۱بعد از اَبِیمَلِک، تولَع باچِه فُوَه نوسِه دودو، یگ نفر از طایفِه یسّاکار باله شُد تا اِسرائیل ره نِجات بِدیه. اُو دَ شامِیر دَ کوهِستونِ اِفرایم زِندگی مُوکد. ۲اُو بَنی اِسرائیل ره مُدَتِ بِیست و سِه سال رهبری کد. بعد ازُو فَوت کد و دَ شامِیر دَفن شُد.
۳بعد ازُو یائیرِ جِلعادی باله شُد و بَنی اِسرائیل ره بَلدِه بِیست و دُو سال رهبری کد. ۴اُو سی باچه دَشت که دَ بَلِه سی اُلاغ سوار مُوشُد و اُونا سی شار دَشت که دَ سرزمِینِ جِلعاد بُود و تا اِمروز دَ نامِ حَووت-یائیر یاد مُوشه. ۵یائیر فَوت کد و دَ قامون دَفن شُد.
۶بَنی اِسرائیل بسم چِیزای ره که دَ نظرِ خُداوند زِشت بُود، انجام دَد؛ اُونا بُت های بَعل، عَشتاروت، خُدایونِ ارام، خُدایونِ صَیدون، خُدایونِ موآب، خُدایونِ عمونیا و خُدایونِ فَلسطِینیا ره عِبادت کد. دَ امزی رقم اُونا خُداوند ره ایله کد و اُو ره عِبادت نَکد؛ ۷و آتِشِ غَضَبِ خُداوند دَ خِلافِ بَنی اِسرائیل دَر گِرِفت و اُو اُونا ره سَودا کده دَ دِستِ فَلسطِینیا و عمونیا دَد. ۸و اُونا امزُو سال دَ بَلِه بَنی اِسرائیل ظُلم و سِتَم ره شُروع کد و بَلدِه هژده سال دَ بَلِه پگِ بَنی اِسرائیل که دَ اُو طرفِ دریای اُردُن دَ سرزمِینِ اَموریا دَ جِلعاد زِندگی مُوکد ظُلم کد. ۹عمونیا ام از دریای اُردُن تیر شُد تا قد خانَوار های یهُودا و بِنیامِین و اِفرایم جنگ کنه؛ خُلاصه، اِسرائیل دَ تَنگی-و-پریشانی سخت گِرِفتار بُود. ۱۰دَ امزُو غَیت بَنی اِسرائیل دَ پیشِ خُداوند ناله-و-فریاد کده گُفت: ”مو دَ ضِد تُو گُناه کدے، چراکه مو خُدای خُو ره ایله کده بُت های بَعل ره عِبادت کدے.“ ۱۱اوخته خُداوند دَ بَنی اِسرائیل گُفت: ”آیا ما شُمو ره از دِستِ مِصریا، اَموریا، عمونیا و فَلسطِینیا نِجات نَدَدُم؟ ۱۲امچُنان وختِیکه صَیدونیا، عمالیقیا و مَعونیا دَ بَلِه شُمو ظُلم کد و شُمو دَ پیش مه ناله-و-فریاد کدِید، ما شُمو ره از دِستِ ازوا نِجات دَدُم. ۱۳لیکِن شُمو مَره ایله کده خُدایونِ بیگَنه ره عِبادت کدِید، پس دِیگه شُمو ره نِجات نَمِیدیُم. ۱۴بورِید و دَ پیشِ خُدایونی که اِنتِخاب کدید، ناله-و-فریاد کُنِید تا اُونا شُمو ره از تَنگی-و-پریشانی شُمو خلاص کنه.“ ۱۵لیکِن بَنی اِسرائیل دَ خُداوند گُفت: ”مو گُناه کدے. هر چِیزی که دَ نظر تُو خُوب معلُوم مُوشه قد ازمو امُو رقم رفتار کُو، ولے از رُوی لُطف خُو اِمروز مو ره نِجات بِدی.“ ۱۶پس اُونا خُدایونِ بیگَنه ره از مینکل خُو دُور کد و خُداوند ره عِبادت کد؛ و دِلِ خُداوند دَ رَنج-و-مُصِیبتِ بَنی اِسرائیل سوخت.
۱۷پس عمونیا جم شُده دَ جِلعاد خَیمه زَد و بَنی اِسرائیل جم شُده دَ مِصفه خَیمه زَد. ۱۸اوخته رهبرای قَوم، یعنی سرکرده های جِلعاد دَ یگدِیگِه خُو گُفت: ”هر کس که جنگ ره دَ خِلافِ عمونیا شُروع کُنه، اونَمُو حاکِمِ پگِ باشِنده های جِلعاد مُوشه.“