیر کدُد، سوار شُدی. دَ بَلِه امزُو کِشتی علامَتِ «جَوزا» نَصب شُده بُود. ۱۲وختِیکه مو دَ شارِ سِراکُوز رسِیدی، سِه روز دَ اُونجی مَندی. ۱۳از اُونجی دَ کِشتی حَرکت کده دَ شارِ ریغیُوم رفتی. یگ روز بعد از رسِیدون مو بادِ جنُوبی باله شُد و مو دَ روزِ دِیگِه شی دَ بندرِ پُوتیولی رسِیدی. ۱۴دَ اُونجی بِرارای ایماندار ره پَیدا کدی که مو ره دعوَت کد و مو مُدَتِ هفت روز ره قد ازوا مَندی و ازُونجی آخِرِکار سُون شارِ رُوم اَمَدی. ۱۵ایماندارای رُوم وختی از رسِیدون مو خبر شُد، تا بازارِ آپیُوس و یگ آغِیل دَ نامِ «سِه سَماوات» دَ دَمِ راهِ مو اَمَد. غَیتِیکه پولُس اُونا ره دِید، خُدا ره شُکر گُفت و دِل پَیدا کد. ۱۶وختی دَ رُوم رسِیدی، دَ پولُس اِجازه دَده شُد که دَ یگ خانه قد یگ عسکر که ازُو مُحافِظَت مُوکد، تنهای خُو بِشِینه.
۱۷بعد از سِه روز پولُس رهبرای یهُودیا ره کُوی کد و غَیتِیکه اُونا جَم شُد، دَزوا گُفت: ”اَی بِرارو، اگرچِه کُدَم عملی بَد دَ ضِدِ قَوم یا رسم-و-رَواجِ بابه‌کَلونای خُو نَکدیم، ولے ما دَ اورُشَلیم دِستگِیر شُده تسلِیمِ رُومیا شُدیم. ۱۸رُومیا از مه تحقِیق کد و میخاست که مَره ایله کُنه، چراکه هیچ جُرمی دَز مه پَیدا نَشُد که سزاوارِ مَرگ بَشه. ۱۹مگم یهُودیا مُخالِفَت کد و ما مجبُور شُدُم که از قَیصر دادخاهی کنُم. باوجُودِ ازی ام دَ ضِدِ قَوم خُو هیچ شِکایتی نَدَرُم. ۲۰دَ امزی دلِیل شُمو ره کُوی کدُم تا شُمو ره بِنگرُم و قد شُمو توره بُگُم، چُون ما از خاطرِ اُمِیدِ اِسرائیل دَ اِی زَنجِیر بَند اَستُم.“ ۲۱اُونا دَزُو گُفت: ”هیچ کُدَم خط از ولایتِ یهُودیه دَ بارِه ازتُو دَز مو نَرسِیده و از بِرارونی که ازُونجی اَمَده ام کسی دَ بارِه تُو توره یا خبرِ بَد نَگُفته. ۲۲لیکِن مو میخاهی نظر تُو ره بِشنَوی. مو مِیدَنی که مردُم دَ هر جای دَ ضِدِ امزی فِرقه بَدگویی مُونه.“
۲۳پس اُونا یگ روز ره تعیِین کد و غَدر کسا بَلدِه دِیدونِ پولُس دَ خانِه شی اَمَد. اوخته اُو از صُبح تا شاو دَ بارِه پادشاهی خُدا قد ازوا دَ تفصِیل توره گُفت و کوشِش کد که قد شریعتِ مُوسیٰ و نوِشته های اَنبیا اُونا ره دَ بارِه عیسیٰ مسیح قِناعت بِدیه. ۲۴بَعضی ازوا توره های ازُو ره قبُول کده ایمان اَوُرد، ولے بَعضی های شی ایمان نَوُرد. ۲۵وختِیکه دَ بَین ازوا اِختِلافِ نظر پَیدا شُد، اُونا اُونجی ره ایله کد. مگم پیش از رَفتونِ ازوا پولُس اینی توره ره گُفت: ”روح اُلقُدس تَوَسُطِ اِشعیا نَبی دَ بابه‌کَلونای شُمو چی خُوب گُفته بُود،
۲۶’دَ پیشِ امزی قَوم بورُو و بُگی:
”شُمو شِنِیده مورِید، مگم هرگِز پَی نَمُوفتِید؛
دَوامدار توخ مُونِید، لیکِن هرگِز نَمِینگرِید،
۲۷چُون دِلِ امزی قَوم سخت شُده
و گوشای شی گِرَنگ شُده
و اُونا چِیمای خُو ره پُوٹ گِرِفته،
نَشُنه که قد چِیمای خُو بِنگره
و قد گوشای خُو بِشنَوه
و قد دِل خُو پَی بُبره و پس تاو بُخوره
و ما اُونا ره شفا بِدیُم.“‘
۲۸و آلی بِدَنِید که اِی نِجاتِ اِلٰهی دَ غَیرِ یهُودیا دَده شُده و اُونا اُو ره قبُول مُونه.“ ۲۹[غَیتِیکه پولُس اِی چِیزا ره گُفت، یهُودیا دَ حالِیکه قد یگدِیگِه خُو سخت بَحث مُوکد، ازُونجیرفت.]
۳۰پولُس دُو سالِ تمام دَ خانِه کِرایی زِندگی مُوکد و هرکسی ره که دَ پیش شی میمَد، خوش اَمدِید مُوگُفت. ۳۱اُو دَ دلیری کامِل و آزادانه پادشاهی خُدا ره اِعلان مُوکد و دَ بارِه مَولا عیسیٰ مسیح تعلِیم مِیدَد.