۱پس بیِید که از تعلِیمِ اِبتِدایی دَ بارِه مسیح تیر شُنی و سُون کامِل شُدو پیش بوری و بسم تادَو نَه ایلی که از نَو از کارای که سُون مَرگ مُوبره توبه کنی و از نَو دَ خُدا ایمان بیری ۲و از نَو دَ بارِه غُسل های تعمِید، ایشتونِ دِست ها بَلدِه دُعا، دُوباره زِنده شُدونِ مُرده ها و قضاوَتِ اَبَدی تعلِیم بِگِیری. ۳و امی کار ره ام انجام مِیدی، اگه خُدا اِجازه بِدیه.
۴چُون کسای که یگ دفعه پُرنُور شُده و مَزِه بخشِشِ آسمانی ره چشِیده و دَ روح اُلقُدس حِصّه دَره ۵و مَزِه خُوبی کلامِ خُدا و قُدرتِ عالمِ آینده ره چشِیده ۶و بعد ازُو از راه بُر شُده، اِمکان نَدره که اُونا بسم سُون توبه اَوُرده شُنه، چراکه اُونا باچِه خُدا ره بَلدِه ضَرَرِ خودون خُو بسم دَ صلِیب میخکوب مُونه و اُو ره بَرمَلا بےحُرمَت مُوکُنه. ۷اگه یگ زمی، بارِشی ره که بار بار دَ بَلِه شی مُوباره چُوش مُونه و حاصِلِ خُوب بَلدِه دیغونوی خُو مِیدیه، از طرفِ خُدا بَرکت پَیدا مُونه. ۸لیکِن اگه خار و خاشه حاصِل مِیدیه، اُو بےاَرزِش اَسته و نزدِیک دَ لعنت؛ و دَ آخِر ام سوختَنده مُوشه.
۹اَی عزِیزا، اگرچِه مو امی رقم توره مُوگی، لیکِن دَ بارِه شُمو اِطمِینان دَری که شُمو چِیزای خُوبتَر دَ زِندگی خُو دَرِید که دَ نِجات تعلُق دَره. ۱۰چُون خُدا بےاِنصاف نِییه، اُو کاری ره که شُمو کدِید و مُحَبَتی ره که شُمو بخاطرِ نامِ ازُو دَ خِدمتِ مُقَدَّسِین نِشو دَدِید و هنوز ام نِشو مِیدِید، پُرمُشت نَمُونه. ۱۱مگم مو آرزو دَری که هر کُدَمِ از شُمو امی رقم جِدیَت ره بَلدِه یقِینِ کامِل که دَ اُمِید خُو دَرِید تا آخِر نِشو بِدِید ۱۲و ٹمبل نَبَشِید، بَلکِه از کسای سرمَشق بِگِیرِید که دَ وسِیلِه ایمان و صَبر وارِثِ وعده ها مُوشه.
۱۳وختِیکه خُدا دَ اِبراهِیم وعده دَد، ازی که از خود شی کده بُزُرگتَر وجُود نَدَشت که دَزُو قَسم بُخوره، اُو دَ ذات خُو قَسم خورده ۱۴گُفت: ”ما یقِیناً تُو ره بَرکت مِیدیُم و نسل تُو ره بےاندازه کَلو مُونُم.“ ۱۵و دَ امزی رقم، اِبراهِیم بعد ازی که صَبر کده اِنتِظار کشِید وعده ره دَ دِست اَوُرد. ۱۶آدما دَ یَگو کسی بُزُرگتَر از خود قَسم مُوخوره و قَسم بَلدِه اِثبات کدو خورده مُوشه و تمامِ جَر-و-بَحث ره خَتم مُونه. ۱۷دَ امزی رقم وختی خُدا خاست که تغیِیرناپذِیر بُودونِ قَصد خُو ره دِیگه ام واضِحتَر دَ وارِثای وعده نِشو بِدیه، اُو ره دَ وسِیلِه قَسم تصدِیق کد. ۱۸ اُو اِی کار ره کد تاکه مو دَ وسِیلِه دُو چِیزی تغیِیرناپذِیر که اِمکان نَدره خُدا دَ بارِه ازوا دروغ بُگیه، تَسَلّی قَوی پَیدا کُنی، مو کسای که دَزُو پناه بُردے تا اُمِیدی ره که دَ پیشِ رُوی مو ایشته شُده، محکم بِگِیری. ۱۹امی اُمِید رقمِ یگ لَنگرِ کِشتی بَلدِه جان مو محکم و مُطمَئِن اَسته، اُمِیدی که دَ جایگاهِ پُشتِ پردِه خانِه خُدا داخِل مُوشه، ۲۰دَ جایی که عیسیٰ دَ عِنوانِ پیشقَدَم از طرفِ ازمو داخِل شُده و تا اَبَد پیشوای بُزُرگ دَ مقامِ مَلکی‌صدِق تعیین شُده.