۱خُداوند قد مُوسیٰ و هارُون گپ زَده گُفت: ۲”اَولادِه قُهات ره از مینکلِ لاویا دَ مُطابِقِ اَولادِ بابه ها و خانَوار های بابه‌کَلونای ازوا سرشُماری کُو، ۳از سی ساله و باله‌تَر تا پِنجاه ساله، هر مَردی ره که مِیتَنه دَ جمِ خِدمتگارا دَ خَیمِه مُلاقات کار کُنه.
۴خِدمتِ اَولادِه قُهات دَ خَیمِه مُلاقات اینی بَشه: نِگاهداری و کوچ دَدونِ مُقَدَّستَرِین چِیزا. ۵وختِیکه خَیمه‌گاهِ بَنی اِسرائیل کوچ مُونه، ھارُون و باچه های شی داخِلِ خَیمِه مُقَدَّس بوره و پردِه مُقَدَّستَرِین جای ره تاه اَوُرده صندُوقِ شهادَت ره قد شی بُپوشَنه؛ ۶و دَ بَلِه ازُو یگ پوش از پوستِ نَرم-و-قِیمَتی قرار دَده یگ رختِ کامِلاً لاجوَردی دَ بَلِه شی اَوار کنه و دِستَک‌چیوهای شی ره دَ حلقه ھای ازُو تیر کنه. ۷دَ رُوی میزِ نانِ حُضُورِ خُداوند اُونا یگ رختِ لاجوَردی اَوار کُنه و دَ بَلِه ازُو کاسه ھا و قاب ھا ره بیله و امچُنان پیله ھا و صورایی ھا ره بَلدِه هدیِه وُچی کدَنی؛ نانِ مُقَدَّس ام دَ بَلِه ازُو بَشه. ۸اُونا یگ رختِ سُرخ رنگ ره دَ بَلِه ازوا اَوار کُنه و اُو ره قد پوستِ نَرم-و-قِیمَتی پوشَنده دِستَک‌چیوهای شی ره دَ حلقه ھای ازُو تیر کُنه. ۹اُونا یگ رختِ لاجوَردی بِگِیره و چِراغدان ره که بَلدِه روشَنی اَسته قد چِراغای شی، چِراغ گُلگَرَک های شی، پطنُوس ھای شی و پگِ ظرفای روغون شی که بَلدِه ازُو دَ کار موره بُپوشَنه. ۱۰بعد ازُو اُو ره و پگِ اَسباب شی ره قد پوستِ نَرم-و-قِیمَتی بُپوشَنه و دَ بَلِه زَمبیلِ چوبی بیله. ۱۱دَ رُوی قُربانگاهِ طِلّایی اُونا یگ رَختِ لاجوَردی اَوار کُنه و اُو ره قد پوستِ نَرم-و-قِیمَتی بُپوشَنه و دِستَک‌چیوهای شی ره دَ حلقه ھای ازُو تیر کنه. ۱۲و اُونا تمامِ اَسبابِ خِدمت ره که قد ازوا دَ جایگاهِ مُقَدَّس خِدمت مُوشه دَ یگ رَختِ لاجوَردی بیله و اُونا ره قد پوستِ نَرم-و-قِیمَتی پوشَنده دَ بَلِه زَمبیلِ چوبی بیله. ۱۳اُونا خگِشترِ قُربانگاهِ برونزی ره خالی کنه و دَ رُوی قُربانگاه یگ رَختِ اَرغَوانی اَوار کنه. ۱۴بعد ازُو پگِ اَسبابِ قُربانگاه ره که بَلدِه خِدمتِ ازُو دَ کار موره، یعنی آتِشدان ها، چَنگک ھا، خاک انداز ھا، کاسه ھا و تمامِ اَسبابِ دِیگِه شی ره دَ رُوی رَخت ایشته دَ بَلِه ازُو یگ پوش از پوستِ نَرم-و-قِیمَتی اَوار کنه و دِستَک‌چیوهای شی ره دَ حلقه های ازُو تیر کنه. ۱۵وختِیکه ھارُون و باچه های شی پوشَندونِ چِیزای مُقَدَّس و پگِ اَسبابِ جایگاهِ مُقَدَّس ره خلاص کد و خَیمه‌گاه آمادِه کوچ دَدو شُد، اوخته اَولادِه قُهات بییه و اُونا ره بُبره؛ مگم اُونا دَ چِیزای مُقَدَّس دِست نَزَنه، نَشُنه که بُمُره. اینَمیا چِیزای اَسته که اَولادِه قُهات باید از خَیمِه مُلاقات اِنتِقال بِدیه. ۱۶اِلعازار باچِه هارُون پیشوا مسئُولِ روغو بَلدِه روشنَیی، بُخورِ خوشبُوی، هدیِه غَلّه-و-دانِه روزانه و روغونِ مَسَح بَشه؛ اُو از تمامِ جایگاهِ مُقَدَّس و هر چِیزی که دَ مَنِه شی اَسته نِظارَت کُنه: از پگِ چِیزای مُقَدَّس و اَسبابِ از جایگاه.“
