۱دَ امزُو شاو پادشاه ره خاو نَبُرد؛ اوخته اُو اَمر کد که کِتابِ نوِشته های تَوارِیخ ره بیره و دَ حُضُورِ پادشاه بِخانه. ۲دَزُو نوِشتِه پَیدا شُد که چی رقم موردِخای بِگتان و تِرِش ره که دُو حاضِرباشِ پادشاه و مُحافِظِینِ درگِه شی بُود و نقشه کشِیدُد که دَ بَلِه خشایارشاه دِست باله کنه، اِفشا کد. ۳اوخته پادشاه پُرسان کده گُفت: ”چی اِحترام و عِزَت دَ موردِخای بَلدِه امزی کار شی دَده شُد؟“خِدمتگارای پادشاه که اُو ره خِدمت مُوکد گُفت: ”بَلدِه ازُو هیچ کار نَشُده.“ ۴پادشاه گُفت: ”دَ حَولی کِی اَسته؟“هامان دَ امزُو لحظه دَ حَولی بُرونی قصرِ پادشاه داخِل شُدُد تا دَ پادشاه بُگیه که موردِخای ره دَ امزُو دار که بَلدِه شی آماده کدُد، اَوزو کنه. ۵خِدمتگارای پادشاه دَزشی گُفت: ”اونه، هامان دَ حَولی ایسته یَه.“پادشاه گُفت: ”بیلِید که داخِل بییه.“ ۶وختی هامان داخِل اَمَد، پادشاه دَزشی گُفت: ”مَردی ره که پادشاه میخایه اِحترام و عِزَت بِدیه، بَلدِه ازُو باید چی کار شُنه؟“هامان دَ دِل خُو گُفت: ”پادشاه دَ کِی میخایه عِزَت و اِحترام بِدیه، بغَیر ازمه؟“ ۷پس هامان دَ پادشاه گُفت: ”مَردی ره که پادشاه میخایه عِزَت و اِحترام بِدیه، ۸بیله که بَلدِه شی یگ چَپَنِ شاهانِه که پادشاه پوشِیده اَوُرده شُنه و ام یگ اَسپی که پادشاه سوار شُده و دَ سر خُو تاجِ شاهانه دَره. ۹اوخته چَپَن و اَسپ دَ دِستِ یکی از کٹه‌سرای نامتُوی دربارِ پادشاه دَده شُنه و اُو چَپَن ره دَ امزُو مَرد که پادشاه میخایه عِزَت و اِحترام بِدیه بُپوشَنه و اُو ره دَ بَلِه اَسپ سوار کده دَ مَیدانی شار بِگردَنه و پیش پیش شی رفته جار زَده بُگیه، ’مَردی ره که پادشاه بِخایه عِزَت و اِحترام بِدیه، قد شی امی رقم رفتار مُوشه.‘“
۱۰پادشاه دَ هامان گُفت: ”عَجَله کُو، چَپَن و اَسپ ره بِگِیر و امُو رقم که گُفتی بَلدِه موردِخای یهُودی که دَ درگِه پادشاه شِشته، امُو رقم بُکُو و از تمامِ چِیزای که گُفتی یگ شی ام کَم نَشُنه.“ ۱۱پس هامان چَپَن و اَسپ ره گِرِفت و چَپَن ره دَ موردِخای پوشَنده اُو ره دَ بَلِه اَسپ سوار کد و دَ مَیدانی شار گَشتَنده پیش پیش شی رفت و جار زَده گُفت: ”مَردی ره که پادشاه بِخایه عِزَت و اِحترام بِدیه، قد شی امی رقم رفتار مُوشه.“
۱۲بعد ازُو موردِخای پس دَ درگِه پادشاه اَمَد، لیکِن هامان کوٹیوبار شُده سر خُو ره پوشَند و دَ عَجَله خانِه خُو رفت. ۱۳وختی هامان تمامِ چِیزای ره که قد ازُو رُخ دَدُد دَ خاتُون خُو زِرِش و پگِ رفِیقای خُو نقل کد، مُشاوِرای دانا و خاتُون شی زِرِش دَزُو گُفت: ”اگه موردِخای، کسی که شِکست تُو دَ پیش شی شُروع شُده، از نسلِ یهُود بَشه، تُو دَ بَلِه ازُو کامیاب نَمُوشی، بَلکِه حتماً دَ پیش شی شِکست مُوخوری.“
۱۴دَ حالِیکه اُونا دَرَو قد ازُو توره مُوگُفت، حاضِرباشای پادشاه رسِید و هامان ره دَ عَجَله دَ مِهمانی که اِستِر ترتِیب دَده بُود بُرد.