د زبورونو کتاب
شلم زبور
د فتحې دپاره دعا
(د سرود ویونکو د مشر دپاره: د داود زبور)
۱ په سختۍ کې دې څښتن کاندي قبوله ستا دعا
د یعقوب خدای دې ساتنه وکړي ستا
۲ له خپل سپېڅلي ځای نه دې کومک واستوي تا ته
د صهیون له غره دې مرسته وکړي ستا
۳ کړي رایادې دې ستا ټولې نذرانې
کړي قبولې دې ستا ټولې سوځېدونکې قربانۍ
۴ کړي پوره دې هغه ستا د زړه ارمان
او د ستا ټول پلانونه دې کامیاب کړي
۵ بیا به چیغې د خوشحالۍ ستا په بریا کړو
د خپل خدای په نوم به جګ کړو بیرغونه
کړي څښتن دې ټول قبول ستا سوالونه
۶ اوس پوهېږم چې څښتن ژغوري
خپل غوره کړی پاچا
کړي دعا به یې قبوله له خپل پاک ځایه اسمانه
ور به کړي په خپل قدرت هغه ته لویې کامیابۍ
۷ ځینې توکل کوي خپلو جنګي ګاډیو باندې
ځینې توکل کړي خپلو اسونو باندې
زمونږ توکل دی په نامه د خپل څښتن خدای
۸ داسې خلک به ښوییږي او رالویږي
خو مونږ به پاڅېږو او ټینګ به ودرېږو
۹ ای څښتنه، ته پاچا ته بری ورکړه
د کومک دپاره زمونږه فریاد واوره