۱۷و خُداوند قد مُوسیٰ و هارُون گپ زَده گُفت: ۱۸”شُمو نَیلِید که سِلسلِه اَولادِ بابه های قُهاتیا از مینکلِ لاویا قطع شُنه. ۱۹پس اینی کار ره بَلدِه ازوا انجام بِدِید تا زِنده بُمنه و نَمُره: وختِیکه قُهاتیا دَ مُقَدَّستَرِین چِیزا نزدِیک مُوشه، هارُون و باچه های شی باید داخِل بوره و وظِیفه و بارِ هر کُدَمِ ازوا ره تعیین کُنه. ۲۰مگم قُهاتیا نَباید داخِل بوره که چِیزای مُقَدَّس ره توخ کنه، حتیٰ بَلدِه یگ لحظه ام نَه؛ اگه نَه اُونا مُومُره.“
۲۱و خُداوند قد مُوسیٰ گپ زَده گُفت: ۲۲”اَولادِه جِرشون ره ام دَ مُطابِقِ خانَوار های بابه‌کَلونا و اَولادِ بابه های ازوا سرشُماری کُو. ۲۳از سی ساله و باله‌تَر تا پِنجاه ساله، هر کسی ره که مِیتَنه دَ جمِ خِدمتگارا شامِل شُده دَ خَیمِه مُلاقات خِدمت کُنه، حِساب کُو. ۲۴خِدمتِ اَولادِ بابه های جِرشونی دَ بارِه اِنتِقال دَدونِ بار ازی قرار اَسته: ۲۵اُونا باید پرده های خَیمِه مُقَدَّس، یعنی خَیمِه مُلاقات ره قد پوشِش شی و پوشِشِ پوستِ نَرم-و-قِیمَتی که دَ بَلِه ازُو اَسته و پردِه درگِه خَیمِه مُلاقات ره اِنتِقال بِدیه، ۲۶امچُنان پرده ھای حَولی ره که دَ چار طرفِ خَیمِه مُقَدَّس و قُربانگاه اَسته و پردِه درگِه حَولی ره و ریسپونای ازوا و پگِ اَسبابی ره که بَلدِه ازوا دَ کار موره. هرچِیزی که لازِم بَشه دَ بارِه ازوا انجام دَده شُنه، جِرشونیا باید انجام بِدیه. ۲۷تمامِ خِدمتِ جِرشونیا باید دَ اَمرِ هارُون و باچه های شی انجام دَده شُنه، چی کارِ اِنتِقال دَدو بَشه، چی هر کارِ دِیگه؛ شُمو باید وظِیفِه ازوا و تمامِ بارهای ازوا ره تعیین کُنِید. ۲۸اینَمیا خِدمتِ اَولادِ بابه های جِرشونیا دَ خَیمِه مُلاقات اَسته؛ و اُونا وظِیفِه خُو ره دَ زیرِ نظرِ اِیتامار باچِه هارُون پیشوا انجام بِدیه.“
۲۹”اَولادِه مِراری ره دَ مُطابِقِ اَولادِ بابه ها و خانَوار های بابه‌کَلونای ازوا حِساب کُو؛ ۳۰از سی ساله و باله‌تَر تا پِنجاه ساله، هر کسی ره که مِیتَنه دَ جمِ خِدمتگارا شامِل شُده دَ خَیمِه مُلاقات خِدمت کُنه، حِساب کُو. ۳۱وظِیفِه ازوا دَ بارِه اِنتِقال دَدو، دَ پالُوی تمامِ خِدمت های ازوا دَ خَیمِه مُلاقات ازی قرار اَسته: چیو های چارتراشِ جایگاهِ مُقَدَّس، پُشت‌بَندھای شی، ستُون ھای شی و پایه ھای شی، ۳۲ستُون ھای چارطرفِ حَولی و پایه ھای ازوا، میخ ھای ازوا، ریسپونای ازوا قد تمامِ اَسبابِ ازوا و پگِ چِیزای که بَلدِه ازوا دَ کارِ موره. شُمو اَسباب های ره که اُونا باید اِنتِقال بِدیه نام گِرِفته دَزوا تعیین کُنِید. ۳۳اینَمی وظِیفِه اَولادِ بابه های مِراریا اَسته، دَ پالُوی تمامِ خِدمت های ازوا دَ خَیمِه مُلاقات که اُونا باید دَ زیرِ نظرِ اِیتامار باچِه هارُون پیشوا انجام بِدیه.“
