۱-۲ کله چې د انسانانو شمېر د ځمکې په مخ په زیاتېدلو شو او د هغوی لورګانې پیدا شوې، نو د هغوی څخه ځینې دومره ښکلې وې چې د اسماني مخلوقاتو ډېرې خوښې شولې او د هرې یوې سره یې چې غوښتل ودونه یې وکړل. ۳ هغه وخت څښتن وویل: «زه به انسان پرېنږدم چې هغه د تل دپاره ژوندی وي او عمر به یې د یوسلو شلو کالو څخه زیات نه وي، ځکه چې هغه فاني دی.» ۴ کله چې فرښتو د انسانانو د لورګانو سره ودونه وکړل، د هغوی څخه ډېر لوی او قوي انسانان پیدا شول او د پخوانۍ زمانې او حتی وروسته هم مشهور جنګیالي وو.
۵ څښتن ولیدل چې په نړۍ کې د انسان بدکاري زیاته شوې ده او د دوی ټول خیالونه او ارادې تل بدې دي. ۶ نو څښتن پښېمانه شو او هغه خفه شو چې انسان یې د ځمکې په مخ پیدا کړی دی. ۷ نو هغه وویل: «زه به د ځمکې د مخ څخه ټول ژوندي مخلوقات له منځه یوسم! زه به انسانان، حیوانات، مرغان او خزندې له منځه یوسم. زه پښېمانه یم چې دوی مې پیدا کړل.» ۸ خو څښتن د نوح څخه راضي ؤ.
۹ دا د نوح کیسه ده. نوح په خپله زمانه کې نېک او پرهېزګار سړی ؤ او خدای ته ډېر نژدې ؤ. ۱۰ هغه درې زامن درلودل: سام، حام او یافت. ۱۱ خو د خدای په نظر کې ځمکه د فساد څخه ډکه شوې وه او د ظلم زیاتي لمن هرې خواته خپره شوې وه. ۱۲ خدای ولیدل چې دنیا فاسده شوې ده، ځکه چې ټول انسانان بېلارې شوي او فاسد شوي دي.
۱۳ خدای نوح ته وویل: «ما دا پرېکړه کړې ده چې ټول انساني نسل له منځه یوسم، ځکه چې دنیا د دوی د زورزیاتي د عملونو څخه ډکه شوې ده. ۱۴ د ځان دپاره د ډېرو ښو لرګیو څخه کشتۍ جوړه کړه، په هغې کې کوټې جوړې کړه او دننه او دباندې ورته د قیر پوښ ورکړه. ۱۵ هغه داسې جوړه کړه چې اوږدوالی یې یوسلو پنځه دېرش متره، سور یې دوه ویشت متره او لوړوالی یې دیارلس متره وي. ۱۶ په کشتۍ باندې یو بام جوړ کړه او د پنځه څلوېښت سانتي مترو په شاوخوا کې د بام او د کشتۍ د اړخ ترمنځ فاصله پرېږده. کشتۍ درې منزله جوړه کړه او په یوه اړخ کې ورته دروازه جوړه کړه. ۱۷ زه په ځمکه باندې سېلاب راولم چې ټول ژوندي موجودات له منځه یوسي او هر هغه څه چې په ځمکه کې دي، مړه شي. ۱۸ خو زه به ستا سره لوظ وکړم چې ته به د خپلې ښځې، خپلو زامنو، او د خپلو زامنو د ښځو سره کشتۍ ته ورننوځې. ۱۹ د ټولو ژوندیو مخلوقاتو څخه یوه یوه جوړه نر او ښځه د ځان سره کشتۍ ته راوله، ترڅو هغه ژوندي وساتې. ۲۰ د هر ډول مرغانو، حیواناتو او خزندو څخه به دوه دوه تاته راشي، ترڅو هغه ژوندي وساتې. ۲۱ د خپل ځان او هغوی دپاره هر ډول خواړه د ځان سره واخله او ذخیره یې کړه.» ۲۲ نو نوح ټول کارونه د خدای د حکم سره سم سرته ورسول.