۱ څښتن موسی ته وویل: ۲ «هارون ته ووایه چې په څراغدان باندې اووه څراغونه داسې کېږدي، ترڅو د څراغدان مخې ته رڼا ورکړي.» ۳ هارون دا خبره ومنله او لکه څنګه چې ورته ویل شوي وو، څراغونه یې هماغسې کېښودل. ۴ څراغدان د سر څخه نیولې تر پایې پورې د ټکول شویو سرو زرو څخه جوړ شوی ؤ او کټ مټ د هغې نقشې سره سم ؤ لکه څنګه چې څښتن موسی ته ښودلې وه.
۵ څښتن موسی ته وویل: ۶ «لاویان د نورو اسراییلیانو څخه بېل کړه او پاک یې کړه. ۷ د دې دپاره چې هغوی پاک کړې، نو داسې وکړه: په هغوی باندې پاکوونکې اوبه وشینده او ورته ووایه چې د خپل بدن ټول ویښتان وخرایي او خپل کالي ووینځي، نو هغوی به پاک شي. ۸ هغوی دې یو خوسی او د غلې دانې هغه نذرانه راوړي چې د ښو اوړو څخه جوړه شوې وي او د زیتونو تېل ورسره ګډ وي. بل غویی دې د ګناه د نذرانې په توګه راولي. ۹ بیا به د اسراییلو ټول قوم راوغواړې او لاویانو ته به ووایې چې د سپېڅلې خېمې مخې ته لاړ شي. ۱۰ هلته به زما په حضور کې قوم خپل لاسونه د لاویانو په سرونو باندې کېږدي. ۱۱ هارون به لاویان د قوم له خوا د یو ځانګړي سوغات په توګه ماته وړاندې کړي، ترڅو هغوی زما خدمت وکړي.
۱۲ له هغې وروسته دې لاویان خپل لاسونه د غویانو په سرونو باندې کېږدي. بیا به یو غویی د ګناه د نذرانې په توګه قرباني شي او بل د سوځېدونکې نذرانې په توګه، ترڅو د لاویانو دپاره کفاره ادا شي. ۱۳ لاویان د یو ځانګړي سوغات په توګه ماته وقف کړه او هارون او د هغه زامن د هغوی مشران کړه. ۱۴ په دې ډول به لاویان د نورو اسراییلیانو څخه بېل کړې او هغوی به زما شي. ۱۵ وروسته له هغې چې تا لاویان پاک او وقف کړل، بیا به هغوی ته اجازه ورکړل شي چې په سپېڅلې خېمه کې کار وکړي. ۱۶ لاویان یوازې زما دي او هغوی مې د اسراییلو د ټولو مشرانو زامنو په ځای قبول کړي دي. ۱۷ کله چې ما د مصریانو مشران زامن او لومړني زېږېدلي حیوانات ووژل، دا پرېکړه مې وکړه چې په هرې اسراییلي کورنۍ کې مشران زامن او د هغوی د رمو او پادو څخه هر لومړنی زېږېدلی نر حیوان به زما وي. ۱۸ خو اوس ما د اسراییلو د ټولو مشرانو زامنو په ځای لاویان غوره کړي دي. ۱۹ د ټولو اسراییلیانو څخه مې لاویان هارون او د هغه زامنو ته د سوغاتونو په توګه ورکړي دي چې په سپېڅلې خېمه کې د قوم په خاطر کار وکړي او د هغوی دپاره کفاره ادا کړي، ترڅو کله چې اسراییلیان سپېڅلي ځای ته ورنژدې کیږي، په هغوی باندې کوم افت رانه شي.»
۲۰ لکه څنګه چې څښتن موسی ته حکم کړی ؤ، نو موسی، هارون او د اسراییلو ټول قوم لاویان وقف کړل. ۲۱ لاویانو خپل ځانونه پاک کړل او خپل کالي یې ووینځل او هارون هغوی د یو ځانګړي سوغات په توګه څښتن ته وقف کړل او د هغوی د پاکوالي دپاره یې کفاره ادا کړه. ۲۲ له دې وروسته لکه څنګه چې څښتن حکم کړی ؤ، لاویانو د هارون او د هغه د زامنو د مرستیالانو په توګه په سپېڅلې خېمه کې کار کاوه.
۲۳ څښتن موسی ته وویل: ۲۴-۲۵ «هغه لاویان چې عمر یې د پنځه ویشتو او پنځوسو کالو ترمنځ وي، کولای شي چې په سپېڅلې خېمه کې کار وکړي. خو څنګه چې د پنځوسو کالو څخه یې عمر زیات شي، نور باید کار ونه کړي. ۲۶ هغوی کولای شي چې د سپېڅلې خېمې په دندو کې د نورو لاویانو سره مرسته وکړي، خو په خپله باید د کوم کار مسوولیت په غاړه ونه لري. په دې ډول لاویانو ته دندې وسپاره.»