۳۴پس مُوسیٰ و هارُون و رهبرای جماعت، اَولادِه قُهات ره دَ مُطابِقِ اَولادِ بابه ها و خانَوار های بابه‌کَلونای ازوا حِساب کد، ۳۵از سی ساله و باله‌تَر تا پِنجاه ساله، هر کسی ره که مِیتنِست دَ جمِ خِدمتگارا شامِل شُده دَ خَیمِه مُلاقات خِدمت کُنه. ۳۶کسای که از جمِ ازوا دَ مُطابِقِ اَولادِ بابه های شی حِساب شُد، دُو هزار و ھفت صد و پِنجاه نفر بُود. ۳۷اینَمی تِعدادِ حِساب شُده های اَولادِ بابه های قُهاتیا بُود، تِعدادِ پگِ کسای که دَ خَیمِه مُلاقات خِدمت مُوکد و مُوسیٰ و هارُون دَ مُطابِقِ اَمری که خُداوند دَ وسِیلِه مُوسیٰ کدُد، حِساب کد.
۳۸کسای که از جمِ اَولادِه جِرشون دَ مُطابِقِ اَولادِ بابه ها و خانَوار های بابه‌کَلونای ازوا حِساب شُد، ۳۹از سی ساله و باله‌تَر تا پِنجاه ساله، هر کسی که مِیتنِست دَ جمِ خِدمتگارا شامِل شُده دَ خَیمِه مُلاقات خِدمت کُنه، ۴۰تِعدادِ حِساب شُده های ازوا دَ مُطابِقِ اَولادِ بابه ها و خانَوار های بابه‌کَلونای ازوا دُو هزار و شَش صد و سی نفر بُود. ۴۱اینَمیا حِساب شُده های اَولادِ بابه های جِرشونیا بُود، تِعدادِ پگِ کسای که دَ خَیمِه مُلاقات خِدمت مُوکد و مُوسیٰ و هارُون دَ مُطابِقِ اَمرِ خُداوند اُونا ره حِساب کد.
۴۲کسای که از جمِ اَولادِه مِراری دَ مُطابِقِ اَولادِ بابه ها و خانَوار های بابه‌کَلونای ازوا حِساب شُد، ۴۳از سی ساله و باله‌تَر تا پِنجاه ساله، هر کسی که مِیتنِست دَ جمِ خِدمتگارا شامِل شُده دَ خَیمِه مُلاقات خِدمت کُنه، ۴۴تِعدادِ حِساب شُده های ازوا دَ مُطابِقِ اَولادِ بابه های ازوا، سِه هزار و دُو صد نفر بُود. ۴۵اینَمیا حِساب شُده های اَولادِ بابه های مِراریا بُود که مُوسیٰ و هارُون دَ مُطابِقِ اَمری که خُداوند دَ وسِیلِه مُوسیٰ کدُد، اُونا ره حِساب کد.
۴۶پگِ کسای که از جمِ لاویا دَ وسِیلِه مُوسیٰ و هارُون و رهبرای اِسرائیل دَ مُطابِقِ اَولادِ بابه ها و خانَوار های بابه‌کَلونای ازوا حِساب شُد، ۴۷از سی ساله و باله‌تَر تا پِنجاه ساله، هر کسی که آمادِه خِدمت بُود و مِیتنِست کارِ خِدمت و کارِ اِنتِقال دَدو ره دَ خَیمِه مُلاقات انجام بِدیه، ۴۸تِعدادِ حِساب شُده های ازوا هشت هزار و پَنج صد و هشتاد نفر بُود. ۴۹دَ مُطابِقِ اَمرِ خُداوند دَ وسِیلِه مُوسیٰ اُونا دَ وظِیفه های مُختلِفِ مُقرَر شُد تا کارِ خِدمت و اِنتِقال دَدو ره انجام بِدیه.
دَ امزی رقم اُونا دَ وسِیلِه مُوسیٰ حِساب شُد، امُو رقم که خُداوند دَزُو اَمر کدُد.