۱ د دوهم کال په لومړۍ میاشت وروسته له دې چې د اسراییلو قوم د مصر څخه راووت، څښتن د سینا په دښته کې د موسی سره خبرې وکړې. هغه وویل: ۲-۳ «د اسراییلو قوم باید د فسحې اختر په ټاکل شوي وخت یعنې د دې میاشتې په څوارلسمه ورځ د لمرپرېواته په وخت د دې اختر د ټولو قوانینو او مقرراتو له مخې ولمانځي.» ۴ نو موسی قوم ته وویل چې د فسحې اختر ولمانځي ۵ او هغوی دا کار د اولې میاشتې د څوارلسمې ورځې په ماښام د سینا په دښته کې وکړ. قوم هرڅه هماغه شان وکړل لکه څنګه چې څښتن موسی ته حکم کړی ؤ.
۶ خو ځینې خلک په مذهبي لحاظ ناپاک وو، ځکه چې د هغوی لاسونه په مړي باندې لګېدلي وو او هغوی ونه شو کولای چې په هغه ورځ د فسحې اختر ولمانځي. نو هغوی موسی او هارون ته ورغلل ۷ او ویې ویل: «مونږ ناپاک یو، ځکه چې زمونږ لاسونه په مړي باندې لګېدلي دي، خو ولې نه شو کولای چې د فسحې اختر ولمانځو او د نورو اسراییلیانو سره په یو وخت څښتن ته نذرانې وړاندې کړو؟»
۸ موسی په ځواب کې وویل: «صبر وکړئ چې زه په دې باندې ځان پوه کړم چې څښتن ستاسو په اړه څه حکم کوي.» ۹ بیا څښتن موسی ته وویل چې ۱۰ د اسراییلو خلکو ته ووایي: «که چېرې تاسو یا ستاسو د اولادې څخه څوک په مړي باندې په لګېدلو سره ناپاک شوی وي او یا په لېرې سفر کې وي، خو وغواړي چې د فسحې اختر ولمانځي، ۱۱ نو هغه دې د دوهمې میاشتې د څوارلسمې ورځې په ماښام یعنې یوه میاشت وروسته ولمانځي. هغه دې د فسحې وری د فطیرې ډوډۍ او ترخو بوټو سره وخوري. ۱۲ د هغه څخه دې هېڅ شی تر سهاره پورې نه پرېږدي او د حیوان هېڅ یو هډوکی دې نه ماتوي. کله چې هغه د فسحې اختر لمانځي، باید د دغو ټولو مقرراتو څخه پیروي وکړي. ۱۳ خو که چېرې ستاسو څخه څوک په مذهبي لحاظ پاک وي او په سفر کې نه وي او د فسحې اختر نه لمانځي، هغه باید زما د قوم څخه وشړل شي. هغه ته به سزا ورکړل شي، ځکه چې ماته یې په ټاکلي وخت نذرانې نه دي وړاندې کړې.
۱۴ که چېرې هغه پردي خلک چې ستاسو په منځ کې اوسیږي وغواړي چې د فسحې اختر ولمانځي، باید د ټولو قوانینو او مقرراتو سره سم یې ولمانځي. همدا قانون په هرچا باندې که هغه اصلي اوسېدونکی وي یا پردي وي، عملي کیږي.»
۱۵-۱۶ په هغه ورځ چې سپېڅلې خېمه ودرول شوه، یوه ورېځ راغله او خېمه یې پټه کړه. ورېځ به هره ورځ هلته وه او د شپې له خوا به د اور په شان ښکاره کېدله. ۱۷ هرکله چې به ورېځ د خېمې څخه پورته شوه، نو اسراییلیان به روان شول. کله به چې ورېځ راښکته شوه، هغوی به خېمې ودرولې. ۱۸ قوم د څښتن په حکم حرکت کاوه او د هغه په حکم به یې خېمې ودرولې. تر هغه وخته پورې چې په خېمه باندې به ورېځ وه، هغوی به په هماغه کمپ کې پاتې کېدل. ۱۹ کله چې به ورېځ په خېمې باندې تر ډېره وخته پورې پاتې کېدله، هغوی د څښتن اطاعت کاوه او کډه یې نه کوله. ۲۰ کله کله به ورېځ په خېمې باندې یوازې د یو څو ورځو دپاره پاتې کېدله، په هر حال کې به هغوی د څښتن د حکم سره سم په کمپ کې پاتې کېدل یا به یې کډه کوله. ۲۱ کله کله ورېځ یوازې د ماښام څخه تر سهاره پورې پاتې کېدله، څنګه به چې ورېځ پورته شوه، هغوی به کډه کوله. هرکله چې ورېځ پورته کېدله، هغوی کډه کوله. ۲۲ که دا به دوه ورځې، یوه میاشت یا به ډېره موده وه، ترڅو چې په خېمې باندې به ورېځ وه هغوی کډه نه کوله. خو کله چې ورېځ پورته کېدله، هغوی به کډه کوله. ۲۳ هغوی به د څښتن په حکم خېمې ودرولې او د هغه په حکم به یې حرکت کاوه. هغوی د څښتن د حکمونو څخه چې د موسی په وسیله یې کول، اطاعت کاوه.