۱آلی دَ بارِه خوراک های که دَ بُت ها قُربانی مُوشه: مو مِیدَنی که «پگ مو دانایی دَری.» دانایی مِیتَنه باعِثِ کِبر-و-غرُور شُنه، مگم مُحَبَت آباد مُوکُنه. ۲اگه کُدَم کس فِکر مُونه که یَگو چِیز ره مِیدَنه، اُو هنوز امُوطور که لازِم اَسته نَمِیدَنه. ۳مگم کسی که خُدا ره دوست دَره، اُو دَ وسِیلِه خُدا شِنَخته شُده. ۴پس، دَ بارِه خوردونِ خوراک های که دَ بُت ها قُربانی مُوشه، مو مِیدَنی که دَ دُنیا بُت هیچ چِیز نِیَسته و بغَیر از خُدای یگانه دِیگه خُدا وجُود نَدره. ۵اگرچِه چِیزای دَ آسمو و دَ زمی اَسته که مردُم اُونا ره خُدا مُوگیه - دَ حقِیقت غَدر خُدایو و غَدر مَولایو بَلدِه ازوا وجُود دَره - ۶لیکِن بَلدِه ازمو
یگ خُدا وجُود دَره یعنی آتِه آسمانی
که تمامِ چِیزا دَزُو تعلُق دَره و مو بَلدِه ازُو زِندگی مُوکُنی،
و یگ مَولا وجُود دَره یعنی عیسیٰ مسیح
که پگِ چِیزا دَ وسِیلِه ازُو آست شُد و مو دَ وسِیلِه ازُو وجُود دَری.
۷مگم پگِ مردُم اِی دانایی ره نَدره، چُون بعضی کسا دَ اندازِه قد بُت ها عادت کده که تا آلی ره خوراک ره دَ عِنوانِ قُربانی بُت ها مُوخوره و ازی که وِجدانِ ازوا ضعِیف اَسته نَجِس مُوشه. ۸لیکِن خوراک، مو ره دَ خُدا نزدِیک نَمُونه، چراکه دَ خوردون شی مو خُوبتَر نَمُوشی و دَ ناخوردون شی بَدتَر نَمُوشی. ۹مگم اِحتیاط کُنِید که اِی آزادی شُمو باعِثِ لخشِیدونِ مردُمای ضعِیف نَشُنه. ۱۰چُون اگه کُدَم کس تُو ره که دانا اَستی بِنگره که دَ بُت‌خانه سرِ دِسترخو شِشتے، ازی که وِجدانِ ازُو ضعِیف اَسته، آیا اُو تشوِیق نَمُوشه که از قُربانی بُت ها بُخوره؟ ۱۱پس دَ وسِیلِه دانایی ازتُو امُو بِرارِ ضعِیف که مسیح بَلدِه شی مُرد، تباه مُوشه. ۱۲و امی رقم وختِیکه شُمو دَ حقِ بِرارونِ ایماندار گُناه مُونِید و دَ وِجدانِ ضعِیفِ ازوا ضَرَر مِیرسَنِید، دَ حقِیقت شُمو دَ ضِدِ مسیح گُناه مُونِید. ۱۳امزی خاطر، اگه خوراکی که دَ بُت ها قُربانی شُده باعِثِ لخشِیدونِ بِرارِ ایماندار مه شُنه، ما هرگِز امزی رقم گوشت نَمُوخورُم تا باعِثِ لخشِیدونِ بِرارِ خُو نَشُنُم.