کِتابِ تَورات - بَخشِ اوّل - پَیدایش
فصلِ چِل و شَشُم
اِسرائیل قد خانَوار خُو دَ مِصر موره
۱پس اِسرائیل قد هر چِیزی که دَشت حَرکت کده دَ منطقِه بِئیرشِبَع رفت و بَلدِه خُدای آتِه خُو اِسحاق قُربانی‌ها تقدِیم کد. ۲و خُدا دَ غَیتِ شاو دَ عالمِ خاو قد اِسرائیل گپ زَده گُفت: ”یعقُوب، یعقُوب!“
اُو گُفت: ”اَمر کُو صاحِب.“
۳اُو گُفت: ”ما خُدا اَستُم، خُدای آتِه تُو. از رفتو دَ مِصر ترس نَخور، چراکه ما دَ اُونجی از تُو یگ مِلَّتِ کٹه جور مُونُم. ۴ما قد تُو دَ مِصر مورُم و امچُنان تُو ره ازُونجی پس میرُم. و یوسُف چِیمای تُو ره پُوٹ مُونه.“
۵اوخته یعقُوب از بِئیرشِبَع حَرکت کد و باچه‌های اِسرائیل آتِه خُو یعقُوب ره قد اَولادا و خاتُونوی خُو دَ گاڈی‌های سوار کد که فِرعَون بَلدِه اَوُردونِ ازوا رَیی کدُد. ۶اُونا گلّه-و-رمه و دارایی ره که دَ سرزمِین کِنعان دَ دِست اَوُردُد، قد خُو گِرِفته بُرد. دَمزی رقم یعقُوب قد تمامِ اَولادِه خُو دَ مِصر رفت: ۷اُو باچه‌ها و باچه‌گونِ باچه‌های خُو، دُخترون خُو و دُخترونِ باچه‌های خُو، یعنی تمامِ نسل خُو ره قد خُو دَ مِصر بُرد.
۸اینیا نام‌های باچه‌های اِسرائیل، یعنی یعقُوب و اَولادِه شی اَسته که دَ مِصر رفت:
رئـوبین باچِه اوّلباری یعقُوب ۹و باچه‌های رئـوبین: حَنوخ، فَلُّو، حِصرون و کَرمی.
۱۰شِمعون و باچه‌های شی: یمُوئیل، یامِین، اوهَد، یاخِین، صوحَر و شائول؛ شائول باچِه خاتُونِ کِنعانی بُود.
۱۱لاوی و باچه‌های شی: جِرشون، قُهات و مِراری.
۱۲یهُودا و باچه‌های شی: عیر، اونان، شیلاه، پِرِص و زِرَح. مگم عیر و اونان دَ سرزمِینِ کِنعان فَوت کد. باچه‌های فارِص اینیا بُود: حِصرون و حامُول.
۱۳یسّاکار و باچه‌های شی: تولاع، فُوَه، یَشُوب و شِمرون.
۱۴زِبُولُون و باچه‌های شی: سارِد، ایلون و یاحَلی‌ئیل.
۱۵اینیا باچه‌های لیه بُود که اُو دَ شمُولِ دُختر خُو دِینه دَ منطقِه فَدان اَرام بَلدِه یعقُوب دَ دُنیا اَوُردُد. پگِ اَولادِه یعقُوب از لیه، باچه‌ها و دُخترون شی سی و سِه نفر بُود.
۱۶جاد و باچه‌های شی: صِفیون، حَجّی، شونی، اِصبون، عیری، اَرودی و اَرئیلی.
۱۷اَشِیر و باچه‌های شی: یمنه، یشوَه، یشوِی، بِریعه، و خوارِ ازوا سِرَح. و باچه‌های بِریعه: حِبِر و مَلکِیئیل.
۱۸اینَمیا بچکِیچای زِلفه بُود که لابان اُو ره بحَیثِ کنِیز دَ دُختر خُو لیه دَده بُود. زِلفه امی شونزده نفر ره بَلدِه یعقُوب دَ دُنیا اَوُرد.
