کِتابِ مِیکاه نَبی
فصلِ سِوّم
سرزنِشِ رهبرا و اَنبیا
۱اوخته ما گُفتُم:
”اَی رهبرای یعقُوب
و حُکمرانای خانَوارِ اِسرائیل، بِشنَوِید!
آیا شُمو نَباید اِنصاف ره بِدَنِید؟
۲شُمو کسای که از خُوبی نفرَت دَرِید و بَدی خوش شُمو مییه،
شُمو کسای که پوست ره از جِسمِ مردُم
و گوشت ره از استُغونای ازوا مِیکَنِید؛
۳ شُمو کسای که گوشتِ قَوم مَره مُوخورِید،
پوستِ ازوا ره از جِسمِ ازوا جدا مُونِید،
استُغونای ازوا ره مَیده مُونِید
و اُونا ره ٹوٹه ٹوٹه مُوکُنِید رقمِ استُغونای مَنِه دیگ
و رقمِ گوشتِ مَنِه دیگِ کٹه.
۴وخت شی مییه که امی حُکمرانا دَ پیشِ خُداوند ناله-و-فریاد مُونه،
لیکِن اُو دَزوا جواب نَمِیدیه؛
بَلکِه رُوی خُو ره دَ امزُو غَیت ازوا تاشه مُونه،
چراکه اُونا مُرتکِبِ اعمالِ شرِیرانه شُده.“
۵خُداوند دَ بارِه اَنبیای که قَوم مَره گُمراه مُونه یگ پَیغام دَره، دَ بارِه امزُو اَنبیا که وختی یَگو کس دَ دانِ ازوا یَگو چِیز تیله مُونه، بَلدِه ازُو دُعای خَیر مُونه، لیکِن کسی که یَگو چِیز دَ دانِ ازوا تیله نَمُوکُنه، دَ خِلافِ ازُو اِعلانِ جنگ مُونه؛ اَرے، خُداوند دَ بارِه ازوا اینی رقم مُوگیه:
۶”اینه، دَ بَلِه شُمو شاو مُوشه و شُمو دِیگه رویا نَمِینگرِید
و ترِیکی مُوشه و دِیگه پالگِیری نَمِیتَنِید.
آفتَو از بَلِه اَنبیا مِیشِینه
و روز دَ بَلِه ازوا ترِیک مُوشه.
۷کسای که رویا مِینگره رَسوا مُوشه
و کسای که پالگِیری مُونه شرمِنده؛
اُونا پگ شی دِست خُو ره دَ بَلِه دان خُو مِیگِیره،
چراکه از طرفِ خُدا هیچ جواب نَمییه.“
۸لیکِن ما پُر از قُدرت شُدیم،
پُر از روحِ خُداوند،
و پُر از اِنصاف و جُراَت
تا دَ یعقُوب خطای شی ره اِعلان کنُم
و دَ اِسرائیل گُناهِ شی ره.
۹اَی رهبرای خانَوارِ یعقُوب
و حُکمرانای خانَوارِ اِسرائیل، اِی ره بِشنَوِید،
شُمو کسای که از اِنصاف بَد مُوبرِید
و هر چِیزی راست ره کَج معنیٰ مُونِید،
۱۰ شُمو کسای که صَهیون ره دَ وسِیلِه ریختَندونِ خُون آباد مُونِید،
اورُشَلیم ره دَ وسِیلِه شرارَت!
۱۱حُکمرانای اورُشَلیم بَلدِه رِشوَت قضاوَت مُوکُنه،
پیشوایون شی بِدُونِ مُزد تعلِیم نَمِیدیه
و اَنبیای ازُو بَلدِه پَیسه پالگِیری مُونه؛
هنوز ام دَ خُداوند تَوَکُل کده مُوگیه:
”یقِیناً خُداوند قد ازمو اَسته؛
هیچ بَلا دَ بَلِه مو نَمییه!“
۱۲پس بخاطرِ ازشُمو
صَهیون رقمِ زمی قُلبه مُوشه،
اورُشَلیم یگ کوڈِ خرابه جور مُوشه
و کوهِ خانِه خُدا دَ بِلندی که پُر از جنگل اَسته تَبدِیل مُوشه.