۱اَی بِرارو، مو میخاهی که شُمو دَ بارِه فَیضِ خُدا که بَلدِه جماعت های مَقدونیه دَده شُده، خبر شُنِید. ۲اگرچِه اُونا دَ آزمایشِ سختِ رَنج-و-مُصِیبت گِرِفتار بُود، خوشی پِرَیمونِ ازوا و غرِیبی بےاندازِه ازوا اُونا ره از دَولتِ سخاوَتمَندی لَبریز کد. ۳ما شاهِد اَستُم که اُونا مُطابِقِ تَوان خُو و حتیٰ کَلوتَر از تَوان خُو داوطلبانه کومَک دَد. ۴ اُونا قد شور-و-شَوقِ کَلو از مو خاهِش کد که فرصتِ شرِیک شُدو دَ امزی خِدمت که بَلدِه مُقَدَّسِین اَسته، دَزوا ام دَده شُنه. ۵و اِی کارِ ازوا کَلوتَر از تَوَقُعِ ازمو بُود: اُونا خودون ره اوّل دَ مَولا تسلِیم کد و بعد ازُو مُطابِقِ خاست-و-اِرادِه خُدا، دَز مو. ۶ امزی خاطر مو از تِیتُس خاهِش کدی که اِی کارِ سخاوَتمَندانه ره امُو رقم که دَ مینکل شُمو شُروع کدُد، امُو رقم اُو ره دَ آخِر بِرسَنه. ۷پس امُو رقم که شُمو دَ هر چِیز پیشی مِیگِیرِید، یعنی دَ ایمان، دَ توره گُفتو، دَ عِلم، دَ شور-و-شَوقِ کَلو و دَ مُحَبَتی که بَلدِه ازمو دَرِید، امُو رقم دَ امزی کارِ سخاوَتمَندانه ام پیشی بِگِیرِید. ۸ما اِی ره بحَیثِ یگ حُکم نَمُوگُم، بَلکِه خالِص بُودونِ مُحَبَت شُمو ره دَ برابرِ کوشِش-و-تلاشِ دِیگرو آزمایش مُونُم. ۹چُون شُمو فَیضِ مَولای مو عیسیٰ مسیح ره مِیدَنِید که اگرچِه اُو دَولتمَند بُود، ولے بخاطرِ ازشُمو خود ره غرِیب کد تا دَ وسِیلِه غرِیبی ازُو شُمو دَولتمَند شُنِید. ۱۰دَ امزی باره ما نظر خُو ره مُوگیُم، چُون اِی دَ فایدِه شُمو اَسته: یگ سال پیش نَه تنها شُمو دَفعِه اوّل امی کارِ سخاوَتمَندانه ره شُروع کدِید، بَلکِه خاست-و-اِرادِه انجام دَدون شی ره ام دَشتِید.
۱۱پس آلی امُو کار ره انجام دَده دَ آخِر بِرسَنِید تا امُو رقم که شور-و-شَوق دَ خاست-و-اِرادِه شُمو اَسته، امُو رقم دَ مُطابِقِ وَس-و-تَوان خُو تکمِیل کُنِید. ۱۲چُون اگه شور-و-شَوق بَشه، کومَکِ یگ نفر مُطابِقِ چِیزی که دَره قبُول مُوشه، نَه مُطابِقِ چِیزی که نَدره. ۱۳مقصد مه اِی نِیَسته که دِیگرو آسُوده بَشه و شُمو زیرِ فِشار بَشِید، بَلکِه مو میخاهی که یگ برابری دَ وجُود بییه ۱۴تا دارایی پِرَیمونِ ازشُمو ضرُورَتِ ازوا ره پُوره کنه و تا دارایی پِرَیمونِ ازوا دَ آینده ضرُورَتِ ازشُمو ره پُوره کُنه. دَ امزی رقم برابری دَ وجُود مییه. ۱۵امُو رقم که دَ کِتابِ مُقَدَّس نوِشته شُده: ”کسی که کَلو جَم کد، اِضافه نَدَشت و کسی که کم جَم کد، کمبُود نَدَشت.“
۱۶خُدا ره شُکر که دَ دِلِ تِیتُس امُو شور-و-شَوق ره جای دَد که ما بَلدِه شُمو دَرُم. ۱۷چُون اُو نَه تنها خاهِش مو ره قبُول کد، بَلکِه کَلوتَر شَوق پَیدا کده که دَ رضای خود خُو دَ پیش شُمو بییه. ۱۸و مو قد ازُو قَتی امُو بِرار ره رَیی مُونی که دَ مینکلِ تمامِ جماعت های ایماندارا بخاطرِ اِعلان کدونِ خوشخبری از شی تعرِیف-و-تَوصِیف مُوشه. ۱۹علاوِه ازی، اُو دَ وسِیلِه جماعت های ایماندارا ام اِنتِخاب شُده تا دَ انجامِ امزی کارِ سخاوَتمَندانه قد ازمو همسَفر بَشه که مو اِی خِدمت ره بَلدِه بُزُرگی-و-جلالِ مَولا و از رُوی شور-و-شَوق انجام مِیدی. ۲۰مو اِحتیاط مُونی که هیچ کس مو ره دَ بارِه امزی هدیِه سخاوَتمَندانه که مو دَ خِدمت شی اَستی، ملامَت نَکُنه، ۲۱چُون مو کوشِش مُونی چِیزی ره انجام بِدی که نَه تنها دَ نظرِ مَولا، بَلکِه دَ نظرِ مردُم ام دُرُست اَسته. ۲۲قد ازوا قَتی مو یگ بِرارِ دِیگِه خُو ره رَیی مُونی که بارها اُو ره آزمایش کدے و دَ کَلو کارا شور-و-شَوق شی ثابِت شُده و آلی بخاطرِ اِعتمادِ کَلو که دَ بَلِه ازشُمو دَره، شور-و-شَوق شی دِیگه ام کَلو شُده. ۲۳دَ بارِه تِیتُس: اُو بَلدِه خِدمت شُمو رفِیق و همکار مه اَسته. دَ بارِه بِرارونِ دِیگه: اُونا قاصِدای جماعت های ایماندارا اَسته بَلدِه بُزُرگی-و-جلالِ مسیح. ۲۴پس ثبُوتِ مُحَبَت خُو ره و دلِیلِ اِفتخاری ره که مو دَ بَلِه شُمو دَری، دَ پیشِ رُوی جماعت های ایماندار بَرمَلا نِشو بِدِید.