۱۹باچه‌های راحیل، خاتُونِ یعقُوب: یوسُف و بِنیامِین.
۲۰بَلدِه یوسُف دَ سرزمِینِ مِصر، مَنَسّی و اِفرایم پَیدا شُد که آسِنات دُخترِ پوطی‌فِرَع پیشوای شارِ اون بَلدِه شی دَ دُنیا اَوُرد.
۲۱بِنیامِین و باچه‌های شی: بِلَع، باکِر، اَشبِیل، جِیرا، نعمان، ایحی، رُش، مُپِیم، حُپِیم و آرِد.
۲۲اینَمیا باچه‌ها و نوسه‌گونِ راحیل بُود که بَلدِه یعقُوب پَیدا شُد و پگ شی چارده نفر بُود.
۲۳باچِه دان: حوشِیم.
۲۴نَفتالی و باچه‌های شی: یَحصئیل، جونی، یَصر و شِلئیم.
۲۵اینَمیا باچه‌ها و نوسه‌گونِ بِلهه بُود که لابان اُو ره بحَیثِ کنِیز دَ دُختر خُو راحیل دَده بُود. اَمیا ره بِلهه بَلدِه یعقُوب دَ دُنیا اَوُرد که پگ شی هفت نفر بُود.
۲۶تِعداد کسای که قد یعقُوب دَ مِصر رفت، یعنی کسای که از پُشتِ کمرِ ازُو پَیدا شُدُد، بَغَیر از بیری‌گون شی جُمله شصت و شَش نفر بُود. ۲۷باچه‌های یوسُف که دَ مِصر بَلدِه شی پَیدا شُدُد، دُو نفر بُود. پس تعدادِ خانَوارِ یعقُوب که دَ مِصر رفتُد، هفتاد نفر بُود.
یعقُوب قد خانَوار خُو دَ منطقِه جوشَنِ مِصر مِیرَسه
۲۸و یعقُوب یهُودا ره پیشلو دَ دِیرِ یوسُف رَیی کد تا راهِ منطقِه جوشَن ره دَزوا نِشو بِدیه. دَ امزی رقم اُونا دَ جوشَن رسِید. ۲۹اوخته یوسُف گاڈی خُو ره تَیار کده سَوار شُد و دَ دَمِ راهِ آتِه خُو اِسرائیل دَ جوشَن رفت. وختِیکه یوسُف دَ پیشِ آتِه خُو رسِید، اُو خود ره دَ گَردون شی اَندخت و بَلدِه یگ مُدَت دَ بَلِه گردون شی چخرا کد.
۳۰اِسرائیل دَ یوسُف گُفت: ”آلی اگه بُمُرُم اَرمو نَدَرُم، چراکه رُوی تُو ره دِیدُم و یَقِین مه اَمَد که تُو هنوز زِنده اَستی.“
۳۱اوخته یوسُف دَ بِرارو و دِیگه نفرای خانَوارِ آتِه خُو گُفت: ”ما مورُم تا دَ فِرعَون خبر بِدیُم و دَز شی بُگیُم که بِرارون مه و خانَوارِ آتِه مه که دَ سرزمِینِ کِنعان زِندگی مُوکد، دَ دِیرِ ازمه اَمَده. ۳۲اُونا چوپو اَسته و مالداری مُوکُنه؛ و اُونا گلّه‌ها و رمه‌های خُو ره قد تمامِ دارایی خُو اَوُرده. ۳۳وختِیکه فِرعَون شُمو ره کُوی مُوکُنه و پُرسان مُونه که ’کِسب-و-کار شُمو چی اَسته؟‘ ۳۴شُمو بُگِید: ’غُلامای شُمو از ریزَگی تا آلی ره مالداری کده، ام مو و ام بابه‌کَلونای مو.‘ اِی ره بُگِید تا اُو دَز شُمو اِجازه بِدیه که دَ منطقِه جوشَن جای-دَ-جای شُنِید، چراکه مِصریا از تمامِ چوپونو کِرک دَره.“